5
पत्रु, याकुब, योहन, वेर येसुना संगे दास्तोर
(मत्याल 4:18-22; मार्कल 1:16-20)
1 उंद दिया इद्रम आता इतेके, येसु गालिल सम्दुर कचुदा दडटगा निचि लोकुरिन देवुळता पोल्लो काग़्हतलाह आस मतोग़. काग़्हनेके ओनाङ केंजलाहि वेल्लाटोरे अगा येसुना सर्ने आतोर.
2 अस्के येसु सम्दुर कचुदगा नितव रेंड ओडान ऊळतोग़. अग्डाह मीन्क पोयवालोर पेसिसि, एतगा तमाङ वदिङ नोग़यलाह आस मतोर.
3 अव ओडान ऊळतस्के, नना इद ओडातगा उदतेके वेरिह्क केंजलाह बेस आयग़ा इनजि, ओग़ उंद ओडातगा तग़्ङतोग़. अद ओडा सिमोन पत्रुना आंदु. तग़्ङिसि “तमो, इद ओडातुन दडटाहि उचुन अबर, एतगा जर्गिह कीम डा,” इनजोर इतोग़. पया अद ओडातुन जर्गिह कीतस्के ओडातगान उदिसि लोकुरिन देवुळता पोल्लो काग़्हता बोटटोग़.
4 ओना काग़्हतनद मारतापया, “ओडातुन वेल्लाह कसा मंदनगा ओसि वदिङ वाटकिर, दट,” इनजोर सिमोनिन इतोग़.
5 इतस्के सिमोन इतोग़, “गूरु! माट नग़्का पिळ्विळ इद एतगा तिपल आतोम, माक उंद वने मीन दोर्को, इंजेक बेगा दोर्कनुङ? अले निमा इह्निन अदिह्क ओडातुन मुनेह ओसि वदिङ वाटिस ऊळकोम,” इतोग़.
6 पया सिमोन ओसो तना तोळतोरु, येसु वेहतप कीतोर, अस्के वेल्लाङे मीन्क वदिनगा एग़्कताङ. मीन्क वेल्लाङ आताह्कु वदिङ अग़यलाह आस मताङ.
7 वदिङ अग़यनुङ बहा इनजोर दुस्रा ओडातगा मतोर तमा तोळतोरिन कय सायाते केयतोर. केयतस्के ओर वासि, रेंड आस ओडानु मीन्कने बर्ति निहतोर. अव ओडाङ बर्ति निंदताह्कु एतगा मुळ्न्देङ-मुळ्न्देङ आंदुङ.
8-9 अचो वेल्लाङ मीन्क पोयतदिन ऊळिसि सिमोन पत्रु ओसो ओना तोळतोर पका बामतोर. बामिसि सिमोन येसुनाङ काल्क अरसि, “सामि, नना पापि मन्कनन आंदन, नीवा एरे मनदलाह नना ओप्पोन!” इनजोर इतोग़.
10 अद्रमे दुस्रा ओडाते मनवालोर सिमोनना संगे मीन्कना दंदा केवालोर जेबेदि इनवानाङ मग़्कु याकुब ओसो योहन, वेर वने “इद बेद्रम आस मनदग़ा रा!” इनजोर बामतोर. अस्के येसु सिमोनिन, “निमा रेयमा रा, इचानाह मीन्क पोयंदिन, इंजेटाहि मन्कलोरिन नयगा तवानिन आयकिन,” इनजोर वेहतोग़.
11 पया ओर तमाङ ओडान सम्दुरता कचुल दडटेके ततोर. ततापया तमाङ ओडान बातान बेग्डाङ अगान विळ्सिसि येसुना संगे अतोर.
येसु मोंडरोगमतोन सव्रे कीस्तोग़
(मत्याल 8:2-4; मार्कल 1:40-44)
12 अद्रमे उंद दिया, येसु उंद नाटेनगा मतोग़. अद नाटेनगा, पूरा मोंडरोगम आतोग़ ओर्वोग़ मन्कल मतोग़, अद्रमतोरिन यहुदिर कळ्वोग़ तासिंदुर. ओग़ येसुन ऊळतस्के ओना मुनेह वासि, नेदगा कपमुळ्न्दिस ओन इद्रम अर्जि कीतोग़: “बाबा, नीवा विचर मतेके नाक सव्रे कीसि नावा कळ्वोग़तुन तेंड पग़यकिन,” इतोग़.
13 इतस्के, “अह इतेके अले, नावा विचर मन्ह्ताये! निमा बेस आम,” इनजोर येसु इतोग़. पया यहुदिरा मोळतोन इटवद नोमळता अडोतुन नोमवा, येसु ओन कय आहच बोयतोग़. अस्के चट्नेन ओना मोंडरोगम मायता.
14 पया येसु ओन इद्रम उकुम ईतोग़ इतेके, “इंजेके मोंडरोगमता कळ्वोग़तुन तेंडनद मोक ईयलाह, मोसानाङ अडोङ मतपु निमा कुदि अनजि ‘बेस आतन’ इनजि बूमयाह्क मात्रम तोहा. बूमयानके अनेके इद पोल्लोतुन बोन्के बार वेहमा. ‘सव्रेम आताह्कु मोक ईतोग़,’ इनजि बूमयाल सबेटोरिन वेहतनोग़, अस्के नियगा मोंडरोगमता कळ्वोग़ मनो आयग़ा, नीकु देवुळतुन मोळ्कलाहि पोलग़ा,” इनजोरे मोळतोन येसु इतोग़.
15 निमा बोने वेहमा बहा इनजोर वेहच आय मति, येसुना पोल्लो मुनेतदिह्कायि एक्वा पोकुर आसोर अता. अदिनेनाह्क येसुना पेग़्के-पेग़्के गोह्डिनाङ-गोह्डिङ ओनाङ केंजलाह ओसो सबे रीतता बेमरतग्डाहि बेस आयलाह ओनगा वांदुर.
16 मति अमेसा देवुळतुन पार्तना कीयना मतेके तना वग़ोग़े, बोग़े इलवा जागातगा अनजि देवुळबाबाना संगे येसु वळ्ह्किंदोग़.
कय्क-काल्क वाग़तोन येसु सव्रे कीस्तोग़
(मत्याल 9:1-8; मार्कल 2:1-12)
17 अद्रमे उंद दिया बाताल आता इतेके, येसु बोनाय लोतगा देवुळता पोल्लो काग़्हचोर मतोग़. ओनाङ केंजवालोरगा उय्तुर परुसिरा तुंगातोर ओसो यहुदिरा सास्त्रमगूरुर उदिस मतोर. वेरु गालिल पटटाङ, यहुदा पटटाङ सबे नाह्कनाहि, अहे येरुसलेम सहरताहि अगा वास मतोर. अद लोतगा येसु ओरिन काग़्हचोर मतोग़. अगा देवुळता लाव येसुसामिनगा मताह्कु रोगमतोरिन बेस कींदोग़.
18 अचोटेन ऊळाट, अगा उय्तुर बोरो, कय्क-काल्क वाग़तोग़ ओर्वोग़ मन्कन कटुल अग़्के ततोर. तचि वेनु येसु सव्रे कीयनोग़ इनजोर लोता लोप्पा ओसि येसुना मुनेह तासलाह ऊळिंदुर.
19 मति लोकुर अग़दुह्क तिळ्ह्प अरनाह निंदिस मतोर. ओन लोप्पा ओयलाह वेरिह्क अग़ दोर्को. अग़ दोर्कवाह्कु वेर पायरिनग्डाह लोता पोग़ोन वेसळतगा तग़्ङतोर. तग़्ङिस वेसळतुन कटुल पोदनाह बेरा बूका कीतोर. अद बूकातग्डाहि ओग़ तेदवोग़ मन्कन कटुल अग़्के मुडा नडुमि येसुना मुनेह रेहतोर.
20 येसु ओरा विस्वसतुन ऊळिसि, ओग़ कय्क-काल्क वाग़तोनु, “अल बाबा, नना नीवाङ कसुर्कना मापि कीय्ह्नन,” इद्रम इतोग़.
21 इतस्के सास्त्रमगूरुर ओसो परुसिर येसु इतदिन केंजिसि, वेर तमतमाये, “ऊळा वेग़ मन्कल उगसे देवुळतन इतपे बह पोंगिह्तोग़! देवुळतुन विळ्सिस इतेके बोग़े पापमतुन मापि कीया पग़वोग़,” इनजोर विचर कीया बोटटोर.
22 ओरा पोटाताङ विचर्किन पुनजि येसु इतोग़, “मीवा पोटाते नावा लोप्पा बाराह्क कुळ्सा वळ्ह्किह्निर रा?
23 वेग़ रोगमतोनु, ‘नीवाङ कसुर्कना मापि आता,’ इह इतेके अल्कोया? बार वेनु ‘तेदिस अन,’ इनदनद अल्कोया?
24 इंजेके नना माने-मन्कना नडुम पुटटोनन मनजि, देवुळतेनाह नयगा इद बूमते पापमतुन मापि कीयनद अदिकर इंका मन्ह्ता इनजि मीक तोहतकन,” इतोग़. इनजि कय्क-काल्क वाग़तोग़ मन्कनु, “नना नीक वेहतलाह आतन, अले! तेदा! नीवा कटुल पोस लोन अन,” इतोग़.
25 इताहे ओग़ बेद कटुदगा अरस मतोग़, अग्डाह सबेटोरा मुनेह पोर्क तेदिसि, देवुळतुन जोहर कीसोर, तना कटुल पोसि लोन अतोग़.
26 अद लोतगा जमा आतोरु पका बामतोर, बामिसि सबेटोर देवुळतुन जोहर कीयलाह आतोर. ओसो ओर पका रेयिसि, “माट कोन नेंड बामनद कबळ ऊळतल अयो!” इनजोर इतोर.
लेवि पेदिरतोग़ सिद्वा एनवानु येसु केयिह्तोग़
(मत्याल 9:9-13; मार्कल 2:14-17)
27 पया नाटेनाहि पेसनेके सिद्वा एतना नाकातगा, सिद्वा एनवाल लेवि पेदिरतोनु येसु ऊळतोग़. ओनगा अनजि, “नावाङ कग़यवानिन आयकिन दय!” इतोग़.
28 इतस्के लेवि तना नवकरतुन विळ्सिसि येसुना संगे अतोग़.
29 पया लेवि येसुन तना लोन केयतोग़, केयिसि ओनेनाह्क उंद बेरा कुळ्प ईतोग़. ओरा संगे वेल्लाटोर लोकुर, सिद्वा एनवालोर ओसो दुस्रोर, उदिस गाटो तिनजोर मतोर.
30 तिनदनदिन ऊळिसि, “मीट एग़्ङ वानाहि, सिद्वा एनवालोर, पाप्यहलोर, इद्रमतोरा संगे उदिस बह तिनदना-उनडना कीयलाह आतिर?” इनजोर परुसिर ओसो तमा सास्त्रमगूरुर, येसुनाङ कग़यवालोरगा वासि कट्ला कीतोर.
31 ओरा वळ्ह्कनदिन केंजिसि येसु ओरिन इद्रम इतोग़, “रोगमलेवोरु डाक्टरनके अनोर, मति रोगम मतोरे तमा दुकतुन पोहतलाह दास्तोर, पुनविरा?
32 अद्रमलेह्काने ‘माट नेह्नोरोम’ इनवालोरिन आयो, मति पापिरिन तमा पापमतुन विळ्सिसि नयके वाटु इनजोरे केयलाह नना वातन,” इतोग़.
उपसता लोप्पा ताल्ह्कमुळ
(मत्याल 9:14-17; मार्कल 2:18-22)
33 पया अगा मतोर बोरो येसुन इद्रम ताल्ह्कलाह आतोर, “योहननाङ कग़यवालोर ऊक-ऊके उपस कीसोर पार्तना कीस्तोर. ओसो परुसिराङ कग़यवालोर वने अद्रमे कीस्तोर. नीवाङ कग़यवालोर बारा ऊक-ऊके तिनदना-उनडना कीसोरेन मन्ह्तोर, इद बहु?” इतोर.
34 अदिन केंजिसि, “मर्मिनस्के मर्म-पेकाल मनदह्पा ओना संगेतोरिन मीट उपस तासकिरा?
35 मति बेस्के कोटुलतोर वासि मर्म-पेकान ओरग्डाहि एग़्पिह कीसि पोस ओयनुर इद्रमता वेला वायग़ा, अद तूकने ओर दुकम आसि तिनोर आयनुर. अद्रमलेह्का नना वेरा संगे मनदह्पा, नावाङ कग़यवालोर उपस केवोर,” इनजि येसु ओरिन इतोग़.
36 इतापया ओरिह्क ओसो पुन्पिह कीयनाङ पीटोने इद्रम वेहतोग़. “इदिन केंजाटु, पाळ्ना गेंदेता अग़ता बूकातगा मेतलाहि, पूना गेंदेतुन रीचिसि ताना तुकळेतुन बोग़े ओल्सोग़. ओल्सतेके पूना गेंदे वने करब आस्ता, ओसो अद पूना गेंदेतुकळा पाळ्ना गेंदेतगा बेस ओप्पो.
37 अद्रमे ओयवदु पूना अंगुर जोमातुन पाळ्ना तोलाजोर्काते बोग़े एंदोग़. एंतेक इसि पूला जोमा ओयिसि बोल्गिह्ता, जोर्का ओसो आङिसि अग़यह्ता, अग़तापया जोमा पूरा वाङिह्ता. ओसो जोर्का वने बूळेम आस्ता.
38 अदिनेनाह्क पूला अंगुर जोमातुन पूना तोला जोर्कातगान वळयना, पूना तोलाजोर्का आङतेके अग़वो आयग़ा.
39 बोग़े मन्कल पाळ्ना अंगुर जोमातुन उटापया, ओन्क पूना अंगुर जोमा विचरे वावो. ओग़ पाळ्नातुने बेसु इन्ह्तोग़,” इनजोर वेहतोग़. नना पूनाङ-पूनाङ पोल्लोङ काग़्हतह्नन, अविस्कनगा पाळ्ना रिवजताङ पोल्लोङ काल्ह्पनायो इनजि येसु इव पुन्पिह कीयनाङ पीटोङ वेहतोग़.