Akɨnafarir namba 4
90
(Onger Akaba 90--106)
Godɨn mɨgɨrɨgɨaba ko gumazimɨn mɨgɨrɨgɨaba
Kar Moses God ko mɨgeir onger akam. Moses a guizbangɨra God baghavɨra itir gumazim.
1 O Ekiam, nɨ bar guizbangɨra en dɨpenir, e aven itimɨn mɨn itima,
en inazir afeziaba fomɨra nɨn aven ikia iza, datɨrɨghɨn e iti.
2 Nɨ tɨghar mɨghsɨaba ko nguazir kamɨn ingaram, nɨ Godɨn ikia kamaghɨra iti.
Nɨ uaghan gɨn ikɨ kamaghɨra ikiam.
3 Nɨ nguazimɨn gumazamizibagh amima, me arɨmɨghira ua ghua nguazim gava.
Nɨ ghaze, “Ia nguazimɨn gumazamiziba, ia arɨmɨghirɨ ua nguazim gavagh.”
4 Nɨn nɨghnɨzim 1,000plan azeniba, da mati aruer vamɨra.
Dughiar kam, boghɨnaron aruemɨn mɨn zuamɨra gɨfa.
Mati dɨmagarim dughiar otevimɨn ghua gɨfa.
5-6 Nɨ aperiamɨn mɨn otogha gumaziba inigha zuima, me bar ariaghiregha ireghav iti.
Me irebamɨn mɨn bar dughiar otevimɨn iti.
Me mati dadar moniba, aruem anadi me aghua ruari.
Ezɨ aruem uaghirima me mɨdɨa uaghiri.
7 Nɨ adarim en ikia, e gasɨghasɨsi.
Nɨ adarim en iti, ezɨ e bar nɨn atiatingi.
8 Nɨ en arazir kuraba bar adar gari.
En arazir kurar e mogava amiba, nɨ bar ada isa azenim garigha gɨfa.
9 Nɨn adarim, e nguazimɨn itir ikɨrɨmɨrir kamɨn dughiam otefe.
Bar guizbangɨra, e zuamɨra gɨvagham, mati e ghuariaba sue moghɨn ami.
10 E 70plan azenibar iti, e gavgavigh 80plan azenibar ikiam.
Azenir e itir kabar dughiaba,
e zurara ingangarir ekiabagh amua osɨmtɨzibarama ateri.
Azenir kaba zuamɨra geveghtɨ, e uaghan mangegham.
11 Tinara nɨn adarir ekiamɨn gavgavim gɨfo?
Nɨ atarima gumazamiziba nɨn atiati,
tinara men atiatir kam gɨfo?
12 Nɨ deragh en sure damutɨ, e uan ikɨrɨmɨrimɨn dughiam gɨfogham, an otefe.
E fofozir aghuim ikɨva, dughiaba vaghvagh deraghvɨra bizibar amuam.
13 O Ikiavɨra Itir God, nɨn anɨngagharir kam ti dughiar ruarimɨn ikɨvɨra ikiam, o?
E nɨn ingangarir gumaziba, nɨ en apangkuv.
14 Nɨ zurarama en apangkufi.
Nɨn apangkuvir kam mɨzarazibar e gizɨvɨra ikɨ.
E dughiabar ikɨ zurara onger akabar amuva, naviba deragh ikiam.
15 Nɨ faragha azenir avɨribar osɨmtɨzim e ganɨngi.
Nɨ osɨmtɨzir e ganɨngizir kabar arueba mengegh, dar mɨrara datɨrɨghɨn e damightɨ e bar akuegham.
16 E nɨn ingangarir gumaziba, nɨ uan ingangarir gavgaviba en akagh.
Nɨ uaghan en ovavir boriba, nɨ uan ingangarir gavgavir aghuiba men akagh.
17 O Ekiam, nɨ en God, e kamaghɨn ifonge, nɨ en apangkuvigh deraghvɨra e damu.
Bizir e amiba mar deraghvɨrama otiv.
Nɨ guizbangɨra bizir e amiba, nɨ gavgavim dar anɨngightɨ,
da gavgavigh mamaghɨra ikɨ.