21
रांडे आंचाळ देवुळतुह्क ईतद दान
(मार्कल 12:41-44)
1 पया साव्कर मन्कलोरु मंदिरता लोप्पा सन्दुकतगा, देवुळतुह्क कोताङ वाटनदिन येसु ऊळतोग़.
2 अस्के ओसोय गरिब रांडे आंचाळ वने, इतुळताङ रेंड इचुटाङ कोताङ अद संदुकतगा वाटनदिन ऊळतोग़.
3-4 पया सबेटोरिन आळो कीसि, “नना मीकु सेतेम वेहतह्नन, सन्दुकतगा दान वाटटोर सबेटोरगा वेल्लाङे कोताङ मन्ह्ताङ. ओसो दान वाटटापया वने ओरगा कोताङ पिसिह्ताङ. मति इद रांडे आंचानगा बाताले इले, तेला मति तना पिसवटुह्क तासिस मतव पूरा कोतान दान वाटटा. अदिनेनाह्क देवुळता कोंडा मुनेह इद रांडे आंचाळिये सबेटोरिह्काय एक्वा कोताङ वाटटा,” इनजोर इतोग़.
मंदिर बूळेम आयनदिना लोप्पा येसु वेहतह्तोग़
(मत्याल 24:1-2; मार्कल 13:1-2)
5 अस्के उय्तुर मन्कलोर मंदिरतुन ऊळिसि इद्रम वळ्ह्कसोर मतोर, “इद मंदिरतुन पकाय सोबाताङ बंडाने, देवुळतुह्क ईतद कोडटा सामनते सोबा कीतोर,” इनजोर इतोर.
6 अस्के येसु इतोग़, “इंजेके मीट ऊळिह्निर, इविस्कनगा बंडाता पोग़ोन बंडा वने मनो आयग़ा. पूरा अर्हचीयनुर अद्रमता वेला वायग़ा,” इतोग़.
मन्कलोर तिपल आयनुर
(मत्याल 24:3-14; 10:19-22; मार्कल 13:3-13)
7 पया ओरु, “गूरु! निमा वेहतव पोल्लोङ बेस्के आयनुङ? इव पोल्लोङ आयनुङ इनजोर तेना बाताल सीना दिसग़ा?” इनजोर ताल्ह्कतोर.
8 येसु ओरिन इतोग़, “मीक बोग़ाय नाळेह कीयना आयो इनजोर उसरते मन्ह्टु. वेल्लाटोर नावा पेदिर पोस वासि, ‘नना देवुळ लोहतोनन, इंजेकेन कगो एवता,’ इनजोर इनदनुर. ओरा पेग़्के बह अनमाटु.
9 ईनाह-आनाह नालुङ मूलाङ आस लळय्क आस्ताङ इनजि मीक एर्का आयग़ा. अस्के मीट रेयमाट बहा. इव पोल्लोङ निटम अद्रम आयनुङे, मति अचोट्के बूम मुळन्दो आयग़ा.
10 “ओसो जातिना पोग़ोन जातिङ, राजेह्कना पोग़ोन राजेह्क लळय्क आयनुङ.
11 बेगा-बेगा बूमि मेलियिस गुळ्ह दायग़ा. बेगा इतेक अगा दुकळ आयग़ा. रोगह्क पुटनुङ. मोयुदगा रेय वेसनाह पोल्लोङ आयनुङ ओसो बेराङ-बेराङ सीनाङ दिसनुङ.
12 “इव पूरा पोल्लोङ आयनामुने, मीट नाक विस्वस कीतेनाह्क लोकुर मीकु पोस पका तिपल कीयनुर. यहुदिराङ पार्तना कीयनव लोह्कनगा पोस ओयनुर, जेलते वाटनुर. ओसो बोर-बोर मीकु राजालोरगा, गुमसिरगा ओयनुर.
13 अस्के नावा पोल्लोता साक्सि ईयलाह मीक अग़ दोर्कग़ा.
14 मीवा नेयम कीयह्पा, मीट अगा बाताल वळ्ह्ककोम इनजोर मुनेन आलिह केमाटु.
15 मीक बाताल वळ्ह्कना मन्ह्ता, ताना बुदि नना मीक ईकन. मीवा कोटुलतोर मीवा पोल्लोतुन केंजतस्के, पोल्लो मल्हता पग़वोर आयनुर. मीवा पोल्लोतुन जोल वने इनदा पग़वोर आयनुर.
16 “ओसो मीवा तलोग़-तपे, दादाल-तमोग़, जीवातोरु, मीवा गोततोर वने मीकु विरुदतोरा कयदे पोस ईयनुर, ओसो मियग्डाह उय्तुरिन हव्कनुर.
17 मीट नाक विस्वस कीतिर, अदिनेनाह्क सबेटोर मीक विरुद कीयनुर.
18 मति इद्रम आतेक तेला, मीक बोग़े बूळे कीया पग़वोग़.
19 आक्रि एवनाह दीरा पोस मतेकेन, देवुळ ईयनद पिसमुळ मीक दोर्कग़ा.
येरुसलेम सहरतगा वायनद गोसा
(मत्याल 24:15-21; मार्कल 13:14-19)
20 “ऊळाट, बेस्के सीपय्क येरुसलेम सहरतुन सर्ने कीयनुर, अस्के सहर बूळेम आयना कगो एवता इनजोर पुन्ह्टु.
21 यहुदा पटटे मनवालोर लोकुर पिसकोम इनजि मेटानके मकलाह वितिर. सहरता लोप्पा मनवालोर लोकुर पलते पेसिस वितिर. ओसो नाह्कनेके मनवालोर लोकुर सहरता लोप्पा ओळियमाकिर.
22 बह इतेके देवुळि लोकुरिह्क सिक्सा ईयग़ा इनजोर मुनेन सास्त्रमतगा रासतद मन्ह्ता. अव सबे पोल्लोङ निटम आयनुङ.
23 अव दियाने नेलाङ हव्कतव आस्किह्क ओसो पाल उहतनव तलिस्किह्क बेचोटा गोसा आयग़ा. इद देसेमतोर लोकुर पका तिपल आयनुर. देवुळता ओङ ओरा पोग़ोन अरयग़ा.
24 उय्तुर मन्कलोर तल्वर्कने डोलनुर. उय्तुर मन्कलोरिन बार दुस्राङ देसेह्कनोरगा दोहच ओयनुर. ओसि यहुदि आयवोरा वेला मारनाह्जोम, ओरु येरुसलेमतोरिन काल इळ्न तासनुर.
येसु मल्स वायनामुनेटा गोसा
(मत्याल 24:29-30; मार्कल 13:24-26)
25 “ओसो पोळ्दु, नेला, उकाङ इविस्कनगा सीनाङ दिसनुङ. ओसो इद बूमतगा सम्दुरताङ लच्काङ वायनुङ, अव लच्काङ नेकनदिन केंजिसि देसेह्क-देसेह्कनोर लोकुर पका रेयनुर.
26 पोग़ोटा बूमतगा मंदनव सबे मेलियनुङ. इद दुनियाते वायनाङ पीळानेनाह्क रेयिसि लोकुरा जीवा पेसिस अतप आयग़ा.
27 अस्के कोनि माने-मन्कना नडुम पुटटोनन नना बेरा डीसाते, लावते, मोयुलता संगे वायनदिन लोकुर ऊळनुर.
28 इव पोल्लोङ आयलाह बोटनुङ, अस्के मीट निचि, तलाङ तेहच पोग़ोन ऊळाट. बाराह्क इतेके देवुळि मीक विळ्सिह कीयनद दिया एरे एवयग़ा,” इनजोर येसु ओरिन वेहतोग़.
येसु वायनदिन पुनदना
(मत्याल 24:32-35; मार्कल 13:28-31)
29 ओसो येसु ओरिन उंद पोल्लो इद्रम वेहतोग़, “गेळाताङ मरान ऊळाटु.
30 अव मरानाङ आकिङ रालिह्ताङ, अस्के डोय एरे एवयलाह आता इनजोर मीट पुह्निर.
31 अद्रमे इंजेक नना वेहतनव पोल्लोङ आयनदिन मीट ऊळकिर, अस्के देवुळता राजेम एरे एवता इनजोर पुन्ह्टु.
32 नना मीक सेतेम वेहतह्नन, इव सबे पोल्लोङ बेचानाह करल आयोङ आयनुङ, अचानाह इद पीळतोर बूळेम आयोर आयनुर.
33 पोग़ोटा बूमि, इळ्ता बूमि बूळेम आयनुङ, मति नावा पोल्लो बेस्केन मायो आयग़ा.
येसुना अग़ ऊळसोर मनदना
34 “अदिनेनाह्क मीटु तिनदना, कल्क उनडना ओसो इद दुनियाताङ कबस्कना सीताते मुळ्न्दिस मनमाटु. बह इतेके नना वायनद दिया, मीक दोम्ह्क्ने वदतगा एग़्कतप आयमाकि इनजोर उसरते मन्ह्टु.
35 अद दिया इद पूरा दुनियाता लोकुरगा, अद्रमलेह्काने दोम्ह्क्नेन वास अरयग़ा.
36 अदिनेनाह्क उसरते मनजि, इव पूरा आयनव पीळाङ-दोकानाहि पिसकोम इनजि अमेसा दीरा पोसि पार्तना कीसोर मन्ह्टु. अह कीतेके नना माने-मन्कना नडुम पुटटोनन वायकन, अस्के मीट नावा मुनेह बेदे रेयलेवा नितकिर,” इनजोर येसु वेहतोग़.
37 पया येसु दिनमे मंदिरतगा काग़्हन्दोग़. अह कीस नुल्पेडुह्क बार सहरताह पेसिस जय्तुन इनदनद मेटातगा अनजि मंदोग़.
38 अद्रमे वेल्लाटोर लोकुर ओना पोल्लोतुन केंजलाहि सकरिय मंदिरतगा अंदुर.