6
विस्वसिरा पोग़ोन पापमता बाताले अदिकर इले
1 (लोकुर बेचोन पापमकीसोर अतोर, अचोने देवुळता दया वीळसोर अता इन्जि, नना मीक वेहच मतन.) अह इतेके, देवुळि इंका ओसो पका दया कीयनाह, माट पापम कीसोरेन दाकल इनजोर, नाक इनेरिर.
2-4 मति नना वेहेनन, अद्रम मुर्तिय विचर कीयना आयो! माट सबेटोरल येसु किर्स्तुना संगे जोळेम आतल इनजोर तोहतलाह, ओना पेदिरते एतगा मुळ्न्दिस तेदतल. अस्केने माट ओना संगे डोलतप लेह्का आतल. अहे ओना संगे गुमयातगा मिसतप लेह्का आतल. इद पोल्लोतुन माग़्ङतिरा? ओसो देवुळबाबाल तना बेरा डीसाते, किर्स्तुन हामुरतग्डाहि जीवा अर्हतप लेह्का, माट वने इंजेके पूना पिसमुळते ताक पग़यह्नल. अदिनेनाह्क पापम कीयनदिना लोप्पा ऊळतेके, माट इंजेके डोलतप लेह्का मह्नल. इतेके पापम बेद्रम कीसोरेन मनदकल?
5 ओना हामुरतगा माट ओना संगे कलियतप आतल इतेके, ओना तेग़्कमुळते वने निटमे ओना संगे कलियतप आतल, इद्रम माकु पूना पिसमुळ दोर्किह्ता.
6 मयगा मनदनद पापमता अदिकर बूळेम आयना इनजोरे, मावा पाळ्ना बुदि किर्स्तुना संगे हव्कनागुटातगा डोलता इनजोर पुतल. अह आसि, माट इंजेके मुनेता लेह्का, पापमता कय इळ्न मनवल.
7 बाराह्क इतेके, डोलतोरा पोग़ोन पापमता बातय अदिकर इले.
8 किर्स्तुना संगे डोलतप लेह्का आतल, अदिनेनाह्क इंजेके, किर्स्तुना संगे अमेसा पिससोर दाय्ह्नल इनजोर वने नमिह्नल.
9-10 ओग़ पापमता विचरते ताकवालेवा, उंदिय मल्का डोलतोग़; मति इंजेके ओग़ देवुळता विचर मतप पिसिह्तोग़. अदिह्क किर्स्तु हामुरतग्डाहि जीवा अरतोग़, इंजेके ओग़ ओसो बेस्केन डोलोग़ आयनोग़ इनजोर, माट पुतल. इंजेके ओना पोग़ोन हामुरता बातय अदिकर इले.
11 अद्रमे मीट वने किर्स्तु येसुना संगे जोळेम आताह्कु, पापमता विचरते ताकवा, डोलतप लेह्का आतिर, मति देवुळता विचर मतपु ताकसोर पिसिह्निर, इदिन मीट पुन्ह्टु.
12 अदिनेनाह्क मीवाङ रेंड दियाङ मनदनव मेंदुस्किन, पापम आव्रे कीयि इनजोर, पापमता कयदे एमाटु. अविस्किन पापम आव्रे कीतेके, मीक पापमताङ लालुस्कना लेह्काने कीया पोयग़ा.
13 मीवाङ मेंदुस्किन लाग्वाङ कबस्क कीयलाह, पापमता कयदे विळ्सिस एमाटु. मति पापमतुह्क डोलिसि, माट पूना जीवा दोर्किह कीतोम इनजोर पुन्जि, मीवाङ मेंदुस्किन सेतेमताङ कबस्क कीयलाहि, देवुळता कयदे ईम्ह्टु.
14 इंजेक मोसानाङ अडोङ आयो, मति देवुळता दयाये मीक ताकिह कीस्ता, इदिन सीता कीम्ह्टु. अदिनेनाह्क पापम मीवा माल्काना लेह्का आयनद आयो.
पापमता कय इळ्न मनदनद आयो
15 इंजेके देवुळता दया माक दोर्कताह्कु, मोसानाङ अडोङ वेहतप, माक ताक पोयो. अदिनेनाह्क इंजेके माट पापम कीतेक बाताल आयो इनदा पग़यह्नला? आयो, अद्रम मुर्तिय आयो.
16 इंजेके पापमताङ केंजिसाय, देवुळताङ केंजिसाय, बेदिनाङ केंजिस मीट वरेम आसि मह्निर, अदिना कय इळ्न मनवालोरिर आतिर, इदिन पुनविरा? पापमताङ केंजतेक अचोन, अद मीक देवुळताहि एग़िह कीसि, हामुरतेके ओसीस्ता. देवुळताङ केंजतेक अचोन, अद मीक सेतेमतोर इन्ह्ता.
17-18 मुने मीट पापमता कय इळ्न मतिर, मति इंजेके मीक काग़्हतव देवुळताङ पोल्लोन केंजिसि, अव पोल्लोङ वेहतप, मीट मीवा जीवाताहि ताकिह्निर. ओसो देवुळि मीक पापमता कयदाहि विळ्सिह कीता. इंजेके मीट देवुळता कय इळ्न मन्जि, सेतेमते ताकलाह आतिर, देवुळतुह्क जोहर आयि!
19-20 मीक इव पोल्लोङ तेळियलाह तिपल मताह्कु, नना इद्रम पुन्पिह कीयनव पोल्लोने वेहतह्नन. मुने मीट पापमता कय इळ्न मतिर अस्के, मीक सेतेमता अग़दे ताकलाह विचर वावो. मीवाङ मेंदुस्किन करबताङ विचर्कना कय इळ्न मनदलाह ईतिर, अह कीसि देवुळताङ अडोन देहचोरेन अतिर. मति इंजेके मीट मीवाङ मेंदुस्किन, सेतेमताङ विचर्कना कय इळ्न मनदलाह ईम्ह्टु. अस्के मीट देवुळता पवित्र लोकुरिर आयकिर.
21-22 मुने मीट कीतव पापमताङ कबस्कना मीक बाताले पाय्दा दोर्को. इंजेके अविस्किन सीता कीतेक, मीक लजा वास्ता. अव कबस्कना कमय इतेके हामुरिये. अद बेद्रमता हामुर इतेके, अमेसा देवुळता जीवालेवा मनदनदु. मति इंजेके देवुळि मीक पापमता कयदाहि विळ्सिह कीता. कीसि मीक तनाये कय इळ्न मनवालोर कीता. कीताह्कु, मीक इद पाय्दा दोर्किह्ता: देवुळि मीकु तना पवित्र अग़दे ताकिह कीसि, अमेसाता पिसमुळतेके ओसीस्ता.
23 (अदिह्कु माट पापम कीसोरेन दाकल इन्जि इनमाटु.) बह इतेके, पापमता कमय इतेके, हामुरिये दोर्किह्ता. मति मावा किर्स्तु येसुसामि मयेनाह्क कीतद कबळतेनाह्कु, देवुळि माक तना संगे अमेसा पिसनद दर्मम ईस्ता.