15
पेदल्कना रिवजता लोप्पा काग़्हमुळि
(मार्कल 7:1-23)
1-2 पया उय्तुर परुसिर ओसो सास्त्रमगूरुर येरुसलेम सहरताहि वासि येसुन इतोर, “नीवाङ कग़यवालोर मावाङ पेदल्कना मतद रीत-रिवजतुन बह माळोर? वेरु तिनदना मुने कळ्वोग़ आतदिन एडलाह तमाङ कय्क बाताङ बाराह्क नोग़वोर?” इनजि येसुन कट्ला कीतोर.
3 अस्के येसु ओरिन इतोग़, “मीट पया मीवाङ मुनेताङ रीत-रिवजतुन नोमसोरे देवुळताङ अडोन माळवालेवा बह तपतिर?
4 इद केंजाटु, मीवा उंद तप नना वेहतह्नन. ‘निम नीवा तलोग़-तपेरा मान तासा,’ इद्रम सास्त्रमते देवुळता उकुम वेहतद मन्ह्ता. ओसो ‘बोग़ तना तलोग़-तपेरा मान तासवा ओरा कदर रेहतह्तोग़, ओन हव्कना सिक्सा ईयना,’ इहवने रासतद मन्ह्ता.
5-6 मति मीट मात्रम इह्निर इतेके, बोग़ाय तना तलोग़-तपेरा पिसवग़तुह्कु ईयनविस्किनु देवुळतुह्क वाटटेक बार आयो, ओग़ तलोग़-तपेरिनु मान तासमाकेग़, इद्रम मीट काग़्हतह्निर. इद्रमे मीट मीवाङे रीत-रिवज्क पुटिह कीसोरे देवुळता पोल्लोतुन पाय्पिह कीतिर.
7 एय सोङ केवालोरिर, देवुळि मुने तना कबुरतोग़ यसयाल इनवाल, वेना संगे सास्त्रमते मीवा लोप्पा बराबर वेहच मता:
8 ‘वेर लोकुर तमा तोडटेने नावा मान कीस्तोर,
मति वेर नावा पोग़ोन जीवा वाटोर.
9 वेरा मोळ्कनद वने जोले मन्ह्ता;
नावा सास्त्रम काग़्हतना पोहचि, तमाङे अडोङ काग़्हतह्तोर.’ ”
10 अस्के येसु लोकुरिन तनके केयिसि ओरिन इतोग़, “नना इंजेके बार इह्नन, तेन केंजिसि कग़याटु.
11 कय्क नोग़तेकाय, नोग़वेकाय, बेद मन्कना पोटातगा दास्ता, अद ओनु करब केवो. मति पोटाताहि बेव पोल्लोङ तोडटुह्क पलते पेसिह्ताङ, अवे मन्कन करब कीस्ताङ,” इनजि येसु इतोग़.
12 गय्क मनेके माट कग़यवालोरोम येसुनगा वासि इतोम, “नांगा वेहन्दिन अद पोल्लोत्कु परुसिर पकाय नारज आतोर, तेन निमा पुतिना, गूरु?” इनजि वेहतोर.
13 “नावा देवुळदीपतोग़ बाबाल बेव पोर्कान ओग़्सोग़, अविन ओग़ु कतमे कुळ-कुळ तह्किसीयनोग़. वेर परुसिर अद्रमलेह्काडोरे आंदुर.
14 वेरके सीता केमाटु, वेर अहे मनिर. गुडिरिह्क अग़ तोहवालोर वेर गुडिरे! गुडिह्क गुडि अग़ तोहनेके, ओर इर्वुर आसि बोंदातगा अरयनुर,” इद्रमि माक येसु इतोग़.
15 पया सिमोन पत्रु ओन ताल्ह्कतोग़, “इद कळ्वोग़ता पुन्पिह कीयनद पोल्लोतुन माक तेळियिह कीस वेहा, गूरु,” इतोग़.
16 “मीकाय इंका तेळियोया?
17 बेदिन माट तिह्नल, अदे पोटातगा दास्ता, पया माट पेल्किस पोहतह्नल, इतेके अद करब कीयनव लाग्वाङ विचर्किन पुटिह केवो, इदवने मीक तेळियो?
18 मति माट लाग्वा वळ्ह्कनदु तोडटुह्क पलत पेसिह्ता, अदु पोटालोप्पाडाहि वास्ता. तानेनाह्के मन्कनु देवुळि जेक तासिह्ता.
19 बाराह्क इतेके पोटालोप्पाडाहि पलत वायनवु लाग्वाङ विचर्कु मन्कनु हव्कलाह ओस्ताङ, सिंड्रि-पोह्डेङ कीयलाह ओस्ताङ, कललाह वेहतह्ताङ, जोल बयन वळ्ह्कलाह वेहतह्ताङ, ‘वह्चळ कीम,’ इन्ह्ताङ. इवे आंदुङ तोडटाहि पलत पेसनवु.
20 मन्कनु इद्रमताङ गोटिङ कोनि करब कीस्ताङ. मति कय्क नोग़वाये तिनदना, इदु मन्कनु करब केवो आस्ता.”
यहुदि आयवद आंचाना विस्वस
(मार्कल 7:24-30)
21 गालिल पटटाहि पेसिस पया येसु मावा संगे सोर-सिदोन एरियाते वातोग़.
22 पया ऊळाटु, अद पटटा उंद यहुदि आयवदु कनान जातता आंचाळि येसुनगा वासि केयसोर इता, “ए सामि, दाविद राजाना कूळतोनिन पिसिह केवानिन, नयगा जीवा लोप्पा. नावा मयानु देयम पोसि, तान पट्पट अह्चिह्ता,” इनजोर ओन काल्गडेम अरता.
23 मति येसु केमेन मनजि तान उंद पोल्लोतेला मलोग़. अस्के माट कग़यवालोरोम येसुन इतोम, “मावा पेंडेस वासोर अद कयर कीस्ता, अद अनि,” इतोम.
24 अस्के येसु तान इतोग़, “नावा बाबाल नाकु इस्रयेल देसेमतोराङ लेसताङ गोरेनलेह्काडोरिन विळ्सिसि दुस्रा जाततोरिन साय्ता कीयलाह लोहोग़,” इतोग़.
25 अस्के कंद्रेम आसोर वासि, येसुनाङ काल्क मोळ्कसोरे, अद इता, “नाक साय्ता कीम, सामि!”
26 अस्के येसु तान इतोग़, “पेकोराङ आरिनु लोताङ नय्किह्क वाटिसीयना बेस आयो,” इतोग़. इस्रयेलतोरिनु सव्रे कीयलाह येसुनगा बेद लाव मता, अदु दुस्रा जाततोरिह्कु ओजो, इदिन तोहतलाह ओग़ अह इतोग़.
27 “नीवा पोल्लो निटमे मन्ह्ता, सामि, मति लोतोर तिनदनाङ दळ्यानाहि पोवताङ पेसावार्किन वने लोताङे नय्क तिन्ह्ताङ,” इनजोर अद येसुन इता. यहुदि आयवोर वने यहुदिरा देवुळताहि साय्ता ताल्ह्क पग़यह्तोर इनजि अद आंचाळ इद्रम वळ्ह्कता.
28 “इंगो एलो, नयगा नीवा विस्वस बेचोटा बेह्रा मन्ह्ता! निमा ताल्ह्कतपे नीक आयि,” इनजि येसु तान देय्वाताङ पोल्लोङ वेहचीतोग़. पया अदे गट्काते ताना मयळि सव्रेम आता.
येसु वेल्लाटोरिन सव्रे कीस्तोग़
29 येसु अग्डाहि पेसिस मनजि गालिल सम्दुरकचुल मल्स वासि एवतोग़. पया बेदो उंद गुड्रापोग़ोन अनजि ओग़ काग़्हतलाह उदतोग़.
30 अस्के लोकुर इतेके गोह्डिनाङ गोह्डिङ ओनगा वातोर. वासि वेरु कूटालोर, पंग्ळलोर, गुडिर, मूकालोर इद्रमतोर वेल्लाटोरिन पोस वासि येसुनाङ काल्कनगाने ततोर. ओर सबेटोरिन येसु सव्रे कीसीतोग़.
31 मूकालोर वळ्ह्किह्तोर, कूटालोर ताकिह्तोर, पंग्ळलोर सव्रेम आस्तोर, गुडिर ऊळिह्तोर, तेन ऊळिसि गुम आता मुलु पकाय बामतोर, बामिसि, इस्रयेलतोरा देवुळतुन वेर जोहर कीतोर.
येसु नालुङ अजर्कना मुडुह्क तिहतह्तोग़
(मार्कल 8:1-10)
32 तेना पया माक कग़यवालोरिन केयिस येसु इतोग़, “वेर नयगान मनजि नेटुह्क मूंड दियाङ आतोर. वेरगा तिनदलाह बातय इले, वेरिन नना उपस लोहतेके बेस आयो. अहे लोहतेके वेरु अग़दे कग़्विह्क ऊंगेङ-वेळ्केङ आयनुर. अदिह्के नाक वेरा मान वसिह्ता,” इतोग़.
33 “अलाले, इचो वेल्ला मुडुह्क पंजिह कीयलाह इद पेळ्ह्कल जागाते तिंड माक बेगा दोर्कग़ा?” इनजि माट कग़यवालोर येसुन इतोम.
34 “मियगा बेचोक आरिङ मन्ह्ताङ कोनि?” इनजि येसु माक ताल्ह्कतोग़. “बोरगा, मयगाया? अविय, मयगा एळुङे आरिङ, इचुटाङ उड्लाङ मीन्क मन्ह्ताङ, अचोने,” इनजोर माट इतोम.
35-36 पया मुडुन उद वेहचि अव एळुङ आरिन, उड्लाङ मीन्किन पोसि, देवुळतुन जोहर कीसि, येसु अविनु किळ्ह्तोग़. किळ्ह्चि माक कग़यवालोरिह्क ईतोग़, माट पया मुडुह्क वांटिंदोम.
37 पया लोकुर पंजनाह तितोर. तिनजि बार कीसि पिसतव किळ्केङ एळुङ बेराङ डालाङ निंदताङ.
38 अगा तिनवालोरु कोय्तोरे कोनि नालुङ अजर्क (4000) मतोर, वेराङ आस्कु, पिलाङ-पेकोर ओसो मतोरे.
39 पया “मीट इंजेके लोन अन्ह्टु,” इनजोर मुडुन वेहच, बार कीसि, येसु ओडाते उदिसि मगदान इनदनद एरियाते मावा संगे वेंडिस वातोग़.