☰ Rev 1
REVARESION
Jon Gumbe Iesu Keriso Taibe Toyau Nunnewa
1
Gae Amatonewa
1 ✡Natawa guwavewa me Iesu Keriso taibe anewa.* Mame me God Iesu Keriso wannewa. Dividivi tate matatpewa me nau igiyawa meuma toyau muntan oya. Keriso aneya meuma baraune Keriso nauwawa aiviwa Jon aine. Aneya Jon dine me yaug anone. 2 Jon me dividivi yaunewa undag me taibe ane. Me God gaiyawa ge Iesu Keriso taibe wanewa. 3 ✡God gaiyawa mame basiyapewa me waribiyape. Iyayapan mu me anope sira me danave tenewa nonomagowo baraupewa mu waribiya mumpe. Kuiyawa kum koni aivi.
Gaun Ge Waiya
4 ✡Jon gumbe at Esia danave siosi 7 oya. God ano oraiwa ge yum me gumbe ye guniyap. Me wakenewa gumbe sira me matai uwapewa gumbe, sira God wakeivi arawa namive Guwawa 7 gumbo God ano oraiwa ge yum ye guniyap wakeigimpe. 5 ✡Sira Iesu Keriso gumbe. Me anotumat gumbe taibe waivi abnawa. Me bo gumbe namu yainewa. Me piyu ayapaneba egave amaraiviwa. Me nu baigan nunne, sira me kukaeba numa tamtut di meuma gumbe tam oraiwa gumbe te nunne. 6 ✡Me kin arawa wad nunne, sira pirisi wad nunne, nu Mamawa God nau meuma atan oya. Me gumbe eyawa ge yusiwa evedni wakeigimpe. Amen.
7 ✡Yauya. Me irikup gumbe uwape. Yangowo undag me yaupe.
Sira mu me yuyawa yaupe. Piyu igiyawa undag me oya iruwape. Me meib, Amen.
8 ✡Ayapan God waivi, “Ne Arupa ge Omega, Amatonewa ge Oieba.” Me evedni wakeivi, watau wakene, matai uwape, me Yusipamitwa.
Keriso Irawa Me Apan Usiwa Mina
9 Ne Jon, ye tateiwa, Iesu oya ibnawa ge God toimuwawa ge iyai waketanwa ye auyene mina ne aueni. Ne God gaiyawa ge Iesu taibe watanwa oya ginayapawa veme Patmos apa wakena. 10 Ayapan kumiwa apa ne Guwawa demtawa auna. Ne daienap noiwa kokavit anona, me kae trampet† noiwa mina. 11 Noiwa wane, “Ge yavegewa gigirum paniyawa danave teya. Sira teya siosi 7, Epesas, Sumiruna, Pergamam, Taiataira, Sardis, Piraderupia, Raodisia munan ampe.”
12 Noiwa gunap waivi. Ne noiwa yautan tobiroriyana. Ne tobiroriyanawa, gooru dun yokeyawa 7 yawamna. 13 ✡Dun yokeyawa yapowo desirom da Apan Usiwa mina yauna. Me wape ennewa yobutatae aig onne ama wakukuyawa uwane. Me togeve gooru murap tune. 14 ✡Me kuiyawa ge kuiyagumawa me mae sip gumawa mina sira snow‡ mina puiwane. Me yangawa iyam meru mina igivi. 15 Me amawa brass mina ig puiwaivi arawa danave ig puiwane sira ig merawaivi mina. Me noiwa me yoi kintog aivi mina. 16 ✡Me naniyutanwa danave marantun 7 yumnadne. Me noiwa gumbe mut tumiwa dauwane. Me donawa gamben gamben waivitwaya me ginangawa kum mina igivi.
17 ✡Ne me yaunawa, amave aig bo mina ana. Megara me naniyutanwa ne eganap baraug wane. “A den a. Ne Namuiren sira Oieba. 18 Ne evedni wakeeniwa. Bo ana, magara yauya, yaibobot inaigidna. Sira ne bo ge ades§ kii** meuma yumnadna.
19 Meoya teya dividivi wait yauyanawa, gare matasiviwa, matai matatpewa. 20 Ge nanin yutanwa danave yawanawa me marantun 7, sira gooru dun yokeyawa 7 me ano guwavewa mamaib. Marantun 7 me siosi 7 aneya muma oya, sira gooru dun yokeyawa 7 me siosi 7 oya.
✡ 1:1 Rev 22:6 * 1:1 Gae Ingriisu gumbe me Revaresion, Gae Griik gumbe me Apokarupsis. Natawa mamaib: Taibe anewa, Natawa guwavewa God irawa uyavi minawa gumbe taibe toyau nunnewa. ✡ 1:3 Rev 22:7,10 ✡ 1:4 Eks 3:14-15; Rev 3:1; 4:5 ✡ 1:5 Sam 89:27; 1Ko 1:18 ✡ 1:6 1Pi 2:9; Rev 5:10; 20:6 ✡ 1:7 Dan 7:13; Jak 12:10; Mat 24:30; Jon 19:34-37; 1Te 4:17 ✡ 1:8 Rev 21:6; 22:13 † 1:10 Me kae biguru mina. ✡ 1:13 Dan 7:13; 10:5 ✡ 1:14 Ejk 43:2; Dan 7:9; 10:6; Rev 2:18; 19:12 ‡ 1:14 Me gamat pupuyu, sira gotoru mina kwimin apa aigivi. ✡ 1:16 Ibr 4:12; Rev 2:12; 19:15 ✡ 1:17 Ais 44:6; 48:12; Rev 2:8; 22:13 § 1:18 Me gae Ibru. Me at kukaeba. Anotumat onan igiyawa matai bo ivi unikpe. ** 1:18 Me ankwin watapemewa ge toboremewa kaipat mina.
☰