24
Isa wulira saya rɔ
Ɲɔɲɔn lon taminni, Lahadi sɔɔma dala jona, muso woilu ka tulu suman duman ni latikolon ta ka wa kaburu da la. Alu seni kaburu da la, kabakurun ba mɛn lani tɛrɛ kaburu da la ka da tuun, wo ra makurukuru ka bɔ ye. Wo rɔ, alu donda kaburu kɔndɔ, kɔni alu ma Maari Isa suu tɛrɛn ye. Ka alu to wo kɔndafili rɔ, alu ka cɛ fila yen, faanin gbɛ mɛlɛnmɛlɛnna tɛrɛ ye mɛnilu kan na. Musoilu silanda kojuuya, ka ie ɲakɔrɔ bɛn duu ma. Cɛ fila wo ka a fɔ ie yɛ ko: «Nfenna ai ye mɔɔ ɲenema ɲininna suuilu tɛma? A tɛ yan. A ra wuli ka bɔ saya rɔ. A ka mɛn fɔ ai yɛ Kalile mara rɔ, ai kana ɲina wo la. Wo tuma a ka a fɔ ai yɛ ko: ‹A fɛrɛ tɛ fo Mɔɔ Dencɛ ye don kojuukɛlailu bolo. Alu ri a ta ka a gbɔngbɔn jiri kan ka a faa. Tele fila a sawana, a ri lawuli ikɔ tuun.›» Wo ka musoilu hankili lajii Isa la kuma rɔ.
Musoilu wara dantɛɛli kɛ
Alu ka ibori ka wa wo ɲa bɛɛ fɔ keladenba tan ni kelen yɛ, a ni ie dɛkuru tɔilu bɛɛ. 10 Mariyamu Makidalaka, ni Yahani, ni Yakuba na Mariyamu, a ni ie dafɔɲɔɔnilu le tɛrɛ, mɛnilu bɔra kaburu da la ka wa dantɛɛli kɛ keladenbailu yɛ. 11 Kɔni keladenbailu ma dantɛɛli wo jate. Alu ma la a la fewu. 12 Hali wo, Piyɛri wulira ka ibori ka wa kaburu da la. A se mɛn kɛni ye, a ka imajii ka kaburu kɔndɔ mafɛnɛ. A ma foyi yen a kɔndɔ fo kansankɛ gbansan. A kɔndafilini ka ikɔseyi so kɔndɔ.
Karanden fila ni Isa ka iɲɔɔn yen Emayusi sila la
13 Nba, wo lon kelen na, karanden fila bɔra Jerusalɛmu ka wa so do la, mɛn tɔɔ ko Emayusi. Wo so ni Jerusalɛmu tɛ ri kilo tan ni kelen ɲɔɔn bɔ. 14 Ko mɛnilu kɛni, alu tɛrɛ ye barola woilu kan. 15 Ka alu to barola, Isa nara ka imadon ie la. A ni ie wara iɲɔɔn fɛ. 16 Alu ka Isa yen ie ɲa la, kɔni alu filiyara a ma.
17 Isa ka ie maɲininka ko: «Ai tɛrɛ ye barola nfen de kan?» Alu ka ilɔ, alu fila nin nafinni ie ma. 18 Mɛn tɔɔ ko Kilopasi, wo ka Isa jabi: «Ile kelen de lɔndanyala Jerusalɛmu yan mɛn i ma a lɔn ko mɛn ye taminna yan tele ɲin dɔ?» 19 Isa ka ie maɲininka ko: «Ko su ɲuman de wo ri?» Alu ka a jabi: «Ko mɛn kɛra Isa Nasarɛtika la. A la kuma ni a la kɛwalilu yirakara an na ko Alla la nabiɲuma barakani le ale ri, Alla ɲana a ni mɔɔ bɛɛ ɲana. 20 Sarakalasela kuntiilu ni an na jamana ɲɛmɔɔilu ka a mira. Alu wara a ri Rɔmu faama cɛ ma ko a ye a faa. Wo rɔ, alu ka a gbɔngbɔn jiri kan ka a faa. 21 An jii tɛrɛ ye a kan ko ale ri Isirayɛli mɔɔilu hɔrɔya, kɔni alu ra a faa. A faa tele sawanan de bi ri. 22 An na dɛkuru muso doilu nara kuma do fɔ an yɛ. Wo ka an kɔndafili kosɛbɛ. Alu ka a fɔ an ɲana ko alu wara kaburu da la bi sɔɔma jona, 23 kɔni alu ma a suu tɛrɛn kaburu kɔndɔ. Alu ka ikɔseyi ka a fɔ an yɛ ko alu ka mɛlɛka doilu yen, mɛnilu ka a fɔ ie ɲana ko Isa ɲenema le. 24 Wo le ka a kɛ, an dafɔɲɔɔn doilu bɔra ye ka wa wo lakɔrɔsi. Alu wara kaburu da la ka a bɛɛ tɛrɛn iko musoilu ka a fɔ ɲa mɛn. Kɔni alu ma Isa jɛrɛ yen.»
25 Isa ka ie jabi: «Ai hankilitanilu! Nabiɲumailu ka mɛnilu fɔ, ai tɛ lala woilu la jona dɛ! 26 Ni wo tɛ, nabiɲumailu ka a fɔ ko Alla la Mɔɔ Ɲenematɔmɔnin di tɔrɔya sɔrɔn ten, ka ban ka don a la gbiliya jɛrɛ jɛrɛ rɔ. Kuma wo ma kan ka kanbali wa?» 27 Wo rɔ, fen fen sɛbɛni a jɛrɛ la ko rɔ Alla la kuma rɔ, ka damira Nabi Musa la sariya rɔ haan ka na se nabiɲuma tɔilu bɛɛ la sɛbɛlilu ma, a ka wo bɛɛ kɔrɔ fɔ ie yɛ.
28 Alu ka so magbɛn tuma mɛn, Isa ka a jɛrɛ kɛ taminbatɔ ri. 29 Kɔni alu ka a madiya kosɛbɛ, ka a fɔ a yɛ ko: «I jaandi, i ye to an fɛ yan. Su kotɔ le, dibi ri don sisen.» Wo rɔ, a ni alu donda so kɔndɔ iɲɔɔn fɛ. 30 Damunun waati seni, alu bɛɛ ka isii damunun kanma. Isa ka buru ta ka baraka bila Alla yɛ, ka a rakadikadi ie bɛɛ tɛma. 31 Waati kelen wo la, karanden fila bɛɛ ɲa lakara ka a lɔn ko lɔndan cɛ wo ye Isa le ri. Kɔni Isa tununda ie ma kelen di. 32 Alu fila ka iɲɔɔn maɲininka ko: «A ka Alla la kuma fɔ an yɛ sila kan tuma mɛn, an jusu ma bɔ wa?»
33 Alu fila wulira kelendi ka ikɔseyi Jerusalɛmu. Alu se mɛn kɛni ye, alu ka keladenba tan ni kelen ni karanden tɔilu ladɛnni tɛrɛn yɔrɔ kelen. 34 Alu bɛɛ ladɛnni ka a fɔ mɔɔ fila wo yɛ ko: «Tuɲa jɛrɛ jɛrɛ le. An Maari ra wuli ka bɔ saya rɔ. Simɔn jɛrɛ ra a yen.» 35 Wo rɔ, wo fila ka ie ta fanan fɔ. Alu bɛnda Isa ri sila la ɲa mɛn ma, a ni alu ka Isa lɔn ɲa mɛn buru rafara waati, alu ka wo bɛɛ dantɛɛ jama ɲana.
Isa ka a jɛrɛ yiraka jama la
36 Ka alu to kuma wo kan, Isa bɔra gbɛ rɔ ie tɛma. A kan ko: «Alla ye hɛra kɛ ai yɛ.» 37 Alu bɛɛ barara ka silan kojuuya, baa alu tɛrɛ ye a jatela suu jiya kɔrɔ le ri. 38 Isa ka a fɔ ie yɛ ko: «Ai silanni nfenna? Ai sikani nfenna?
39 «Ai ye imadon n na ka n boloilu mafɛnɛ, a ni n senilu. Nde jɛrɛ le fasayi! Ai ye ai bolo maa n na. Bu ni kolo ye n na jɔ! Ni suu jiya kɔrɔ le, ai ri bu ni kolo yen wo la wa?» 40 Wo rɔ, a ka a boloilu ni a senilu yiraka ie la.
41 Wo kɛra sewa ko ba ri, kɔni alu kabannakoyani tɛrɛ kojuuya, haan ka ie kɔndafili. Sika tɛrɛ ye ie rɔ butun. Ka alu to miriya wo rɔ, Isa ka a fɔ ie yɛ ko: «Damunun fen tɛ ai bolo yan wa?» 42 Alu ka jɛɛ janinni do ta ka di a ma. 43 A ka a ta ka a damun ie bɛɛ ɲana.
44 Wo kɔ, a ka a fɔ ie yɛ ko: «Waati taminni, n tɛrɛ ye a fɔla ai yɛ ko fen fen sɛbɛni n na ko rɔ, wo bɛɛ ri dafa. Mɛnilu sɛbɛni Nabi Musa la sariya rɔ, a ni mɛnilu sɛbɛni nabiɲuma tɔilu la kuma rɔ, a ni mɛnilu sɛbɛni Jaburi kitabu rɔ, woilu bɛɛ ri dafa fewu.» 45 Wo rɔ, a ka hankili di ie ma, sa alu ri se ka Alla la kuma ɲa yen. 46 A ka a fɔ ie yɛ ikɔ tuun ko: «A sɛbɛni Alla la kuma rɔ ko Alla la Mɔɔ Ɲenematɔmɔnin di jakankata ka faa. Kɔni a faa tele sawana, a ri wuli ikɔ tuun. 47 A ri fɔ mɔɔilu bɛɛ yɛ Alla la Mɔɔ Ɲenematɔmɔnin tɔɔ rɔ ko alu ye tubi, kosa Alla ri ie makoto. A kibaro ri bɔ Jerusalɛmu yan ka jɛnsɛn jamana bɛɛ rɔ. 48 Ai ri ko woilu sereilu ri. 49 N Fa ka lahidi mɛn sidi ai yɛ, n di wo dafa lana ai ma. Wo rɔ, ai kana bɔ Jerusalɛmu so kɔndɔ fo sɛɛbɛ wo wa bɔ sanfɛ ka jii ai kan.»
Isa yɛlɛra san ma
50 Wo kɔ, a wara ie malɔ Betani so fan fɛ. A ka a bolo fila kɔrɔta ka duwawu kɛ ie yɛ. 51 Ka a to duwawu la, a kɔrɔtara ka bɔ ie tɛma ka wa sankolo rɔ. 52 Alu ka a bato, ka ban ka ie koseyi Jerusalɛmu sewa ba rɔ.
53 Nba, alu tɛrɛ ye wala Allabatobonba kɔndɔ tuma bɛɛ ka to Alla batola.