15
आक्रिताङ एळुङ पीळाङ पोयतव देवतुल्कु
1 पया देवुळदीपतगा ओसो उंद सीना ऊळतन. अद बेरा, बामनाह लेह्काडा सीना मता. अद इद्रमि: एळुङ बेराङ पीळान पोसि, एळुङ देवतुल्क देवुळदीपतगा मताङ. इव आक्रिताङ पीळाङ आंदुङ; इव पीळाङ आतापया, देवुळता ओङ रेगग़ा.
2 ओसो सम्दुरता लेह्काडदिन ऊळतन. अद अदमता लेह्का, ओसो किस काल्ह्पतप लेह्का दिसिंदु. बोर मन्कलोर मुनेता रकसता बोमातुन मोळ्कवा, तमाङ मेंदुस्कनगा ताना पेदिरता लेकातुन रासवा, तान गेल्सिस मतोर, ओर अद सम्दुरता दडटगा निच मतद ऊळतन. ओर देवुळि ईतव जेतुर्क पोस निच मतोर.
3 ओर देवुळता सेवातोग़ मोसा मुय्तोना पाटातुन (तान गोरेपिलाता पाटा वने इन्ह्तोर), इद्रम वाग़तोर:
“ए बेरा डीसाता, सामि देवुळतिन!
नीवाङ कबस्क बेराङ, बामिह कीयनव मन्ह्ताङ!
ए सबे जातिनोरा राजानिन!
निमा बेदाय कीतेके, निटमे कीय्ह्निन, सेतेमते कीय्ह्निन.
4 ए सामिनिन! सिरप निमान पवित्रतोनिन!
अदिनेनाह्क नीक कतमतोर रेयिस ताकनुर.
नीवा पेदिर पोस नीक कतमतोर मान ईयनुर.
नीवा सेतेमताङ कबस्किन सबेटोर ऊळतोर.
अदिनेनाह्क सबे जातिनोर नीवा मुनेह वासि मोळ्कनुर,”
इनजोर वाग़तोर.
5 पया देवुळदीपतगा, देवुळि तना लोकुरा नडुम मनदनदिना साक्सि तोहतनद रावुळि मता. ताना लोप्पा पवित्र गूडटुन तेग़यतदिन, नना ऊळतन.
6 बेव एळुङ देवतुल्क बूमतगा एळुङ पीळान वळ्सीयनव मताङ, अवे पवित्र गूडटाहि पेसनदिन ऊळतन. अव उहच मतव गेंदेङ पूरा गुलगुल मताङ, पूरा वेडिस मताङ, मांजसोर मताङ. अव देवतुल्क, तमाङ अर्युस्कनगा बंगरताङ पाटाङ दोहच मताङ.
7 पया नालुङ दिंचिनग्डाह उंद बह कीता इतेके, अव एळुङ देवतुल्किह्क, बंगरताङ एळुङ कस्लाङ ईता. अव कस्लाङ अमेसा-अमेसा जीवात मनदनद देवुळता ओङते निंदिस मताङ.
8 देवुळता डीसा ओसो लावु, पूरा रावुळतुन पोयाते निहता. एळुङ देवतुल्क पोस मतव एळुङ बेराङ पीळाङ मारनाह, बोरे रावुळतगा ओळिय पग़वोर.