16
लोतुन ऊळेवाळे केवाल मेटि आय्डा कीस्तोग़
1 पया येसु कग़यवालोरिन ओसो इतोग़, “बोग़ो ओर्वोग़ साव्कर मन्कल मतोग़. ओनगा ओर्वोग़ मेटि मतोग़. वेग़ मेटि नीवाङ कोतान बेदे कबळतुह्क अरवाह मारिह कीयलाह आतोग़, इनजोर बोरो साव्करिन वेहतोर.
2 अस्के साव्कर मेटिन केयिस इद्रम इतोग़, ‘नीवा लोप्पा नना बाताल केंजलाह आतन रा? इंजेक नीक इद कबळते नना तास पग़वोन आयकन. निमा नयेनाह्क कीसोर मतिन, अद कबळता पूरा लेका कीस नाक ईम!’ इतोग़.
3 इतस्के पया ओग़ मेटि तनतनाय आल्स बोटटोग़, ‘नना इंजेके बाताल कीकन? माल्काल इतेके नाक कबळताह पेहचीयनोग़. नाक इतेक इंजेक पोलमते कबळ कीयलाह कयदेन आयो. ओसो बेगा ताल्ह्किस तिनदलाह वने लजा वास्ता,’ इनजोर आल्सतोग़.
4 आल्सिस पया, ‘नना इंजेक बह कीकन, अद नाक सबे तेळियता. इद कबळतग्डाह नाक पेहतापया दुस्रोर लोकुर नाक तमा लोन केयना गावले.’
5 इनजि तना माल्कानग्डाहि बोर सामन तेंडिस मतोर, ओरग्डाह ओर्विन-ओर्विन केयिस ताल्ह्कतोग़. ‘निमा साव्करिह्क बेचोन करा मल्हच ईयनद मन्ह्ता रा?’ इतोग़.
6 इतस्के ओग़ इतोग़, ‘नालुङ अजर्क लिटर्क जय्तुन पंडिना नेयु’ इतस्के, मेटि ओनु ‘इद ऊळा, नीवा पेदिरता कागिद मन्ह्ता, तेनगा रेंड अजर्क लिटर्क इनजोर चट्पिट रासा,’ इनजोर वेहतोग़.
7 पया ओसो दुस्रोन ताल्ह्कतोग़, ‘निमा साव्करिह्क बेचोन करा मल्हच ईयनद मन्ह्ता रा?’ इनजोर ताल्ह्कतस्के ‘नूर कंडिङ गोह्क मल्ह्चीयनद मन्ह्ता’ इतोग़. इतस्के ओन वने ‘इद नीवा पेदिरता कागिद मन्ह्ता, तेनगा नालुङ वीसाङ कंडिङ इनजोर रासा,’ इनजोर वेहतोग़.
8 “पया ओग़ मुळ्हे मेटि पका सत्रलते कबळ कीतदिन माल्काल ऊळिसि, ओन ‘पका उसर मह्निन रा!’ इनजि इतोग़. इद्रमलेह्का देवुळतुन पुतोर लोकुरिह्काय एक्वा, देवुळतुन पुनवोर लोकुर ओर्विह्क-ओर्वोग़ ईयना-एतनदिना लोप्पा पका सत्रल मन्ह्तोर.
9 नना मीकु वेहतलाह आतन, इद दुनियाता मालसोमते आपुह्क गोततोर दोर्किह कीम्ह्टु. बाराह्क इतेके अद मालसोम बेस्के मायग़ा, अस्के बेस्केन मायवव लोह्कने मीक जागा दोर्कग़ा.
10 “बोग़ उडीला पोल्लोते सेतेम मन्ह्तोग़, ओग़ बेरा पोल्लोते वने सेतेमे मन्ह्तोग़. मति बोग़ उडीला पोल्लोते सेतेम इलेग़, ओग़ बेरा पोल्लोतगा वने सेतेम इलेग़.
11 अदिनेनाह्क इद बूमतग्डा मालसोमतेने मीट सेतेमते इलवेके, देवुळि तना राजेमता मालसोमतुन मीवा कयदे बेद्रम ईयग़ा?
12 दुस्रोना मालसोमतुन मीट सेतेमते काळ्ङविर इतेके, देवुळ ईयनद तूस मीक बेद्रम दोर्कग़ा?
13 “अदिनेनाह्क ओर्वोग़े ओर्युलतोग़ु, इर्वुर माल्कालोरा सेवा-साकुर कीया पग़वोग़. बाराह्क इतेके ओग़ ओर्विन बार कोटुल कीयनोग़ ओसो ओर्विन बार जीवा कीयनोग़. इलवेके ओर्विना पोल्लो केंजनोग़, ओर्विना पोल्लो बार केंजोग़ आयनोग़. अद्रमे मीट वने मालसोमु ओसो देवुळि, इव रेंडिना सेवा मुर्तिय कीया पग़विर,” इनजोर वेहतोग़.
देवुळता पोल्लो बेस्केन मायो
(मत्याल 11:12-13)
14 येसु इव पोल्लोङ वेहनेके, अगा उय्तुर परुसिर मतोर. ओर पका कोताना पोग़ोन जीवा कींदुर. अदिह्क येसु इतव पोल्लोन केंजिसि ओन पास्किंदुर.
15 पया येसु ओरिन इतोग़, “मीटु लोकुरा मुनेह माट सेतेमतोरोम इह्निर, मति मीवा पोटातगा बाताल मन्ह्ता, तान देवुळ पुन्ह्ता. बेव-बेव पोल्लोङ मन्कना विचरते पाय्दाताङ मन्ह्ताङ, अव देवुळतुह्क एग़्ङ वास्ताङ.
16 “एग़ मीहवाल योहन वानाह्जोम मोसानाङ अडोङ ओसो देवुळता कबुरतोरा सास्त्रम, इव लोकुरिन ताकिह कीयलाह मंदुङ, ताना पया देवुळता राजेमता बेसता कबुर पोकुर आयलाह आता. वेल्लाटोर लोकुर ताना राजेमतगा वेलवेले ओळियलाह ऊळिह्तोर.
17 ओकावेलाते पोग़ोटा बूमि ओसो इळ्ता बूमि बूळेम आयनुङ, मति देवुळता सास्त्रमतग्डा उंद गीता वन मायो आयग़ा.
मुतेन विळ्सनदिना लोप्पा
(मत्याल 5:31,32; मार्कल 10:11,12)
18 “बोग़ाय मुने ततद मुतेन विळ्सिसि, ओसो उंदि दुस्रा मुतेन ततोग़ इतेके, ओग़ साट्या कबळ कीस्तोग़. ओसो बोग़ाय अद्रम विळ्सिसीतद आंचान बार तन्क मुते कीतोग़ इतेके, ओग़वने साट्या कबळ कीस्तोग़.
साव्कर मन्कल ओसो गरिब मन्कल
19 “ओसो उंद पोल्लो केंजाटु. ओर्वोग़ पका साव्कर मन्कल मतोग़. ओग़ डुंगा पंडि लेह्काडा रंगताङ, पका दाराताङ गेंदेङ केग़न्दोग़. ओसो दिनमे बेस सुकमते, गिर्दा-वेळ्काते ओसो बेरा गिजुरते मंदोग़.
20 मति ओर्वोग़ बार ओसोय गरिब मन्कल मतोग़. ओना पेदिर लाजर मता. ओग़ मेंदुलमेंड बोटाङ आस मतोग़. ओन दिनमे साव्करना लोता अग़दगा बोरो तचि तासिस अंदुर.
21 साव्कर तिंदह्पा, इळ्न अरतव पेसावार्किन तेला तिनजि पोटातुन निहेनन इनजि ओग़ विचर कींदोग़. ओसो ओना मेंदुदाङ बोटान नय्क बार वासि नाकिन्दुङ.
22 “मनेक मनेके उंद दिया गरिब मन्कल डोलतोग़. अस्के देवतुल्क वासि ओना जीवातुन पोग़ोन सिंगर्दीपतगा अब्रहम मुय्तोना कचुल ओस तासताङ. पया उचुक दियाने ओग़ साव्कर मन्कल वने डोलतोग़. लोकुर ओना सति-गति कीतोर.
23 ओग़ साव्करना जीवा हानादीपता किसबटटा जागातगा कर्विह्पा पोग़ोन ऊळनेके, ओन्क जेकु अब्रहमना कचुल लाजर उदिस मनदनद ऊळतोग़.
24 अस्के पया ओग़ अब्रहमिन आळो कीस इद्रम इतोग़, ‘ए अब्रहम तादो! नाक ऊळिस जीवा लोपा रा! नना किसबटटगा कर्वलाह आतन. निमा मुर्बत कीसि लाजरिन लोहचीम, ओग़ वासि तना वेळ्न्जतुन एतगा मुळ्हचि, नावा वेंजेटुन सितुर कीयेग़,’ इनजोर केयतोग़.
25 अस्के अब्रहम इतोग़, ‘ऊळा पेका! निमा सीता कीम, जीवात मनदह्पा, नीवा पिसमुळते बाताल गावले मता, अद सबे नीक दोर्कता. मति वेग़ लाजरिह्क इतेके अद्रम सुकमता पिसमुळ दोर्को. इंजेके इगा वेन्क बाताले तिपल इले. मति निमा मात्रम अगा कर्वलाह आतिन.
26 ओसो उंद पोल्लो केंजा, मीवा-मावा नडुम उंद बेरा कस्क्ने मनदनद किंडि मन्ह्ता. अदिनेनाह्क मियग्डाह बोर इके वेंडकोम इतेक तेला वेंड पग़वोर, ओसो मयेकेडेनाह मियेके बोर वेंडकोम इतेक तेला वेंड पग़वोर,’ इनजोर इतोग़.
27 अस्के साव्कर इतोग़, ‘अल अह इतेक तादो, नना नीक अर्जि कीय्ह्नन. नियोग़ लाजरिन नावा बाबाना लोन लोहचीम.
28 बाराह्क इतेके नाक एयवुर तमोर मन्ह्तोर, ओर नावा लेह्का पापि बुदते मनमाकिर इनजोर ओरिन अन्ज वेहतेके, नना पका तिपल आय्ह्नन इद जागातगा ओर वावोर आयनुर,’ इनजोर इतोग़.
29 इतस्के अब्रहम इतोग़, ‘ओरगा इतेके मोसाल रासतव अडोङ ओसो दुस्रोर देवुळता कबुरतोर रासतव पुस्तकिङ मन्ह्ताङ. अविस्किन अर्विसि, अग्डा पोल्लोतुन केंजिर, अद्रमलेह्का ताकिर,’ इतोग़.
30 इतस्के साव्कर मन्कल इतोग़, ‘अद्रम आयो अब्रहम तादो! डोलतोरग्डाह बोग़ाय अनजि ओरिन वेहतेके, ओर पापमता अग़दाहि मलयनुर,’ इतोग़.
31 अस्के अब्रहम ओन इतोग़, ‘मोसाल रासतव अडोना ओसो दुस्रोर देवुळता कबुरतोराङ पुस्तकिना पोल्लोतुन केंजोर, इतेके डोलतोग़ मन्कल जीवा अरसि, ओरिन वेहतलाह अतेके वने ओर केंजोर आयनुर,’ इनजोर इतोग़.”