येसु तना बळयि योहनिह्क तोहचीतव पोल्लोङ
इद पुस्तकतुन रासवाल येसुना बळयि योहन आंदोग़. येसु किर्स्तुन विस्वस कीताह्कु, विस्वसिरिन लोकुर तिपल कीसोर मनदह्पा, इद पुस्तक रासमुळ आता. येसुना साक्सि ईताह्कु, योहनिन सिक्सा ईयलाह, सम्दुर नडुम मनदनद तोग़दगा दोहच तासिस मतोर. इद पुस्तकतुन रासनस्के, योहन पका मुय्तोग़ मतोग़.
योहन इद पुस्तकतुन बाराह्क रासतोग़ इतेके, येसु तोहतव पोल्लोना मेटे, तिपलते मनवालोर विस्वसिरा जीवातुन सितुर कीसीयलाहि, तिपलते वने विस्वसतुन विळ्सवा, दीरा पोस मनदलाहि, इद पुस्तकतुन रासतोग़. वायना कालमते आयनव पोल्लोन, योहनिह्कु येसुसामि लेकाते तोहतोग़, ओसो रासिस तासलाह वेहतोग़. इव पोल्लोन अर्विसि, येसु बेचोन डीसातोग़ आंदोग़ इन्जि, माक तेळियिह्ता. ओग़ बूमतोर राजालोरिन ताकिह केवाल आंदोग़ (1:5). ओसो ओग़ जल्दि इद बूमते मल्स वायनोग़. अदिह्कु तिपलते मनवालोर विस्वसिर मन्कलोरिन रेयमाकिर, मति येसुना डीसातुन सीता कीसि, दीरा पोयिर.
वेल्लाङे सेतेमताङ पोल्लोङ इद पुस्तकतगा चित्रना रूपते तोहतव मन्ह्ताङ. बेद्रम इतेके, देयह्कना मुक्याल अहे देवुळता अडम मनवालोर बूमतोर राजालोरु, इद पुस्तकते पका रेय वेसनाह रकस्क इन्जि दिसिह्तोर. ओसो अलग-अलग रंगताङ कोडाङ, पापेङ, गंदाल पिटेङ, दिंचिङ, बोगे आंचाळि, इद्रमलेह्काडाङ चित्राङ दोर्किह्ताङ. बेस्के-बेस्के इवु माक तेळियलाह मुस्किल मन्ह्ताङ. मति इदे मोदुल पोल्लोतुन सीताते तासनदु: येसु किर्स्तुये आक्रिते पूरा गेल्सवाल आंदोग़; अहे ओन विस्वस केवालोर सबेटोरु, ओना गेल्समुळते कलियिह्तोर. आक्रि एवनाह विस्वसतुन विळ्सवा मनवालोरिह्क, देवुळि पोग़ोटा पूना बूमि, ओसो इळ्ता पूना बूमि पंडिसि, अगा तासिह्ता इनजोर, इद पुस्तकतगा रासिस मन्ह्ता. देवुळि कुदि अमेसा-अमेसातुह्कु अगा ओरा ऐंगे मनदग़ा.
1
इद पुस्तकताङ पोल्लोङ
1 इंजेके जल्दि आयनव पोल्लोन, माक माळवालोरिह्क तोहचीम इनजोर, देवुळि अव पोल्लोन, येसु किर्स्तुह्क तोहच मता. येसु किर्स्तु, तना देवतुलतुन लोहचि, अविस्किन नाक तोहतोग़. नना योहननन येसुना सेवकनन, इंजेके अव पोल्लोन रासलाह आतन.
2 नना ऊळतव सबेटविन रासतन. नना रासतव पोल्लोङ देवुळताङ आंदुङ. इव पोल्लोङ येसु किर्स्तुना लोप्पा साक्सि ईस्ताङ.
3 इव पोल्लोङ करल आयनद कगो एवयलाह आता. अदिनेनाह्क इव पोल्लोन, विस्वसिरा मुल केंजनाह, जोरते अर्ववाल मन्कल देय्वातोग़! अहे अर्वनदिन केंजिसि, इगा रासतव पोल्लोङ वेहतप ताकवालोर मन्कलोर वने देय्वातोरु.
एळुङ सहर्कनोर विस्वसिरिह्क, येसु रासलाह वेहतह्तोग़
4-5 नना योहननन, आसिया पटटाङ एळुङ सहर्कना विस्वसिरा मुडेनाह्क, इव पोल्लोङ रासलाह आतन: मुनेताह अमेसा मतदु, इंजेके वने मनदनदु, ओसोवने वायनद देवुळि, ओसो तना राजकुर्सता मुनेह मनदनव, तानग्डाङ एळुङ जीवाङ; ओसो देवुळतेनाह्क बर्वस लायकता साक्सि एवाल, हामुरताहि जीवा अरवालोरग्डाहि मुनेतोग़, अहे बूमतोर राजालोरिन ताकिह केवाल येसु किर्स्तु, वेरु मीक देय्वा ईयिर, सुकम ईयिर. येसु किर्स्तु माक जीवा कीतोग़, ओसो तना नेतुर पोहचि, माक मावा पापमताहि विळ्सिह कीतोग़.
6 कीसि माक तना राजेमतोर कीतोग़, ओसो तना देवुळबाबाना बूमयालोर कीतोग़. अदिनेनाह्क मान ओसो राजेमि, अमेसा-अमेसातुह्क ओनाय मनि! आमेन.
7 ऊळाट, ओग़ मोयुलते वायलाह आतोग़; सबेटोर ओन ऊळनुर. ओन मोल्लाङ कोटिस हव्कतोर इंका ऊळनुर. दुनियाताङ सबे जातिनोर, ओनेनाह्क अर्युल पासोर केयनुर. इंगो आमेन.
8 मुनेताह अमेसा मतदु, इंजेके वने मनदनदु, ओसोवने वायनद, बेरा डीसाता देवुळि इद्रम इन्ह्ता: “सबेटविना मोदुल वने ननाये, सबेटविना कोड वने ननाये” इनजोर सामि इन्ह्ता.
पतमुस तोग़दगा योहन लेका ऊळिह्तोग़
9 नना योहननन, मीवा ऐंगेटोग़ विस्वसिनन. माट ऐंगेन येसु किर्स्तुना राजेमतोर मन्कलोरल आतल. ओनेनाह्क माट ऐंगे तिपल आय्ह्नल. ओसो ऐंगेन तिपलते दीरा पोस मह्नल. नना देवुळता पोल्लो ओसो येसुना लोप्पा साक्सि वेहताह्कु, नाक सिक्सा ईयलाह, सम्दुर नडुम मनदनद पतमुस इनदनद तोग़दगा तासिस मतोर.
10 अगा मनदह्पा, सामिना दिया ऐतारमते, देवुळता जीवाता दळ्म नयगा अरता. अस्के नावा पेग़्केडेके अकुम नेकतप लेह्का, जोरते वळ्ह्कनद केंजतन.
11 अद लेङ नाक इद्रम इता: “निमा ऊळनविन पुस्तकतगा रासिसि, एळुङ सहर्कना विस्वसिरा मुडुह्क लोहचीम: इतेके इपिसुस सहर, सुमुरना सहर, पिरगमुन सहर, तुवातिरा सहर, सरदिस सहर, पिलदिलपिया सहर, ओसो लोदिकिया सहर, इव सहर्कु,” इनजोर इता.
12 इतस्के नाक इद्रम वेहवाल बोग़ इनजोर, मिळ्न्दिस ऊळतन. अस्के बंगरताङ एळुङ चिमलि गुटाङ दिसताङ.
13 अविस्कना नडुमि माने-मन्कना नडुम पुटटोना लेह्का, ओर्वोग़ मन्कल दिसतोग़; ओना गेंदे काल्कनगा एवनाह, नेल बोयिस मता. अर्युलतगा बंगरता नूदे अर्हतद, दुपट दोहच मतोग़.
14 ओनाङ केल्कु कोंगाबूलाना लेह्कान, ओसोय पांड्रि मताङ; ओनाङ कोंडाङ किस मळ्गना लेह्काडाङ मताङ.
15 ओनाङ नला काल्कु, कोल्मतगा वाटटद इतुळता लेह्कान मिळ्स्किंदुङ. ओना लेङ गोदोग़ उसतप लेह्का जोरते नेकिंदु.
16 ओग़ तना तिनळ कयदे, एळुङ उकाङ पोस मतोग़. ओना तोडटग्डाहि रेंड बाजेङ वाय्व मनदनद, ओळतद तल्वर कसेग़ पेसिस मता. ओना मोकमि नेक निता पोळ्दलेह्का दींचिंदु.
17 नना ओन ऊळिसि, मेग़्यतप लेह्कान ओनाङ काल्कनगा अरतन. अरतस्के ओग़ नावा पोग़ोन, तना तिनळ कय तासिस इद्रम इतोग़: “रेयमा! ननाय सुरुतोनन, ननाय मारेंगातोनन;
18 ओसो जीवात मनवानन. नना डोलिस मतन, मति ऊळा! इंजेके अमेसा-अमेसातुह्क जीवात मह्नन. हानादीपताङ तालम कय्कु नयगाने मन्ह्ताङ, (ताना अग़दुन तेग़यिसि,) हातोरिन तेग़्किह कीयनद अदिकर नयगान मन्ह्ता.
19 अदिनेनाह्क बेव पोल्लोङ निमा ऊळिह्निन, बेव आसोर मन्ह्ताङ, ओसो बेव पया आयनव मन्ह्ताङ, अविस्किन इंका रासा.
20 नावा तिनळ कयदे एळुङ उकानु ऊळतिन, ओसो बंगरताङ एळुङ चिमलि गुटान ऊळतिन. अविस्कनगा उंद पोल्लो मकतद मन्ह्ता. अद इद्रमि: एळुङ उकाङ इतेक एळुङ सहर्कना विस्वसिरा मुडुन ऊळसोर मनदनव देवतुल्कु आंदुङ. एळुङ चिमलि गुटाङ इतेके, एळुङ सहर्कना विस्वसिरा मुडाङ सीनाङ आंदुङ,” इनजोर इतोग़.