7
Dene ngü ka mere ngu te si füh kotö ne
1 Te Nüwa mere tima la nza tete ꞌburu, fü Me adu amala ngü fefe na, gü ba dene, “Nüwa deyï, ni wu eyi, gü ba, ye de kpara te ye ngbü ele ngü ka-ni de maguma ye biringbö, esüka wü kpara, te ewü ngbü emere *siti ngü de füh kotö ne. Te di bala, ni ena aküwa ye, de wü kpara ka-ye ꞌburu aküwa. Ah le de wü reke te-wü, fü wü alï agbü *zabu, teka fü wü aküwa esaka mere ngu, te ena asi ne.
2 Ye ro wü züka nü, aza kpaka ye agbü zabu kpala. Ye ro ewü te nga nzö ewü biri biri ꞌburu, momoko na lorozi, ni ye na kpah lorozi. Amba, teka siti wü nü, te wü kpara zü de, ye ro ewü ngbee ꞌbasu ꞌbasu, momoko na bete ni ye na.
3 De ye ro kpah nga nzö nguwa wü lu ꞌburu, momoko na lorozi, de caca na kpah lorozi. Ye mere bala, teka fü ewü adu adi esibi füh kotö ne, sidi nga ngu te ena anzürü tete na, angü tanguwa ewü ena adürü.
4 Kükürü de, angü du sïkpï eyi ngbee lorozi, fü ni atima mere siti agö, te ena alï füh kotö ne ꞌburu. Ah ena alï biti de ra mini, teka wü sïkpï teke ꞌbasu (40). Te di bala, du wü e, de ta te ni o ewü, te ewü endoro andoro füh kotö ne, wüh ena akpi ꞌburu anza anza, fü nga ewü aürü aürü.”
5 Dela wü ngü ta te Me mala fü Nüwa. Fü Nüwa ayia amere ngü la, kpah baka e te Me mala fü ye ne.
6 Gbü re engu ta te mere ngu si tete na ne, re ka Nüwa koro ta eyi kama maꞌdiya (600).
7 Fü Nüwa ayia ake wara ye, de wü di ye, de wü wara wü di ye, areke te-wü, teka alï agbü zabu, angü mere siti ngu ena asi füh kotö ne ꞌburu.
8-9 Wü nü de wü lu, ta te Me mala nga ewü fü Nüwa ne, fü ewü ayia akoro kpah ꞌburu kpakaka na. Fü züka ewü bete siti ewü, cögbörö ewü bete jürü ewü, ayia alï ꞌburu agbü zabu. Wüh lï ta ꞌburu ꞌbasu ꞌbasu, momoko na bete caca na, kpah baka ngü ta te Me mala fü Nüwa ne.
10-11 Baka te wü Nüwa reke te-wü nza tete, fütanga sïkpï lorozi, fü ewü ayia alï agbü zabu. Ngü la mere te-ye gbü fe ka ꞌbasu, gbü sïkpï kaka nzükpa de füh-ye lorozi. Fü mere siti agö ayia akoro alï currru! baka e te wüh ü kpï aü. Fü wü angbe cögbörö yï-ngu akpo kpah da edü gbü tö kpulu! kpulu! Fü mere siti ngu akpo esi.
12 Agö la lï ta biti de ra mini, teka wü sïkpï teke ꞌbasu.
13 Te agö kpo ngbü elï tete na, o wü Nüwa di eyi agbü zabu, ake wara ye, de wü di ye bata ne, Seme, Ama, bete Yapete, bete wü wara ewü ꞌburu.
14 Wü nü ta te Me mala nga ewü fü Nüwa ne, wüh kpah eyi ꞌburu kpala, wü nü ka kötï, abe kpah te wü nü ka gü, de wü lu, bete wü e te ewü endoro andoro füh kotö ne ꞌburu.
15-16 Wüh yia ta kpah te nga nguwa wü la ꞌbasu ꞌbasu, momoko na ake caca na, lï kpah ꞌburu agbü zabu la, kpah baka ngü ta te Me mala fü Nüwa ne. Baka te wü Nüwa di tïne eyi ꞌburu agbü zabu la, fü Me ayia ani mö nga zabu la gbü nga ewü, gbuuu! atümü gö gö gö!
17-18 Fü agö la ayia alï teka sïkpï teke ꞌbasu. Dela agö nda tïne de! Fü ngu akpo da esi ki ki ki! anü maka te-ye yere! Fü ngu asi ꞌduwa asi ꞌba ꞌba ꞌba! Fü ah akpo ee zabu etikpi. Fü zabu ayia angbü füh ngu la.
19-20 Fü ngu la ayia asi, ata wü angbe cögbörö wü da, de wü rü ꞌburu kpa esa ye.
21 Fü wü kpara ayia akpi, de wü nü, de wü lu ꞌburu gbü mere ngu la.
22-23 Fü wü e, de te ewü ndoro andoro füh kotö ne, baka wü angbe cögbörö wü nü, wü zaza, wü kpürü, de wü gara wü jürü wü e, ayia akpi kpah ꞌburu. Wü e kpi nza tanguwa wü ꞌburu ꞌburu. Angü Me le de tanguwa wü e füh kotö ne nza anza ꞌburu ꞌburu asidi.
Fü wü Nüwa ayia aküwa ꞌduwa me-wü, de wü e te ewü di de ewü, kpa gbü zabu de kpala.
24 Fü mere siti ngu la asi angbü fï bala, teka wü fe ꞌburuve.