15
Saa tununni le
1 Nisɔnkɔmiralailu ni kojuukɛla gbɛrɛilu tɛrɛ ye nala ka ie tolo malɔ Isa la.
2 Farisilu ni sariya karanmɔɔilu ka wo yen ka a fɔ ie da kɔrɔ Isa ma ko: «A ragbɛ! Cɛ wo ye kojuukɛlailu ramirala, fo ka damunun kɛ fɛ kelen dɔ.»
3 Wo rɔ, Isa ka sanda la ie yɛ ko:
4 «Ni saa kɛmɛ kɛra mɔɔ kelen bolo ai rɔ yan, saa kelen wa tunun, yon tɛ sɔn ka saa bikɔnɔndɔ ni kɔnɔndɔ to waa rɔ, ka wa saa tununni kelen pe ɲinin diya haan ka a yen?
5 A wa saa tununni wo yen, a ri sewa. A ri a ta ka a la a kan ma ka na a ri.
6 A wa se a la lu ma, a ri a fɔ a terilu ni a siiɲɔɔnilu yɛ ko: ‹An ye sewa. N na saa tununni tɛrɛ, kɔni n da a ɲinin ka a yen.›
7 «A ragbɛ! Wo ɲa kelen ma, kojuukɛla kelen pe wa tubi, wo ye sewa ko ba le ri Alla wara. Wo sewa ka bon paaon, ka tamin telenba mɔɔ bikɔnɔndɔ ni kɔnɔndɔ ta kan, mɛnilu mako tɛ tubi ko ma.»
Muso la wodigbɛ tununni le
8 Isa ko: «Ni wodigbɛ tan kɛra muso do bolo, kelen wa tunun a ma bon kɔndɔ, a ri nfen kɛ? A tɛ wuli wa, ka fitina lamɛlɛn ka bon kɔndɔ firan, ka wodi wo ɲinin a ɲa jɛrɛ jɛrɛ ma wa, haan ka a yen?
9 Ni a ka a yen, a ri a terilu kili, a ni a siiɲɔɔnilu, ka a fɔ ie yɛ ko: ‹An ye sewa. N da n na wodigbɛ yen, mɛn tununni tɛrɛ n ma.›»
10 Isa ko: «A ragbɛ! Wo ɲa kelen ma, kojuukɛla kelen pe wa tubi, Alla la mɛlɛkailu ri sewa.»
Den kanberen fila
11 Isa fanan ko: «Dencɛ fila tɛrɛ ye cɛ do bolo.
12 Lon do rɔ, den doomanni ka a fɔ a fa yɛ ko: ‹N fa, i ye i la nanfulu bɛɛ rafara, ka n ta fan di n ma sisen.› Cɛ wo ka a la nanfulu rafara a den fila tɛma, ka a dencɛ doomanni ta fan di a ma.
13 Wo cɛ tun ma mɛn bakɛ, den wo ka a bolofen bɛɛ ta ka wa taama rɔ jamana jan do rɔ. A se mɛn kɛni ye, a ma foyi kɛ fo manamanaya. A tora wo la haan ka a bolofen bɛɛ tiɲan.
14 «Nba, kɔfɛ, kɔnkɔ fitina donda jamana wo rɔ, ka a tɛrɛn kanberen na wodi ra ban fewu. A la damunun dɛsɛra. Wo gbɛlɛyara a ma kosɛbɛ.
15 Wo rɔ, a ka baara ɲinin ye mɔɔ do fɛ. Wo ka a ta ka a lawa waa rɔ a la kosɛilu gbɛngbɛn diya.
16 Ka a to waa rɔ ye, kɔnkɔ gbara a la kojuuya, haan ka kosɛilu la damunun fen sɔsɔ fara damun loo bila a la. Hali wo, mɔɔ si ma a sɔ damunun dɔ.
17 «Kɔfɛ sa, a ka imiri ka hankili sɔrɔn. A kan ko: ‹Baaraden siyaman ye n fa bolo. Woilu bɛɛ ye damunun sɔrɔnna tuma bɛɛ, haan ka fa ka a tɔ to. Kɔni nde faatɔ le kɔnkɔ bolo yan.›
18 A kan ko: ‹Nba, n di n wuli ka wa n fa wara. N wa se ye, n di a fɔ a yɛ ko: «N fa, n da julumun sɔrɔn Alla la, ka hakɛ sɔrɔn i fanan na.
19 I kana n jate i den di butun. Wo ka bon nde ma. I ye n ta ka n kɛ i la baaraden di.»›
20 Wo rɔ, a wulira ka wa a fa wara.
«Ka a to yɔrɔ jan, a fa ka a natɔla yen ka kininkinin a ma. A ka ibori ka wa a den nabɛn, ka iton a den kan ka a sunbu.
21 A den ka a fɔ a yɛ ko: ‹N fa, n da julumun sɔrɔn Alla la, ka hakɛ sɔrɔn ile fanan na. I kana n jate i den di butun. Wo ka bon nde ma.›
22 Kɔni a fa ka a fɔ a la jɔnilu yɛ ko: ‹Ai ye ibori ka na duruki ba ɲuma ri, ka a bila a kan na, ka ban ka bolola koyina don a bolo la, ka sanbara don a sen dɔ.
23 Ai ye nisi den ɲuma ɲuma ta ka a kan natɛɛ. An ye damunun kɛ ka sewa,
24 ka a masɔrɔn n den tun da sa, kɔni a ra kunun. A tun da tunun, kɔni bi a ra yen.› Alu bɛɛ sewara a ɲa jɛrɛ jɛrɛ ma.
25 «Wo ka a tɛrɛn, den kɔrɔmamɔɔ ye sɛnɛ rɔ. A bɔ mɛn kɛni ye, a sudunyara a fa wara ka dɔnkili la kan mɛn, a ni foli kan.
26 A ka jɔn do kili ka a maɲininka ko: ‹Nfen kɛni yan bi?›
27 Wo ka a fɔ a yɛ ko: ‹I doocɛ ra na! I fa ra sewa ka nisi den ɲuma ɲuma faa a yɛ, ko a den kɛndɛ ra na.›
28 Den kɔrɔmamɔɔ monɛra kojuuya, fo ka iban donna lu ma. Wo rɔ, a fa bɔra lu ma ka wa a madiya.
29 Kɔni a ka a fa jabi: ‹A ragbɛ! A ra san siyaman bɔ, n ye baarala i yɛ. N da i kumakan bonya tuma bɛɛ. Kɔni haan bi, i ma hali baadenni kelen di n ma, kosa n di n terilu kili ka tolon kɛ ka sobo damunun.
30 Bari sisen, tuma mɛn na i den da na, mɛn wani tɛrɛ yɔrɔ jan ka i la nanfulu tiɲan manamanaya rɔ, i ra sɔn ka nisi den ɲuma ɲuma faa wo yɛ.›
31 A fa ka a fɔ a yɛ ko: ‹N den, an fila ye yan tuma bɛɛ. Fen fen ye n bolo, wo bɛɛ ye i ta le ri fanan.
32 Kɔni an ka kan ka sewa ka ɲaalen bi. I doocɛ tun da sa, kɔni a ra kunun. A tun da tunun, kɔni bi a ra yen.›»