5
To Nati no Karneru no si Jesu-Cristo
1 Tapus to sikan, mey pigkita ku duon to kalintuu no boyad to sikan mig-ingkud duon to trunu. Pigyukut sikan pigtagonan din no basahon no pigsuyatan to magdibayuy, aw pigpilit sikan to pitu no ka papilit no pigsilyuhan.
2 Migkita a isab to madoson no anghil no mig-ikagi to maagbot, “Hintawa man to angajan no oggawang to sikan impamilit dow ogbukyad to sikan basahon?”
3 Di wada inggad hintawa diya to yangit ubin dini to pasak ubin diya to banwa to mgo umagad no mey katongod to paggawang to sikan dow to pagbasa.
4 Kaling migtiniyahu a su wada man inggad sobuuk no nakitaan no angajan no oggawang to sikan impamilit dow ogbasa to sikan no basahon.
5 Dajun ikagi kanay to sobuuk no panguyu, “Kona kad ogtiyahu su aha ka to suja Liyun no kaliwat ni Juda. Sikandin kan bantugan no kaliwat ni Hari David. Nadaog din on to tibo mangkadoot, kaling angajan sikandin no oggawang to sikan pitu no impamilit dow to pagbukyad to sikan basahon.”
6 Na, migkita a to Nati no Karneru no migtindog duon to dani to sikan trunu no piglibongan to sikan upat no mgo hininang dow sikan mgo panguyu. Duon to yawa to sikan Karneru meyduon ogkakiyayahan no pighimatajan sikandin to diya una. Pitu to suwag din aw pitu to mata, no ko hiluwason, Ispiritu Santu no pigpaandini din to tibuuk kalibutan.
7 Dajun duguk sikan Karneru duon to sikan mig-ingkud to trunu aw puduta sikan basahon duon to kalintuu no boyad din.
8 Pagkapudut din to sikan, migyuhud dajun duon to atubangan din sikan upat no mgo hininang dow sikan kaewaan-mey-upat no mgo panguyu. Yogob sikandan to patanugonon no og-ilingon to alpa dow buyawan no botanganan no pigsedan to insensu. To igpasabut to sikan insensu, mgo pag-ampu sikan to kaotawan to Diyus.
9 Migkanta sikandan to bag-u no kanta no pig-iling,
“Sikuna to angajan no ogdawat to sikan pigyukut no basahon
dow to paggawang to sikan impamilit.
Su pighimatajan ka, aw pinaagi to yangosa no pigpaawas nu,
mey mgo otow no nayokat nu duon to tibo mgo tribu dow tibo mgo nasyun no yain-yain to inikagihan
agun mahinang sikandan no mgo sakup to Diyus.
10 Aw naangod on sikandan to diya mgo magdudumaya to tinuuhan to mgo Hibru
su pigbogajan nu sikandan to katongdanan to pagtuman to Diyus ta
dow to pagmandu duon to kalibutan.”
11 Na, duon to sikan impakita kanay, pigdinog ku to tingog to libu-libu no mgo anghil. Piglilibongan dan sikan trunu dow mgo hininang hasta to mgo panguyu.
12 Mig-ikagi sikandan to maagbot,
“Sikan Nati no Karneru no pighimatajan to diya una
angajan no ogsajaon dow ogtahudon,
su sikandin to yabow to katongod, to kadatu, to kaalam dow to gahom!
Ogpasidonggan ta sikandin!”
13 Tapus to sikan, pigdinog ku isab to tingog to tibo mgo hininang to Diyus no mey ginhawa diya to yangit, kani to pasak aw diya to didayom to pasak dow dagat. Kagi dan,
“Sajaon ta sikan mig-ingkud duon to trunu
dow sikan Nati no Karneru.
Pasidonggan aw tahudon sikandan to wada katapusan
tongod to pagkagamhanan dow pagkayabow dan!”
14 Sikan upat no mgo hininang mig-iling, “Sikan iyan.” Dajun yuhud sikan mgo panguyu aw simbaha dan to Diyus.