49
Yakuba ka mɛn fɔ a satɔla la
1 Yakuba ka a dencɛilu kili ko:
«Ai ye na ai ladɛn n tɔrɔfɛ. N ye a fɛ ka koilu lase ai ma, mɛnilu kɛtɔ alu la sini natɔ kɔnin.
2 N dencɛilu, ai ye na ai tolo malɔ nde ai fa Yakuba la,
a ye fola n ma ko Isirayɛli.
3 Rubɛn, ile le n dencɛ fɔlɔ ri.
I fɔlɔ le kɛra n na cɛya ni n na fanka fɔlɔ ri.
Bonya ni sebaaya ye i bolo ka tamin i doocɛilu kan,
4 kɔni i ye ikomin ji ba woyetɔ, mɛn ti se a jɛrɛ mirala.
I ti nala kɛla bonkun ri fewu, baa i ra i la i fa la lafen kan ka si a muso fɛ.
A ka a la n na lafen kan ka a manɔɔ.
5 Simeyɔn ni Lebi miriya ye ko kelen de ri.
Alu ka ie la fanmuruilu ta ka wa tiɲannin kɛ.
6 Alu wa kuma gbundu rɔ, n tɛ sɔn ka n sen bila wo rɔ.
Alu wa ladɛn kɛ, n di n ban wala,
baa alu mɔnɛra ka mɔɔilu faa.
Alu juuyara ka nisilu sen fasailu tɛɛ.
7 Alla ye tɔrɔya la alu kan alu la mɔnɛ wo kosɔn, baa alu la mɔnɛ ka juu,
a ni alu la ɲenikɛjuuya wo kosɔn, baa alu la ɲenikɛjuuya ka alu kɛ hinabaliilu le ri.
N di alu bɔnsɔn datala Yakuba bɔnsɔn na jamana rɔ.
N di alu lajɛnsɛn Isirayɛlika la jamana yɔrɔ bɛɛ rɔ.
8 Yahuda, i badenmailu ri ile le tando.
I ri se i juuilu la.
I faludenmailu ri alu majii i kɔrɔ.
9 Yahuda ye ikomin yara kanberen de,
mɛn di wa sobo faa ka wo damun,
ka na i rasɔmɔn ka i la.
Yon di a lawuli?
10 Faamaya gbeleke tɛ bɔ Yahuda bolo.
Mansaya gbeleke ri to a bɔnsɔn bolo
fo mansaya tii wa na,
dunuɲa bɛɛ ri i majii mɛn kɔrɔ.
11 A ri a la fali sidi rɛsɛnju la,
ka a la faliden sidi rɛsɛnju ɲuma ɲuma la.
A ri a la faanin ko rɛsɛnji la,
ka a la durukiba ko rɛsɛnji la, mɛn wulenni ikomin jeli.
12 A ri rɛsɛnji min fo ka a ɲailu lafin.
A ri nɔnɔ min fo ka a ɲi gbɛ.
13 Sabulɔn di i sii kɔɔji da la.
Kulunbailu lɔ diya ri kɛ a wara ri.
A la duu ri wa foo Sidɔn so fan fɛ.
14 Isakari ye ikomin fali, fanka ba ye mɛn na.
A ri a la a la donin bɔrɔilu tɛma.
15 Ni a ka a yen tuma mɛn na
ko jamana wo ka ɲi,
ko yɔrɔ wo duman kosɛbɛ,
a ri a kɔ rabɛn donin ta kanma
ka kɛ jɔn di ka diyagboya baara kɛ.
16 Daan di a sii a la mɔɔilu kun na ka alu la kiti tɛɛ,
a ri kɛ ikomin Isirayɛli kabila tɔilu fanan.
17 Daan ye ikomin sa, mɛn lani sila dafɛ,
ikomin fɔnfɔnni, mɛn ye sila misɛnilu la.
A ri so cin a sen ma,
ka so tii labe a kɔ kan.»
18 Yakuba kan ko: «Ɛɛ Allabatala, n ye i makɔnɔla, i ye n kisi.»
19 A kan ko:
«Benkanninnailu ri na be Kadi kan,
kɔni a ri alu gbɛn ka alu kɔsaran kojuuya.
20 Asɛri ri suman duman sɔrɔn;
a ri damunun fen duman di mansailu ma.
21 Nefitali a la fɛrɛnin ikomin minanmuso, mɛn ye a jɛrɛ ma,
mɛn ye den ɲumailu sɔrɔnna a jɛrɛ ma.
22 Yusufu ye ikomin jiri mɛn ye a denna kosɛbɛ,
jiri mɛn lɔni kɔ dafɛ,
mɛn bolo ye janyanna foo ka tamin dandan kun na.
23 Kalabiɲetiilu wulira a kanma kojuuya.
Alu ka biɲɛilu lafili a ma ka a tɔrɔ kosɛbɛ,
24 kɔni Yusufu la kala ma yɛrɛyɛrɛ.
A boloilu ka fanka sɔrɔn Alla Sebɛɛtii bolo,
mɛn ye Yakuba dɛmɛnna.
Wo le ye mɔɔ latankala le ri,
mɛn ye Isirayɛli lakandala,
mɛn barakani ikomin farakolo.
25 I fa Maari ye i dɛmɛnna.
Alla Sebɛɛtii ye ɲumaya kɛla i yɛ.
A ri fen ɲumailu di i ma ka bɔ san ma.
A ri ji di i ma ka bɔ duu kɔrɔ.
A ri i denilu ni i la kolofenilu siyaya.
26 Fen ɲumailu ye bɔla koyinkɛ kɔrɔilu la,
nanfuluilu ye bɔla fɔlɔ tindilu la,
kɔni Alla ka ɲumaya mɛnilu kɛ i fa yɛ, woilu ka bon woilu bɛɛ ri.
Alla ye wo ɲɔɔn kɛ Yusufu yɛ.
Alla ye a kɛ, ɲumaya woilu ye mɛn Yusufu fɛ,
mɛn ɲenematɔmɔnni ka bɔ a badenmailu rɔ.
27 Bɛniyaminu fadima ikomin wara.
Sɔɔma a ye sobo mirala ka do damun.
Wura la, a ri a tɔ ratala.»
28 Nba, Isirayɛli kabila tan ni fila le woilu ri. Alu fa duwara alu yɛ tuma mɛn na, a ka kuma woilu fɔ. A duwara alu kelen kelenna bɛɛ ye, bɛɛ ni a la duwa.
Yakuba la saya
29 Nba, Yakuba ka a fɔ a dencɛilu yɛ ko: «N satɔla le ka la n benbailu kan. Ni n sara, ai ye wa n suu don n benbailu dafɛ falan na, falan mɛn ye Hɛtika Efurɔn na sɛnɛ rɔ.
30 Falan wo ye Makipela, Mamere telebɔ fan fɛ Kanaan bɔnsɔn na jamana rɔ. N benba Iburahima ka dinkira wo le san Hɛtika Efurɔn ma, ka a kɛ a la suu don diya ri.
31 N benba Iburahima ni a muso n ma Saran suu don diya ye ye le. N fa Isiyaka ni a muso n na Rebeka fanan suu don diya ye ye le. N ka Leya suu don ye le fanan.
32 Duu wo ni falan bɛɛ sanda Hɛtika de ma.»
33 Nba, Yakuba banni kumala, a ka a la a la lafen kan ka sa, ka la a benbailu kan.