19
Isa ni Sace
1 Isa donda Jeriko so kɔndɔ ka a tamintɔ ka wa.
2 Wo ka cɛ do tɛrɛn ye, mɛn tɔɔ ko Sace. Ale tɛrɛ ye nisɔnkɔmirala la kuntii ri. Nanfulu ba tɛrɛ ye a bolo.
3 A loo tɛrɛ ye a la ka a ɲa la Isa kan ka a lɔn. Kɔni, jama warani tɛrɛ Isa laminin dɔ kojuuya. Wo bolo ma, Sace ma se a yenna, baa a kundiyani tɛrɛ.
4 A ka ibori ka wa jama ɲɛ, wo rɔ, ka yɛlɛ toro ju la ka Isa makɔnɔ, kosa a ri Isa tamintɔla yen, ka a masɔrɔn Isa ka kan ka tamin dinkira wo rɔ.
5 Nba, Isa se mɛn kɛni jiri ju wo ma, a ka a ɲa layɛlɛ san ma ka a fɔ Sace yɛ ko: «Sace, ikaliya, i ye jii. N ye a fɛ i ye n jiya i wara bi.»
6 Sace jiira kaliya rɔ ka bɔ jiri la. A ka Isa ramira sewa rɔ ka wa a malɔ fo a wara.
7 Mɔɔilu ka wo yen tuma mɛn na, alu ka Isa mafɔ ko: «A sɔnni ka wa jiya kojuukɛla wara.»
8 Sace ka ilɔ Maari ɲana ka a fɔ a yɛ ko: «Maari, bi n di n na nanfulu tala ka fan kelen di bolokolonilu ma. Ka la wo kan, ni a ka a tɛrɛn n da mɔɔ do bolofen mira tɔɲɔli bolo ma, n di a ɲɔɔn naanin laseyi wo ma.»
9 Isa ka jabili kɛ ko: «Kisi ko ra se a wara bi baa a fanan ye Iburahima dencɛ do ri.
10 Mɔɔ Dencɛ ra na, mɔɔ tununnilu ɲininna ko ie ri kisi.»
Jɔn tan na ko
11 Iko Isa sudunyani tɛrɛ Jerusalɛmu so la, mɔɔilu hankili bilara Alla la mansaya ko rɔ. Alu lani a la ko mansaya wo ri bɔ gbɛ rɔ sisen sisen. Wo rɔ, Isa ka sanda do la ie yɛ.
12 A kan ko: «Mansa la kabila cɛ do wara jamana jan dɔ, ko a ri mansaya sɔrɔn ka na.
13 Sani a ye wa mansaba wara, a ka a la jɔn tan kili. A ka wodigbɛ kelen kelen di wo kelen kelenna bɛɛ ma, ka a fɔ ie yɛ ko: ‹Ai ye wodi wo kɛ ai manankun di. Yani n ye n koseyi, ai ye do la a kan n yɛ.›
14 Kɔni, mansa la kabila cɛ wo la ko tun ma di a la jamana mɔɔ doilu yɛ. A bɔ mɛn kɛni a la jamana rɔ, wo rɔ, alu ka kelaya mɔɔ lawa a kɔfɛ ka a fɔ ko: ‹an tɛ a fɛ cɛ wo ye kɛ an na mansa ri.›
15 «Hali wo, mansa la kabila cɛ wo ra mansaya sɔrɔn. Wo bolo ma, a ka ikɔseyi a la jamana rɔ. A se mɛn kɛni ye, a ka jɔnilu kili, a tun ka wodi di mɛnilu ma, ko a ye a fɛ ka a lɔn tɔnɔ yɛli ye ie bolo.
16 A fɔlɔman nara ka a fɔ a yɛ ko: ‹Mansa, n da baara kɛ i la wodi rɔ ka a ɲɔɔn tan sɔrɔn ka la a kan.›
17 Mansa ka a fɔ wo yɛ ko: ‹I ka wo bɛn! Jɔn ɲuma le ile ri. Fen fitini le dira i ma, kɔni i ka a mira ɲa lɔn. Wo rɔ, n di i lasii so tan kun na.›
18 Wo kɔ, a filana nara ka a fɔ mansa yɛ ko: ‹Mansa, n da baara kɛ i la wodi rɔ ka a ɲɔɔn loolu sɔrɔn ka la a kan.›
19 Mansa ka a jabi: ‹I fanan di sii so loolu kun na.›
20 Jɔn dɔgbɛrɛ nara. Wo ka a fɔ mansa yɛ ko: ‹Mansa, n da na i la wodi ri. N ka a bila faanin dɔ ka a dokon ka a mara.
21 N silanda i yɛ, ka a masɔrɔn ile ye mɔɔ kadagbɛlɛn de ri. I ma mɛn bila, i ri wo ta. I ma mɛn foyi, i ri wo ka.›
22 Mansa ka a jabi: ‹Jɔn juu le ile ri! N di i la kiti tɛɛ ka bɛn i da rɔ kuma ma, mɛn bɔ sa i da rɔ ɲin. I ka a lɔn ko n ye mɔɔ kadagbɛlɛn di. I jɛrɛ ka a fɔ ko n ma mɛn bila, n ye wo tala. Ko n ma mɛn foyi, n ye wo kala.
23 A ye di wo rɔ? Nfenna i ma n na wodi don tɔnɔ ɲininna bolo? Kosa n wa na, n di tɔnɔ sɔrɔn n na wodi la.›
24 «Nba mansa ka jamarili di a la mɔɔilu ma mɛn tɛrɛ ye yɛ ko: ‹Ai ye a la wodi mira a la ka wo di jɔn fɔlɔman ma, mɛn ka a la wodi ɲɔɔn tan sɔrɔn.›
25 Alu ka mansa jabi: ‹Mansa, wodigbɛ tan ye jɔn fɔlɔman wo bolo!›
26 Kɔni mansa ka a fɔ ie yɛ ko: ‹N ka wo lɔn. N di a fɔ ai yɛ ko fen ye mɛn bolo, do fanan di la wo ta kan. Kɔni foyi tɛ mɛn bolo, hali fitini mɛn ye wo bolo, wo ri ta a bolo.
27 Nba, n juu mɛnilu tun tɛ a fɛ n ye sii ie kun na, wa woilu mira ka na ie bɛɛ faa n ɲakɔrɔ yan.›»
Isa ka karanden fila lɔ fali den ta la
28 Isa banni sanda wo lala, a bilara jama ɲɛ ka wa Jerusalɛmu.
29 A sudunyani so doilu la, Betifase ni Betani kɔnin, a sera koyinkɛ yɔrɔ do ma, mɔɔilu ye a fɔla mɛn ma ko Olibiye koyinkɛ. A se mɛn kɛni ye, a ka karanden fila lɔ kela diya.
30 A ka a fɔ ie yɛ ko: «So mɛn ye an ɲɛ, ai ye wa se ye. Ai wa don so kɔndɔ, ai ri faliden bulan sidini tɛrɛn ye, mɔɔ si ma isii mɛn kan butun. Ai ye a fulen ka na a ri.
31 Ni mɔɔ ka ai maɲininka ko: ‹Ai ye fali den fulenna nfenna?›, ai ye wo jabi: ‹An Maari mako ye a la.›»
32 Isa ka mɛn lawa ie ka a tɛrɛn ikomin a ka a fɔ ɲa mɛn ma.
33 Alu tɛrɛ ye fali den fulenna tuma mɛn, a tiilu nara ka a fɔ ko: «Hɛn! Ai ye fali den fulenna nfenna?»
34 Alu ka jabili kɛ ko: «An Maari mako ye a la.»
35 Alu ka fali den ta, wo rɔ, ka wa a ri Isa ma. Alu se mɛn kɛni Isa tɔrɔfɛ ye, alu ka ie la durukilu la fali den kan. Alu ka Isa ta ka a layɛlɛ fali kan.
36 Isa watɔla, mɔɔilu ka ie la durukilu jɛnsɛn sila kan a ɲɛ.
37 Wo ɲa ma, a sudunyara Jerusalɛmu la, ka na se Olibiye koyinkɛ ma. A seni koyinkɛ lajii diya, Isa la karandenilu jama ba sewara ka ie kan nabɔ ka Alla tando Isa la kabannakoilu ko kosɔn.
38 Alu tora a fɔla ko:
«Duwawu ye mansa yɛ,
mɛn nani Maari Alla tɔɔ rɔ.
Hɛra ye kɛ sankolo rɔ.
Tandoli ba ye kɛ Alla yɛ.»
39 Farisi doilu tora jama tɛma ka a fɔ Isa yɛ ko: «Karanmɔɔ, a fɔ i la karandenilu yɛ ko alu ye makun.»
40 Isa ka woilu jabi: «Ni alu bɛɛ ka imakun, hali kabakurun ɲinilu ri ie kan nabɔ ka Alla tando karandenilu nɔ rɔ. A ye ten de!»
41 Isa nara ka a ɲa la Jerusalɛmu kan tuma mɛn, a kasira a la ko la.
42 A ka a fɔ ko: «Ko mɛn tun di jusu suma di ai yɛ, ni ai tun ka wo ɲayen, sa ai ra jusu suma sɔrɔn. Kɔni ai filira wo ma. Wo ra dokon ai ma sisen.
43 Lon do natɔ, ai juuilu ri na ai kanma. Woilu ri so bɛɛ sansan kojuuya, ka sila bɛɛ tɛɛ, ka so laminin fan bɛɛ rɔ, fo ka ai ragbɛlɛn.
44 Ai juuilu ri so kɔndɔ mɔɔilu bɛɛ ratiɲan. Alu ri so bɛɛ te fo ka a kabakurunilu bɛɛ jɛnsɛn. Ka a masɔrɔn, Alla tun ye ai fɛ waati mɛn na, ai ma wo jate fewu!»
Isa ka julailu gbɛn
45 Nba, Isa wara Allabatobonba kɔndɔ, ka a tɛrɛn julailu warani ye. A ka ie gbɛn ie labɔ,
46 ka a fɔ ie yɛ ko: «A sɛbɛni Alla la kuma rɔ ko: ‹N na bon di kɛ Alla bato diya ri,› kɔni ai ra a ta ka kɛ sonilu wara ri.»
47 Wo kɔ, Isa tɛrɛ ye mɔɔilu karanna lon lon Allabatobonba la. Sarakalasela kuntiilu ni sariya karanmɔɔilu ni jamana ɲɛmɔɔilu tɛrɛ ye a faa ɲa ɲininna,
48 kɔni, alu ti se wo kɛla, ka a masɔrɔn mɔɔ bɛɛ tɛrɛ ye a la kuma mirala fewu.