6
Alla ka adamadenilu halaki alu la kojuu kosɔn
1 Nba, mɔɔilu tɛrɛ ye siyaya la duukolo kan tuma mɛn na, alu ka denmusoilu sɔrɔn.
2 Wo kɛni, Alla dencɛilu ka alu ɲa lɔ denmuso woilu rɔ ka a yen ko woilu kɛɲi kosɛbɛ. Mɛnilu diyara alu yɛ, alu ka woilu ta ka alu kɛ alu musoilu ri.
3 Wo le rɔ, Allabatala kan ko: «N ka n na ni don mɔɔilu rɔ, kɔni n tɛ sɔn a ye mɛn alu rɔ foo habadan, baa alu tɛ foyi ri fo fari banku, fen banta kɔnin. Alu si san bɛɛ ladɛnni tɛ tamin san kɛmɛ ni san muwan kan.»
4 Alla dencɛilu sera mɔɔilu denmusoilu ma tuma mɛn na, woilu ka kɔnɔ ta ka deni sɔrɔn. Den woilu kɛra mɔɔilu jan belebele ri, mɛnilu tɔɔ ko Nefilimu. Kɛbi waati taminni, woilu kɛra cɛ fadiyani ri. Alu tɔɔilu bɔra kosɛbɛ.
5 Allabatala ka a yen ko adamadenilu kɔnɔrɔjuuya ra wara dunuɲa rɔ. A ka a yen ko fen si tɔ adamadenilu jusu rɔ fo miriyajuu tuma bɛɛ.
6 Allabatala nimisara adamadenilu dan ko rɔ duukolo kan. A sewani tun tɛ.
7 A kan ko: «N da mɔɔ mɛnilu dan, n di woilu halaki ka alu bɔ duukolo kan. Adamadenilu wo, kolofenilu wo, waa rɔ soboilu wo, kɔnɔilu wo, ni nimafen misɛn mɛnilu ye taamala duu ma, n di wo bɛɛ halaki ka a masɔrɔn n da nimisa alu dan ko rɔ.»
8 Kɔni Nuhan diyara Allabatala yɛ.
9 Nuhan bɔnsɔn de ɲin di. Nuhan de tɛrɛ mɔɔ telenni ri. A kelen de ma kojuu kɛ a la waati rɔ. A mɛnda Alla la dɛn dɔ.
10 A ka dencɛ sawa sɔrɔn, Sɛmu ni Kamu ni Jafɛti.
11 Wo tuma, juuya warani fan bɛɛ Alla ɲakɔrɔ duukolo kan. Mɔɔilu karagbɛlɛman tɛrɛ i ɲɔɔn na fan bɛɛ rɔ.
12 Alla ka a yen ko duukolo ra tiɲan juuya la. Mɔɔ bɛɛ kewali ra juuya foo ka a dan natamin.
13 Wo rɔ, Alla ka a fɔ Nuhan yɛ ko: «N da a latɛɛ ko mɔɔilu bɛɛ ri halaki n bolo, baa karagbɛlɛya ra jɛnsɛn alu bolo foo ka duukolo fa. N kɛtɔ alu bɛɛ ni duukolo halakila i ɲɔɔn fɛ le.
14 Wa jiri ɲuma ɲinin ka kulunba rabɛn i jɛrɛ yɛ. I ye a kɔndɔ ratala ka a kɛ bonkɔndɔilu ri, ka ban ka a kɔndɔla ni a kɔkanna bɛɛ mamun tulubɔ fasani la.
15 I ye a rabɛnna ɲa mɛn ma, wo le ye ɲin di. I ye a janyan kɛ nɔnkɔn ɲa kɛmɛ sawa ri, ka a kɔndɔ kɛ nɔnkɔn ɲa biloolu ri, ka a lɔ kɛ nɔnkɔn ɲa bisawa ri.
16 I ye fɔɲɔ don yɔrɔ bɔ a san fɛ, ka wo lɔ kɛ nɔnkɔn ɲa kelen di. I ye donda bɔ kulunba fan kelen fɛ, ka kulunba kɛ ikomin sankaso, ka a kɛ duuma bon ni tɛma bon ni san ma bon di.
17 N jɛrɛ kɛtɔ ji dunba lanala duu kan. Fen fen ye a nilakilila san kɔrɔ, wo bɛɛ ri halaki. Fen bɛɛ ri faa duu kan.
18 Kɔni n di teriya ta i yɛ ka i kisi. I ri don kulunba kɔndɔ, i ni i dencɛilu, a ni i muso ni i dencɛilu musoilu.
19 I ye nimafen su bɛɛ fila fila ladon i fɛ kulunba kɔndɔ, cɛman ni musoman, sa woilu ri to nimaya rɔ.
20 Kɔnɔilu wo, kolofenilu wo, waa rɔ soboilu wo, ni nimafen misɛn mɛnilu ye taamala duu ma, a su bɛɛ fila fila ri na i ma sa alu ri to nimaya rɔ.
21 I ye damunun fen su bɛɛ do ta ka a lamara i fɛ kulunba kɔndɔ. Wo ri kɛ balo ri ile ni woilu yɛ.»
22 Nba, Alla ka Nuhan jamari ko ko la, Nuhan ka wo bɛɛ kɛ iko a fɔra a yɛ ɲa mɛn ma.