15
Mosesɨn Onger Akam
1 Dughiar kam Moses Israelian gumazamiziba ko, Ikiavɨra Itir God bagha ighiar kam kamaghɨn a bange:
“Ikiavɨra Itir God, a mɨdorozir ekiam abɨra, ezɨ kɨ datɨrɨghɨn a bagh onger akam bangam.
Guizbangɨra, a hoziaba ko gumazir hoziabagh isɨn apiaziba me avigha ongarim mɨkɨni.
An apaniba abɨra, ezɨ an ziam bar pɨn iti!
2 Ikiavɨra Itir God uabɨ na gamizɨma, kɨ gavgavigha, onger akam bangava an ziam fe.
A zurara ua na isi, ezɨ kɨ an ziam fasa.
A nan God, egha nan akurvazim. Kamaghɨn amizɨ, kɨ an ziar ekiam fasa.
Nan afeziamɨn God, kɨ an ziar ekiam fɨ, a isɨ bar pɨn anerɨgh ighiam damuam.
3 Ikiavɨra Itir God, a bar mɨdorozir gumazir gavgavim.
Ziar kam, Ikiavɨra Itir God, kar an ziam.
4 A Isipian mɨdorozir gumaziba ko men karisɨn mɨdorozim gamiba, a me avigha me isa ongarim mɨkɨni.
Ezɨ men mɨdorozir gumazir dapaniba, ongarim amegha Ongarir Aghevimɨn aven ariaghire.
5 Ongarim bar me avarazɨma,
me dagɨabar mɨn ongarir dɨkɨnim giraghue.
6 Ikiavɨra Itir God, nɨn agharir guvim bar gavgavir ekiam iti,
nɨ uan apaniba dɨkaragha bar me mɨrmɨri.
7 Nɨ uan gavgavir ekiamɨn uan apaniba abɨra,
egha nɨ uan navir anɨngazim avimɨn mɨn otogha men isia, mati avim grazir mɨdiaribar isi.
8 Nɨ amɨnir ekiam gamizɨ a dɨkavigha, ongarim gamizɨma, a buigha pɨn anabo.
Egha voroghɨra dɨvazimɨn mɨn tughav iti. Ezɨ ongarir apebamɨn itim, bar pamtemɨn ingara gavgafi.
9 “Apaniba ghaze, ‘E men agɨntɨgh men suigham.
Egh men bizir aghuariba inigh da tuisɨgh uan adarazir anɨngam.
Egh e bizir manam inisɨ e puram a iniam.
E sabar mɨsozim asigh, uan gavgavimɨn me gasɨghasɨgham.’
10 Ikiavɨra Itir God, nɨ uan amɨnim dughiar vamɨran a giverazɨma, ongarim Isipia avara.
Ezɨ me dagɨamɨn mɨn ongarir bar puvɨra ingarim giraghue.
11 O Ikiavɨra Itir God, ua godɨn manam ikia nɨn mɨn gavgafi? Tav ua itir puvatɨ.
Nɨ atrivir ekiam, egha arazir aghuibaram ami.
Nɨ bar pɨn kozɨ, e nɨn atiati. Tina nɨn mɨn iti? Tav ua itir puvatɨ.
Nɨrara dɨgavir kuram gamir arazibagh ami, egha ingangarir ekiabagh ami.
12 Nɨ uan agharir guvim a ghufegha anemadazɨ,
nguazim akam akarigha apaniba tuavareme.
13 Nɨ bar uan gumazamiziba men apangkuvigha men akuragha me inigha, men faragha ghua me inigha zui.
Nɨ uan gavgavimɨn men darorimɨn faragha ghua, danganir aghuarir nɨ uabɨ itimra, nɨ men akua a bagha zui.
14 Kantrin Igharazibar Gumazamiziba arazir nɨ amizim baregha, pamten nɨghava atiati.
Ezɨ Filistiaba uaghan aguava bar puvɨrama atiati.
15 Idomɨn kantrin faragha zuir gumazibar nɨghnɨziba, tintinibar nɨghnɨgha onganizɨ moghɨn ami.
Moapɨn gumazir dapaniba puvɨra nɨghava agoi.
Kenanian gumazamiziba atiatia, uan gavgavim ategha puram amɨragha uaghiri.
16 Me nɨn gavgavir ekiamɨn gara, atiatir ekiam ko nɨrɨzir bar ekiam me avarazɨ, me pura ikia bizitam damuan ibura.
Me pura dagɨabar mɨn dapiagh ikɨtɨ, e nɨn gumazamiziba me gitavɨragh mangam.
O Ikiavɨra Itir God, nɨn gumazamizir nɨ me givezegha ua me iniziba,
me guizbangɨra kantrin kabagh itagh bar mangam.
17 O Ikiavɨra Itir God, nɨ en aku mangɨtɨ, e nɨn mɨghsɨamɨn deraghvɨra dapiagham.
O Ekiam, danganir kamɨn, nɨ uabɨ uan dɨpenimɨn ingaram.
Dɨpenir nɨ itir kamɨn, gumazamiziba izɨ nɨn ziam fam.
18 Ikiavɨra Itir God, an atrivimɨn mɨn ikɨ mamaghɨra ikiam.”
Miriamɨn Onger Akam
19 Israelia nguazir dakɨrtɨzimɨn Ongarir Aghevimɨn tongɨn ghua otogha gɨfa. Ezɨ Isipɨn atrivimɨn mɨdorozir gumaziba ko, hoziaba ko gumazir karisbagh isɨn apiaziba, me Israelian gɨn zui. Ezɨ Ikiavɨra Itir God ongarim gamizɨ, a uamategha iza me avara.
20 Gɨn Godɨn akam inigha izir amizim Miriam, an Aronɨn amezemebam, a buar mam uan dafarimɨn an suira. Amiziba bar moghɨra uan buaba inigha, Miriamɨn gɨn zui. Egha me buabav sogha onger akabagh amua ighiam gizi.
21 Miriam me bagha kamaghɨn ighiam bange:
“Ikiavɨra Itir God gumazir hoziabagh apiaziba, ko hoziaba sara bar me avigha
ongarim mɨkɨnigha, apaniba abɨnigha ziar ekiam ini.
Kamaghɨn, ia a bagh onger akam bangɨ.”
Israelia gumazamiziba puvatɨzir danganibar arua zui
(Sapta 15:22--18:27)
Dɨpar mɨsozim
22 Ezɨ gɨn Moses Israelian akua Ongarir Aghevim ategha, Surɨn gumazamiziba puvatɨzir danganimɨn zui. Me gumazamiziba puvatɨzir danganim, aruer 3plan an arua ghua, dɨpatamɨn apizir puvatɨ.
23 Egha me gɨn ghua Maran danganimɨn otivigha dɨpar mam bato. Dɨpar kam akatorimɨn aven mɨsosi, ezɨ me anereman ibura. Dɨpar kamɨn ziam, Mara, an mɨngarim, bizim akamɨn aven anɨnganigha mɨsosi.
24 Ezɨ gumazamiziba atara mɨgɨrɨgɨar avɨribar Moses gamua, kamaghɨn an azangsɨsi, “E managh dɨpatam amegham?”
25 Moses Ikiavɨra Itir Godɨn dia mɨghɨgha a ko mɨgeima, Ikiavɨra Itir God ter otevir mam an aka. Ezɨ Moses a inigha dɨpamɨn anekuni, ezɨ dɨpam ua derazɨ, me aneremam.
Ezɨ God danganir kamɨn arazir a ifongeziba ko bizir a damuasa mɨkemeziba me ganɨdi, egh a men gan me gɨfoghasa, me dar gɨn mangam, o ti puvatɨgham.
26 Ezɨ God me mɨgei, “Ia deragh nan akam baragh. Kɨrara Ikiavɨra Itir God, ian God, ia arazir nan damazimɨn deraziba, ia dar amu. Egh ia nan Akar Gavgaviba ko arazir kɨ ifongeziba bar dar gɨn mangɨ. Ia kamaghɨn damutɨ, kɨ pazɨ ia damuan koghɨva, arɨmariar kurar kɨ Isipɨn gumazamizibagh anɨngiziba ia danɨngan kogham. Guizbangɨra, kɨ ian Ikiavɨra Itir God. Kɨ ian arɨmariaba akɨrizɨ ia ghuamazi.”
27 Egha gɨn Israelia ghua Elimɨn nguibamɨn otifi. Elim, a dɨpar nguazimɨn aven anagava otiva uaghirir 12pla ikia, 70plan temer detba iti. Ezɨ Israelia purirpeniba, nguazimɨn aven ivemarir dɨpabar boroghɨn dar ingarigha kagh apia.