24
येसु हामुरताह तेग़्किह्तोग़
(मत्याल 28:1-8; मार्कल 16:1-8; योहन 20:1-8)
1 पया वारमता मुनेता दिया (इतेके ऐतारम दियाते) सकर पङ-पङ आयह्पा, येसुन गति कीयह्पा अन्ज मतव आस्कु, तमाय पर्ह्किस तयर कीस मतद अतर्नेय पोसि येसुन तासतद गुमयातगा अताङ.
2 अगा एवतस्के गुमयाता अग़दगा तिळ्ह्प कीस मतद बंडा अबर गूळिस मतदिन ऊळताङ.
3 पया अव आस्कु लोप्पा ओळियिस ऊळताङ, अस्के अविस्किह्क अगा येसुसामिना सेत्ता दिसो.
4 दिसवाह्कु अव आस्कु एक्बेक आताङ. अस्के दोम्ह्क्नेन इर्वुर तिर्मिळ्स्कनाङ जगाङ केग़तोर मन्कलोर अविस्कनगा वास नितोर.
5 अस्के अव आस्कु पका रेयिसि ओरा मुनेह तला वग़्हताङ. पया ओरु, “जीवात मनवाल मन्कन डोलतोरगा मीट बाराह्क पर्ह्कलाह आतिर?
6-7 ओग़ इगा इलेग़, ओग़ जीवा अरतोग़! मीवा संगे गालिल पटटगा मतस्के, ‘माने-मन्कना नडुम पुटटोनन नाकु पापि मन्कलोरा कयदे पोस ईयनुर. पया ओर नाकु हव्कनागुटातगा मोलाङ कोटिस हव्कनुर, मति नना मूंड दियाने जीवा अरयकन, इव सबे करल आयनुङे,’ इनजोर मीक वेहच मतोग़, सीता मन्ह्ताया?” इतोर.
8 अस्के अव आस्किह्कु येसु मुने वेहतव पोल्लोङ सीता वाताङ.
9 पया अव आस्कु गुमयातग्डाह मल्स अनजि अक्रा बळयिरिन ओसो दुस्रोर कग़यवालोरिन इव पूरा पोल्लोन वेहताङ.
10 वेहतनव आस्क बेव इतेके, मग्डला नाटेना मरियाल, योहना, याकुबना तलोग़ मरियाल, ओसो उचुक दुस्राङ आस्क मताङ. इवे बळयिरिन इव पोल्लोङ वेहताङ.
11 मति अविस्कना पोल्लोतुन बळयिर विस्वस केवोर. “इव आस्क उगसे वेहतह्ताङ रा!” इतोर.
12 मति पत्रु अग्डाह तेदिस गुमयातगा एवनाह वित वातोग़. पया लोप्पा ओलिस ऊळनेके अगा सिरप येसुना सेत्तातुन ऊर्हच मतव गेंदेङ बहता अहे मताङ. अदिन ऊळिस इगा बह आता इनजोर विचर कीसोर ओग़ लोन मल्स अतोग़.
इमावुस नाटे दायनद अग़दे येसु दिसिह्तोग़
(मार्कल 16:12-13)
13 अदे दिया येसुनाङ कग़यवालोरग्डाह इर्वुर इमावुस इनदनद नाटे अनजोर मतोर. अद नाग़ येरुसलेम सहरतग्डाहि जोक-जोक अक्रा किलोमिटर मता.
14 अस्के येरुसलेमतगा आतव सबे पोल्लोन ओर इर्वुर वळ्ह्कसोर-वळ्ह्कसोर अनजोर मतोर.
15 ओर इद्रम तम-तमाय वळ्ह्कसोर दायह्पा, येसु कुदि दोम्ह्क्नेन ओरगा वासि ओरा संगे ताकलाह बोटटोग़.
16 ताकनेके येसुन वेर पुनदना आयो, इनजि ओर इर्वुरिन आसि मुर्तिय पुनवाह कीतद मता.
17 पया येसु ओरिनु, “मीट इर्विर अनजोर-अनजोर बेद पोल्लोतुन वळ्ह्कलाह आतिर रा?” इनजोर ताल्ह्कतोग़, अस्के ओर दुकमते निंदिस अगान नितोर.
18 निचि “निने, अने येरुसलेमतगा आतव पोल्लोन पंडुमतुह्क वातोरु सबेटोर पुतोर, इतेके निमा वग़ोनिने बह पुनविन रा?” इनजोर ओर इर्वुरग्डाह किलियुपा इनवाल इतोग़.
19 अस्के येसु “बेव पोल्लोङ रा?” इनजोर ताल्ह्कतोग़. ताल्ह्कतस्के ओर इद्रम वेहता बोटटोर, “नासरेत नाटेनोग़ येसुना पोल्लो आंदु रा! ओग़ बाताल कींदोग़, बाताल वेहन्दोग़, अव पूरा देवुळता लावताङ मताङ. ओग़ देवुळता कबुरतोग़ मतोग़. लोकुर वने ओन बेसतोग़ इनजोर इंदुर.
20 मति मावा पेर्मालोरु, मुक्यालोरु, ओन्क हामुरता सिक्सा ईयेग़ इनजोर पिलातिना कयदे पोस ईतोर. इद्रम कीस लोकुर ओन हव्कनागुटातगा मोलाङ कोटिस हव्कतोर.
21 मति ओग़े इस्रयेल जाततोर लोकुरिन कोंटेतोरा कयदाहि विळ्सिह कीयनोग़ इनजोर माट आसा कीस मतोम.
“इंजेके इव सबे पोल्लोङ अनेटस्केन आताङ.
22 ओसो नेंड मयग्डाङ उचुक आस्क वने माक बामनाह कीताङ. अव नेंड सकरिय सेत्ता तासतद गुमयातगा अन्ज मताङ.
23 मति अगा येसुना सेत्ता अविस्किह्क दोर्को. दोर्कवाह्क अव मल्स वासि, ‘माट देवतुल्किन ऊळतोम. येसु जीवा अरतोग़ इनजोर अव माक वेहताङ,’ इनजोर मयग्डाङ आस्क माक वेहताङ.
24 अविस्कना पोल्लो केंजिसि मावा तोळतोर उय्तुर गुमयातगा अन्ज ऊळतोर. अस्के अव आस्क बेद्रम वेहच मताङ, अद्रमे मता, येसु इतेक ओरिह्क दिसोग़!” इनजोर वेहतोर.
25 पया येसु इतोग़, “मीट मुर्तिय बुदलेवोरिर आंदिर. देवुळता कबुरतोर वेल्लाय मुने वेहतव पोल्लोन विस्वस कीयलाह बह विचर केविर?
26 देवुळ लोहवाल पिसिह केवाल किर्स्तुह्कु, पका तिपल आसि पया बेरा डीसाते देवुळतगा दाया पोयोया?” इनजोर इतोग़.
27 इद्रमलेह्का मोसानाङ अडोनगा, देवुळता कबुरतोराङ पुस्तकिनगा, अहे पूरा देवुळता सास्त्रमते, बेगा-बेगा तना लोप्पा रासतव पोल्लोङ मताङ, अव सबे पोल्लोन ओरिह्क तेळियिह कीस वेहतोग़.
28 अद्रमे पया ओर तम्क दायना मतद नाटेनगा एवतोर. अस्के येसु नाटुन वीळिस दायना लेह्का ओरिह्क दिसता.
29 अदिनेनाह्क ओरु, “इंजेके पोळ्द अता, नेटुह्क मयगान रोमा दादा” इनजोर ओन गोंडगोंड आतोर. अस्के येसु ओरगान रोमतोग़.
30 पया ओग़ ओरा संगे जावा उनडलाह उदतोग़. अस्के ओग़ आरतुन तेहचि देवुळतुन जोहर कीतोग़. कीसि किर्हच ओरिह्क ईयलाह आतोग़.
31 ईनेकेन ओर इर्वुराङ कोंडाङ पङ्ने आतप लेह्का आताङ, अस्के वेग़ येसु आंदोग़ इनजोर पुतोर. मति येसु ओरिह्क दिसवाह चट्ने मायतोग़.
32 पया ओर तम-तमाय, “ओग़ मावा संगे वासोर अग़दे गोटिङ कीतोग़ ओसो देवुळता सास्त्रमताङ पोल्लोन तेळियिह कीतोग़. अस्के ओना पोल्लो मावा जीवातुह्क बेचोन मिटस दल्गता, आयोया?” इनजोर ओर्विह्क-ओर्वोग़ इतोर.
33-34 पया ओर अग्डाह पोर्क तेदिस ओसोवने येरुसलेमते मल्स अतोर. अतस्के अगा अक्रा बळयिर ओसो कग़यवालोर जमा आसि, “निटमे रा! येसुसामि जीवा अरतोग़. ओग़ सिमोन पत्रुह्क दिसतोग़!” इनजोर वळ्ह्कनेकेन ओर इर्वुर अगा एवतोर.
35 अस्के ओर इर्वुर वने अग़दे अनेके बह आता ओसो येसु आरतुन किर्हचि ओरिह्क ईयह्पा, ओन बह पुतोर, अदिन ओर सबेटोरिह्क वेहतोर.
येसु तनाङ कग़यवालोरिह्क दिसिह्तोग़
36 ओर इर्वुर इव पोल्लोङ सबेटोरिन वेहनेकेन येसु ओरा नडुम वास नितोग़. निचि “मीक सुकम दोर्कि” इनजोर इतोग़.
37 अस्के ओर दिर मिळ्ह्किसि, माट येसुना मिळ्सुमतुन ऊळिह्नला बहु, इनजोर बामिस रेयतोर.
38 अस्के येसु ओरिन इतोग़, “मीट इचोन बाराह्क रेयतिर? नावा लोप्पा बाराह्क उन्क-मन्क आय्ह्निर?
39 नावाङ कय्किन-काल्किन ऊळाट! नाक बोयाटु! इद ऊळाटु नना येसुनने, मिळ्सुमतुह्क इद्रम अविङ-बोकाङ इलेङ, मति नाक मन्ह्ताङ!”
40 इनजोर वेहचि येसु तनाङ कय्किन-काल्किन ओरिह्क तोहतोग़.
41 अस्के ओर अचोन गिर्दा आसि बामतोर इतेके मावा मुनेह येसुये निच मन्ह्तोग़ इनजि इंका सेतेम पोयोर. अद्रम आनेके येसु ओरिनु, “मियगा बातालाय तिनदलाह मन्ह्ताया?” इनजोर ताल्ह्कतोग़.
42 अस्के ओरु बोळ्सतद मीन-मुका ओन्क ईतोर.
43 ईतस्के ओर ऊळनाहे अद मुकातुन येसु तितोग़.
44 तिनजि ओरिन इद्रम इतोग़, “इव पोल्लोङ बेव इतेके नाक हव्कनामुने मीवा संगे मतन, अस्के मीक वेहतव आंदुङ. मोसाना सास्त्रमतगा, देवुळता कबुरतोराङ पुस्तकिनगा ओसो देवुळताङ पाटानगा, नावा लोप्पा रासतव सबे पोल्लोङ करल आयनद मता. अदिनेनाह्क इद्रम आता,” इनजोर वेहतोग़.
45 पया देवुळता पवित्र सास्त्रमताङ पोल्लोन पुनदलाह येसु ओरिह्क बुद ईतोग़.
46 ओसो इद्रम इतोग़, “सास्त्रमतगा इद्रम रासतद मन्ह्ता इतेके: देवुळ लोहवाल पिसिह केवाल किर्स्तु तिपल आस डोलनोग़. ओसो मूंड दियाने ओसोवन जीवा अरयनोग़.
47 अदिनेनाह्क पापमता मापि दोर्कना इतेके पापमता अग़दाहि मलयना. इद कबुरतुन किर्स्तुना अदिकरते येरुसलेमतग्डाह सुरु कीसि, पूरा बूममेंड पोकुर केमुळ आयग़ा.
48 इव सबे पोल्लोना मीट साक्सि मह्निर.
49 ओसो नावा देवुळबाबाल बाताल ईकन इनजि पोल्लो विळ्सिस मतोग़, अद पवित्र जीवातुन नना मियगा लोहतकन. बेचानाह देवुळतग्डा लाव मीवा पोग़ोन रेगो, अचानाह मीट इदे येरुसलेम सहरतगान मन्ह्टु,” इनजोर वेहतोग़.
देवुळि येसुन देवुळदीपतगा ओस्ता
50 पया येसु ओरिन येरुसलेमता एरे मनदनद बेतनि नाटेनेके ओतोग़. ओसि तना कय तेहचि ओरिह्क बर्कतताङ पोल्लोङ वेहतोग़.
51 बर्कतताङ पोल्लोङ वेहतह्पा, ओग़ ओरग्डाहि एग़तोग़. पया देवुळि ओन पोग़ोन देवुळदीपतगा ओता.
52 अस्के कग़यवालोर येसुन दंडुम अरसि, अग्डाह पका गिर्दाते येरुसलेम सहरते मल्स वातोर.
53 पया अद्रमे वेर अमेसा मंदिरतगा अनजि देवुळतुन जोहर कींदुर.