19
गोरेपिलाताङ मर्मिङ
1 इव सबे आतापया, पोग़ोन देवुळदीपतगा वेल्लाय मुलु रोदा पोयतना लेह्का, रोदा पोयतनद केंजतन. ओर इद्रम इतोर:
“हलेलुया! मावा देवुळिये मन्कलोरिन पिसिह कीयनदु;
अदे मान ईयना लायकता आंदु. अदे लावता देवुळि.
2 अद सेतेमते नेयम कीस्ता.
इतेके अद बेरा बोगे आंचाळि, तना सिंड्रि कबळते, पूरा बूमतोरिन करब कीस मता.
देवुळतुन माळवालोरिन अद आंचाळ हव्कताह्कु,
देवुळि ओरेनाह्क इंजेके तान्क सिक्सा ईसि बद्ला एता,”
इनजोर रोदा पोयतोर.
3 ओर ओसो उंद मल्का इतोर,
“हलेलुया! अद सहर कर्वनद उंडुलि, अमेसा-अमेसा पेससोरेन मनदग़ा,”
इनजोर रोदा पोयतोर.
4 वीसा नालवुर पेदल्कु, ओसो नालुङ आस जीवात मनदनव दिंचिङ, “आमेन, हलेलुया” इनजोर, राजकुर्सतगा उदिस मतद देवुळतुन, दंडुम अर्सि मोळ्कतोर.
5 अस्के राजकुर्सतग्डाहि उंद लेङ इद्रम इता:
“ए देवुळतुन माळवालोरिर! तान्क रेयवालोर उड्लोरिर, बेरोरिर!
मावा देवुळतुन जोहर कीम्ह्टु,”
इनजोर इता.
6 इतस्के पया वेल्लाटोर लोकुर रोदा पोयतना लेह्काडा लेङ केंजतन. एताङ राल्क नेकना लेह्का, ओसो पका गुळ्न्जना लेह्का, अद केंज वांदु. अद लेङ इद्रम इंदु:
“हलेलुया! सामि, मावा देवुळि,
बेरा डीसाता, राजेम ताकिह कीस्ता.
7 माट गिर्दा-वेळ्का आयिङ! ताना जोहर कीयिङ!
ऊळाट, गोरेपिलाताङ मर्मिङ एवताङ.
मर्मिनेनाह्क मर्मपिला तयर आता.
8 तान्क उहतलाह गुलगुल मनदनद,
मिळ्स्कनद, डागिललेवद गेंदे दोर्कता.”
इद गुलगुल मनदनद गेंदे इतेके, देवुळता मन्कलोर कीतव सेतेमताङ कबस्क आंदुङ.
9 पया अद देवतुल नाक इता, “इद्रम रासा: गोरेपिलाता मर्म-कुळ्पतुह्क केयतोरु, ओर देय्वातोरु,” इनजोर इता. ओसो, “इव पोल्लोङ देवुळताङ सेतेम पोल्लोङ आंदुङ,” इनजोर इता.
10 इतस्के नना अद देवतुलतुन दंडुम अरयलाह, तानाङ काल्क अरतन; मति अद इता, “नाक दंडुम अरमा! नीवा लेह्कान, नीवा ऐंगेटोर विस्वसिरा लेह्कान, नना वने येसुनेनाह्क साक्सि ईसोर, देवुळतुन माळवानने! देवुळतुने मोळ्का. बह इतेके येसुना साक्सि ईयनदे, देवुळता सेतेम कबुर वेहतनाह आस्ता,” इनजोर इता.
किर्स्तु पांड्रि कोडातगा उदिस, लळेम आस्तोग़
11 पया देवुळदीप पङ्ने आस मतद ऊळतन. अगा उंद पांड्रि कोडा मता. ताना पोग़ोन ओर्वोग़ उदिस मतोग़. ओना पेदिर बर्वस लायकतोग़, सेतेमतोग़. ओग़ सेतेमते नेयम कीसि, लळय कीस्तोग़.
12 ओनाङ कोंडाङ किस मळ्गना लेह्काडाङ मताङ. ओना तलातगा वेल्लाङे राजटोपिङ मताङ. ओना पेदिर वने रासिस मता. ओन विळ्सिस, अद पेदिरतुन बोग़े दुस्रोग़ मन्कल पुनोग़.
13 ओग़ नेतुर इल्ह्किस मतद गेंदे उहचि मतोग़. ओन देवुळता पोल्लो इनजोर इंदुर.
14 देवुळदीपतोर सीपय्क पांड्रि कोडाना पोग़ोन उदिसि, ओना पयाह पयाह अंदुर. ओर उहच मतव गेंदेङ गुलगुल मताङ, पांड्रि मताङ, डागिललेवा मताङ.
15 तना विरुदताङ जातिनोर सबेटोरिन कोटलाहि, ओना तोडटाहि ओळतद तल्वर कसेग़ पेसिस मंदु. ओग़ तना राजडुडि पोसि, ओरा पोग़ोन राजेम कीयनोग़. ओरिन बेरा डीसाता देवुळता ओङता बोंदातगा वाटिसीयनोग़; अगा ओरिन अंगुर जोमा पेग़तपु, ओग़ ओरिन तनाङ काल्कने विह्कनोग़.
16 ओना गेंदेतगा ओसो कोग़्कतगा तना पेदिर रासिस मता. अद इद्रम मता: “सबेटोर राजालोरा राजाल, सामिरा सामि” इनजोर मता.
17 अचोटेने उंद देवतुल पोळ्दतगा निच मतद ऊळतन: अद पोग़ोन पग़ियनव सबे गंदाल पिटेन जोरते इद्रम इता: “अलेट! देवुळि तयर कीतद कुळ्प तिनदलाह, जमा आम्ह्टु! अगा मीक पकाय तिनदलाह दोर्किह्ता.
18 राजालोर, साय्बालोर, सीपय्कु, कोडाङ ओसो अविस्कना पोग़ोन उदिस पूंडवालोर, ओर्युलतोर, ओर्युल आयवोर, साव्कर्क, उड्लोर, बेरोर, सबेटोर मन्कलोराङ अविङ तिनदकिर,” इनजोर इता.
19 इतस्के नना ऊळतन: अद सम्दुरतग्डा रकस, बूमतग्डोर राजालोर, ओराङ सबेटोर सीपय्क जमा आस मतोर. ओरु पांड्रि कोडाता पोग़ोन उदतोना, ओसो ओनाङ सीपय्कना संगे लळय कीयलाह, जमा आस मतोर.
रकस ओसो जोल कबुरतदु बूळेम आस्ताङ
20 आतस्के, पया पांड्रि कोडातगा उदतोग़ु अद रकसतुन पोयतोग़. जोल कबुर वेहतनद बूमतग्डा रकसतुन वने पोयतोग़. पोसि, रेंड आसि रकस्किनु, मळ्गनद किसबटटगा, जीवा अग़्केन वाटिसीतोग़. (बूमतग्डा रकस इतेके, मुनेता रकसता मुनेह, बामनाङ सीनाङ तोहन्दु; तोहचि मुनेता रकसता सीना रासतोरिनु, ताना बोमातुन मोळ्कतोरिनु, नाळेह कींदु.)
21 कोडाता पोग़ोन उदिस मतोग़ु, रकसता तोळतोरिन, तना तोडटाहि पेसतद तल्वर कसेटे हव्कतोग़. पया सबे गंदाल पिटेङ ओराङ अविन, पोटाङ पंजनाह तिताङ.