14
तोयले मन्कन येसु बेस कीस्तोग़
1 परुसिरा तुंगातग्डाहि ओर्वोग़ मुक्याना लोतगा उंद वारमता पोल्वादियाते जावा उनडलाहि केयताह्कु, येसु अद लोतगा अतोग़. अस्के अग्डोर लोकुर ओन बेदाय पोल्लोते एग़्किह कीयलाह ऊळा-वेचाते मंदुर.
2 अगा येसुना मुनेह ओर्वोग़ कय्क-काल्क तोयनद बेमरतोग़ मन्कल मतोग़.
3 अगा मतोर सास्त्रमगूरुरिन ओसो परुसिरिन, येसु इद्रम ताल्ह्कतोग़, “मावाङ अडोना लेकाते पोल्वादियाते रोगमतोरिन बेस कीयनद पोलिह्ताया? पोलोया?” इतोग़. मति ओर बाताले वळ्ह्कवा केमेन मतोर.
4 अस्के येसु, ओग़ तोयले मन्कन बोयिसि बेस कीतोग़. बेस आतापया ओन लोहचीतोग़.
5 ओग़ अतस्के ओरिन इद्रम येसु ताल्ह्कतोग़: “मियग्डाहि बोनाय गाळ्दतेला इलवेके कोंदातेला, चुवातगा अरतेके तान पोल्वादियाते तेंडविर आयकिर रा?” इनजोर इतोग़.
6 ओना ताल्ह्कमुळता लोप्पा वेर बाताले ओन पोल्लो मल्हता पग़वोर.
उड्लोग़ आस मनदना
7 अगा गाटो तिनदलाह वातोरु, बेरोर मन्कलोर उदनव जागानगा उदलाहि जागाङ ऊळिंदुर, अस्के ओरिन ऊळिसि येसु उंद पोल्लो वेहतोग़:
8 “बेस्के बोग़ाय मीकु बेद मर्मतगा गाटो तिनदलाह केयनोग़, अस्के बेरोर मन्कलोर उदनद जागातगा अनजि मीट उदमाट बहा, बाराह्क इतेके लोतोग़ माल्काल, मीकाय एक्वा कदरतोग़ मन्कन केयिस मनदनोग़.
9 अस्के ओग़ वातापया मीक इर्वुरिन आस केयतोग़ु, मियगा वासि, ‘नियद जागा वेन्क ईम रा’ इनजि मीक उदता जागाताह तेहतनोग़. अस्के मीट लजा आसि कतमतोरा मुनेह नेल अनजि उदकिर.
10 “अदिनेनाह्क बेस्के मीक गाटो तिनदलाह केयनोग़, अस्के मीट नेल अनजि उदाट. मीक केयतोग़ु बेस्के मियगा वासि, ‘वय रा दादा! इगा मुनेह वास उदा’ इनजोर इनदनोग़, अस्के मीवा संगे गाटो तिनवालोर सबेटोरा मुनेह मीक कदर दोर्कग़ा.
11 बोग़े मनेग़, तना कुद नना बेरोनन इनदनोग़, ओन देवुळ उड्लोग़ कीयग़ा. मति तना कुद नना उड्लोनन इनदनोग़, ओन मात्रम देवुळ बेरोग़ कीयग़ा,” इनजोर इतोग़.
12 पया बोग़ येसुन लोन केयिस मतोग़, ओन वने येसु उंद पोल्लो इतोग़, “निमा पियल आय, नग़्का आय, गाटो तिनदलाह केयतेके, नीवा गोततोरिन, दादालोरिन, जीवा-तलातोरिन, ओसो नीवा एरे-गूरेतोर साव्कर्किन बह केयमा. बाराह्क इतेके ओर ओसो तमा लोन नीक केयनुर, इद्रम कीसि निमा केयतदिना बद्ला नीकु ओर वने केयिसि देहचीयनुर.
13 मति निमा बेस्के गाटो तिनदलाह लोकुरिन केयकिन, अस्के लेवोरिन, कय्क-काल्क वावोरिन, ताक पग़वोरिन, तोववोरिन केया.
14 अह कीतेके देवुळता देय्वा नीक दोर्कग़ा. इद्रमतोरिह्क ईतेके ओर नीक मल्हच ईया पग़वोर. मति देवुळता मुनेह सेतेमते मनजि डोलतोरु, बेस्के ओसो वन जीवा अरयनुर, अस्के नीवा बूति नीक दोर्कग़ा,” इनजोर वेहतोग़.
बेरा कुळ्पता पीटो
(मत्याल 22:2-10)
15 इद पोल्लो केंजिसि गाटो तिनदा वातोग़ ओर्वोग़ मन्कल येसुनु, “बोर देवुळता राजेमते गाटो तिन्ह्तोर ओर देय्वातोर आंदुर,” इतोग़.
16 इतस्के येसु उंद पीटोते पोल्लो मल्हतोग़. “ओर्वोग़ मन्कल बेरा कुळ्प तयर कीतोग़, कीसि वेल्लाटोर लोकुरिन कबुर ईतोग़.
17 कुळ्प गाटो तयर आतस्के ‘अले इंजेके कुळ्प गाटो तयर मन्ह्ता, कबुर वेहच मतोरिन केयलाह अन्ह्ट’ इनजि माल्काल तनाङ ओर्युलतोरिन ओसो वने केयलाह लोहतोग़.
18 मति सबेटोर नाळेह कीया बोटटोर. ओर्वोग़ इतोग़, ‘नना पूना पोलम तेंडटन अदिह्क तान ऊळलाह दाय्ह्नन, मति माल्काल ओङ बह आयमाकेग़ गोतो, नना मापि ताल्ह्किह्नन,’ इनजि इतोग़.
19 ओर्वोग़ बार इतोग़, ‘नना एयुङ जोळिङ कोंदाङ असतन. अव बेद्रम मन्ह्ताङ अविस्किन ऊळ दाय्ह्नन. मति माल्काल ओङ बह आयमाकेग़ गोतो, नना मापि ताल्ह्किह्नन,’ इतोग़.
20 ओसो ओर्वोग़ बह इतोग़ इतेके, ‘नावाङ मर्मिङ आताङ, अदिनेनाह्क नना वाया पग़वोन’ इनजोर इतोग़.
21 “ओग़ ओर्युलतोग़ मल्स वातोग़. वासि, तना माल्कानगा लोकुर बह इतोर, अव सबे पोल्लोङ वेहतोग़. अस्के अद पोल्लोतुन केंजिसि, लोता माल्काल पका ओङ आतोग़. ओङ आसि तना ओर्युलतोन इतोग़, ‘निमा नाटेनाङ अग़िनगा अनजि लेवोरिन, कय्क-काल्क वावोरिन, तोववोरिन, ताक पग़वोरिन केयिस तय,’ इतोग़.
22 इतस्के ओर्युलतोग़ अतोग़, अनजि अद्रमे कीतोग़. पया मल्स वासि तना माल्कान वेहतोग़, ‘सामि! निमा बह उकुम ईतिन, अद्रमे ओरिन केयिस ततन. मति ओसो वने जागा पिसताये,’ इतोग़.
23 इतस्के ओना माल्काल इतोग़, ‘निमा ओसो वन अन, अनजि नाह्कनाङ अग़िना कचुल, ओसो पोलह्कने अनजि ओर लोकुरिन अर्जि कीसि, ओरिन पोस वायु. नावा लोन पूरा निंदिस मनि.
24 नना मीक निटम वेहतह्नन, बोर लोकुरिन मुने गाटो तिनदलाह केयिस मतन, ओर लोकुरग्डाहि ओर्वोग़ वने नावा गाटोतुन तिनोग़ आयनोग़,’ इतोग़.” इद्रम वेहचि येसु पीटोतुन मारिह कीतोग़.
येसुना अग़दे बह ताकना
25 पया लोकुरा गोह्डि येसुना पयाह-पयाह अनजोर मतोर. अस्के येसु ओरेके मिळ्न्दिस ओरिन इतोग़,
26 “बोग़ाय नावाङ कग़यकन इनवाल, ओग़ तना तलोग़-तपेनु, तना मुतेनु, पिलाङ-पेकोरिनु, तना तमोग़-दादानु, एलाळ-अकानु, इचोने आयो मति तना जीवातुन वने नाकाय वीळिस जीवा कीतोग़, इतेके ओग़ नावाङ कग़यवाल आया पग़वोग़.
27 ओसो बोग़ तना हव्कनागुटा कांजतप नावा पयाह वाताह्कु, वायनव तिपल्किन आप पग़वोग़, ओग़ मन्कल वने नावा संगे मनजि कग़यवाल आया पग़वोग़.
28 “इंजेके मियग्डाह बोग़ाय उंद बेरा लोन पंडना विचर कीतेके, ओग़ मन्कल, ‘नना कोनि इचोन बेरा लोन पंडना विचर कीय्ह्नन, मति इद लोतुन मारिह कीयलाह नयगा इचोवेल्लाङ कोताङ मन्ह्ताङा, इलेङा,’ इनजि बह तेना लोप्पा ओग़ इचुन आय गंता कीस ऊळोग़ आवेग़?
29-30 ओग़ पाय्वाङ वाटिस, तान बार मारिह केवोग़, इतेके पाय्वाङ वाटिह्पा ओन बोर बोर ऊळिस मतोर, ओर मन्कलोर मात्रम ‘वेन ऊळाट रो! वेग़ मन्कल पाय्वाङ वाटलाह वाटटोग़, मति तान मारिह कीया पग़वोग़’ इनजोर वेन ऊळिसि पास्कनुर, कवयनुर.
31 “आयवेके इद्रमतोग़ बोग़ राजाल मन्ह्तोग़ा? दुस्रा देसेमता संगे लळय कीयलाह दायनामुने बह उचुन आय विचर केवोग़ आवेग़? ‘नना सिरप दहा अजर्क सीपय्कना संगे ओर वीसा अजर्क सीपय्किन गेल्स पग़यकना? पग़वोना?’
32 वेग़ तना लळेम आया पग़वेके, विरुदतोर लळय कीयलाह एवयनामुनेने, तनाङ सीपय्कना संगे कबुर लोहचि, गूनम आयलाह विचर केवेग़.
33 “अद्रमलेह्काने मियग्डाह वने बोरे मनिर, आपुना सबे मालसोम, अनम-दनम ओसो मियगा मंदनव सबेटविन विळ्स पग़विर, इतेके नावाङ कग़यवालोरिर आया पग़विर.
येसुनाङ कग़यवालोर उवुर लेह्काडोरु
(मत्याल 5:13; मार्कल 9:50)
34 “उवुरि बेसतले, मति ताना मिटस बार अता इतेके, अद मिटस बेद्रम मल्स वायग़ा?
35 अद पया पोलमते वाटलाह बेद तोळ्योतगा काल्ह्पलाह वने अरवो, बेद कतुमतगा काल्ह्पलाह वने अरवो. तान आक्रिते पोहचीयनुर. अदिनेनाह्क मियग्डाहि बोरिह्क केंजलाह गिर्दा मन्ह्ता, ओर नावा पोल्लोतुन बेस केंजाटु!” इनजोर वेहतोग़.