To Ngü Mürü ka Me bete Gina Ngü (S Sudan) Ebere 7

Dene ngü ka Yesu, te ngbü eyi to mürü gele ka-nih,

fï mere badi ne

1 Yesu de mere *mürü gele ka-nih baka Miri Meleke-Sadiki ta gügü ne.* Miri Meleke-Sadiki la ta neh da? Meleke-Sadiki ta de mere miri ka gara sü de ïrï ye Salema.† Engu ta kpah de mürü gele, te ngbü emere tima ka mere Me. Ta gügü wü *Abarayama nü tï gü gbü nzö wü vügü ka-wü, fü ewü afa wü vügü la.‡ Te wü Abarayama ngbü ego tete kpa ekötï, fü Abarayama anü amaka te-wü de wü Miri Meleke-Sadiki. Fü Miri Meleke-Sadiki ayia asü ngüsü gbü nzö Abarayama. Fü ah ayia aku gba fü Me, teka de Me to wazi fefe na. 2 Fü Abarayama ayia aza süka wü e, te ewü za esaka wü vügü la, ato fü Miri Meleke-Sadiki baka tari-e,§ teka agbo nga ïrï Me di. Te di bala, ngü ka Miri Meleke-Sadiki ka-ye baka nda Yesu. Kükürü de, angü si-ngü gbü ïrï Meleke-Sadiki la gü ba, “Miri te ngbü emere ngü gbü jia Me ereke areke.” Miri Meleke-Sadiki, ah kpah de miri ka Salema. Amba si-ngü gbü ïrï de Salema ne gü ba, “Zö-ngbüngbü.” 3 Ngü ka Miri Meleke-Sadiki koro ka-ye bü gbogbogbo! Baka te wüh ba ngü ka Miri Meleke-Sadiki gbü *Ngari Me ne, wüh ba ïrï wö ye na nda-wü de. Wüh ba ïrï ni ye na kpah de. Wüh ba ïrï wü kundu ye na kpah de. Nih wu wü sïkpï anga re te wüh bï engu tete ne kpah de. Wüh je nga kpi kaka-na nda-wü kpah de. Ah ge baka te engu ngbü ka-ye ta ezükü, fï mere badi. Te ah bala, ngü kaka ka-ye baka nda Yesu, Ye Me, te di de mere mürü gele, te reke ngü ezengba nih de wü Me, fï mere badi ne.

4 Ceka la! Miri Meleke-Sadiki ta de mere kpeke kpara. Angü mere kundu nih, Abarayama, to ta takpa fefe baka tari-e, teka acu ngüngü na di. Wüh ngbü eto takpa de bala fü mere kpara de? Te ah bala la, Miri Meleke-Sadiki me-ye de mere kpara, te fa Abarayama ka. 5 Gbü gele ka-nih, wü di enga *Yïsarayele, wü mürü gele ka-nih ka-wü ꞌburu gbü nguwa *Levi. Amba nih ꞌburu de wü kundu ye Abarayama. Te di bala, de-nih, wü di enga Yïsarayele ꞌburu, nih ngbü eto takpa ka tari-e fü wü mürü gele la, angü rïrï ka-nih mala bala. 6 Miri Meleke-Sadiki ta de mürü gele ka mere Me, amba engu gbü nguwa Levi nda de. Abarayama me-ye de mere kundu ye Levi. Engu kpah de kpara te Me mala ngü fefe na, gü ba, “Ni ena ato mere wazi fü ye, fü nguwa ye asibi di afa sü.” Amba Abarayama ta me-ye de kpara te to takpa baka tari-e fü Miri Meleke-Sadiki. Fü Meleke-Sadiki adu ayi-ta Me, teka de Me to wazi fü Abarayama. 7 Kpara te ngbü eyi-ta Me, teka de Me to wazi fü wü bu ye, neh da? Ah de mere kpara de? Te ah bala, Miri Meleke-Sadiki de mere kpara fa Abarayama ka. 8 Te di bala, ah ge baka te wazi Miri Meleke-Sadiki fa wazi wü di enga Levi, wü mürü gele ka-nih, wü di enga Yïsarayele ne, afa. Kpah bala, wü di enga Levi de wü mürü gele ka kotö ne, wüh tï eyi akpi. Amba teka ngü ka Miri Meleke-Sadiki, wüh je nga ngü ka kpi kaka-na nda-wü de. Ah ge baka te engu ngbü ka-ye ta ezükü fï mere badi. 9-10 Abarayama ta de wö ye *Yïsaka. Yïsaka ta de kundu ye Levi, te di de kundu ye wü mürü gele ka-nih, wü di enga Yïsarayele ne. Amba gbü sïkpï ta te Abarayama to takpa la tete fü Miri Meleke-Sadiki ne, o Abarayama bï Yïsaka ta nda la de. Ah baka te wü Levi to takpa kpah eyi fü Miri Meleke-Sadiki la guvu Abarayama. Te ah bala, Miri Meleke-Sadiki me-ye de mere kpara, te fa Levi, de wü kundu ye la, ꞌburu.

11-12 Teka ngü ka *Rïrï, ta te Me to fü nih, wü di enga Yïsarayele, gömö *Müse ne, Rïrï la gü ba, ah le de wü mürü gele la di ꞌburu wü kundu ye *Arona, gbü nguwa Levi. Amba, sidi nga mere bi wü re fütanga Müse, fü Me adu amala gara ngü, gü ba, “Ni ena atima gara mürü gele fü nih, te ena adi baka Meleke-Sadiki, teka fü engu areke ngü ezengba nih de wü ni, Me.” Te mere bi wü mürü gele gbü nguwa Levi la, ena angbü ta ereke ngü ka-nih gbü jia Me fanü la, de bane Me du tima gara mürü gele fü nih, tïne de. Fanü, mere bi wü mürü gele la tï areke ngü ka-nih gbü jia Me nda-wü de. Diri Rïrï la tï areke ngü ezengba nih de wü Me nda kpah de. Dela si-ngü te Me tima gara mürü gele, de engu koro asere to kaje ka *küküwa fü nih, angü Me fü rïrï ka diri gele la eyi. Amba to mürü gele la, ah de kundu ye Arona nda de, angü ngü kaka ka-ye baka nda Miri Meleke-Sadiki. 13-14 To mürü gele ka-nih ne, ah de Miri Yesu. Ah koro gbü nguwa Levi nda de. Engu ka-ye gbü nguwa *Yuda. Rïrï ka Müse mala teka wü mürü gele gü neh fe? Rïrï la gü ba, wü mürü gele la di ꞌburu gbü nguwa Levi. Ah mala ngü teka nguwa Yuda nda de.

15 Te di bala, nih tï eyi awu, gü ba, Me fü ngü ka diri Rïrï la eyi, angü engu du tima Yesu, gü ba, engu de mere mürü gele baka Miri Meleke-Sadiki. 16 Me o Yesu baka mere mürü gele, neh teka ne? Wüh bï engu ta gbü nguwa Levi? Aꞌa, Me o Yesu baka mürü gele, angü engu de kpara te ngbü ka-ye fï mere badi. Engu tï akpi nda de. 17 Yi fï la nga ngü, ta te wüh ba teka Yesu gbü *Ngari Me, gü ba, “De-ni, Me, ni o ye eyi mere mürü gele fï mere badi, baka mere Miri Meleke-Sadiki tane.”* 18-19 Me du fü ngü ka rïrï ka diri gele la eyi, angü gele la tï adu areke ngü ezengba nih de wü Me nda tïne de. Dela si-ngü te Me tima Yesu tete na, teka de engu koro, agü tamu to kaje fü nih, de wazi te fa ngü ka diri gele la afa. Te di bala, de nih o jia nih eküte Yesu, angü Yesu tï eyi areke ngü, te di ezengba nih de wü Me ne, duu me-ye.

20 Kpah bala, ngü ka Yesu fa rïrï ka diri gele ka, teka kïna te Me kïna. Angü ta te wüh fe wü kundu ye Levi tete wü mürü gele ne, Me kïna kïna nda de. 21 Amba, gbü sïkpï te Me fe Yesu tete, Me gü ba, “De-ni, Me, ni kïna kïna eyi, gü ba, ‘Ni o ye eyi mere mürü gele, te ena angbü fï mere badi, teka adi ereke ngü ezengba ni de wü kpara.’ ” Dela ngü ta te Me kïna kïna di. Engu tï afü ngü la nda de. 22 Te di bala, ah le de nih wu, gü ba, ngü ka Yesu fa ngü ka mere bi wü diri mürü gele tane afa. Ah le kpah fü nih awu, gü ba, Yesu tï eyi aküwa nih fanü, angü engu tïne eyi mere *vüngüte ka-nih.

23 Kpah bala, diri wü mürü gele la, wüh ta de kükürü wü kpara ka kotö ne. Te gara kpi eyi la, fü ewü angbü eo gara kpara gbü nguwa ewü la, da kiri ye te kpi la, teka de tima la di fï bü enü kpa engagira nü. Dela si-ngü te wüh sibi fa sü ne 24 Amba, teka ngü ka Yesu, engu tï akpi tïne de. Wüh tï ao gara kpara dada na kpah de. Angü engu ngbü eyi me-ye baka mere mürü gele, fï mere badi. 25 Te di bala, te nih yi-ta Me te ïrï Yesu la, Me ena aküwa nih aküwa fï mere badi. Kükürü de, angü Yesu ngbü eyi fï da eyi-ta Me teka ngü ka-nih, de Me küwa nih.

26 Wü di enga wüna, dela ngü te ma le amala fü yi. Yesu ka-ye me-ye de mere mürü gele ka-nih. Engu me-ye de kpara te ena aküwa nih. Angü engu de züka kpara, *nzïla, te ngü kaka reke gbü jia Me fa sü. Ah mere siti ngü nda kü de. Fü Me ayia ato mere wazi fefe na, adu ao engu ede ye, Mere Miri agbü kpï. 27 Ngü ka Yesu fa ngü ka wü diri wü mürü gele tane ka. Angü Yesu to te-ye, akpi, teka afa nih gbü wü *siti ngü ka-nih, cu de *ngüte ye. Ah mere ngü la ngbee du biringbö. Amba, teka ngü ka mere bi wü diri wü mürü gele, wüh de wü kükürü kpara ka kotö ne. Wüh ngbü ta kpah emere wü gara *siti ngü. Teka ngü la, fü ewü angbü kpah ewa wü nü, eto ngüngüte fü Me, teka siti ngü ka-wü feke, teka de Me boro siti ngü ka-ani la. Wüh le teka angbü eto ngüte wü nü la bala, te nga wü sïkpï ꞌburu, angü ngüte wü nü, ta te wüh ngbü ewete la, tï anza siti ngü nda de.† 28 Te di bala, mene wü kpara ta te wüh o ewü wü mürü gele, baka te *Müse mala gbü *Rïrï ka-ye ne, wüh ta de kükürü wü kpara ka kotö ne, kpah baka nih. Amba, teka ngü ka Yesu, engu ka-ye de Ye Me. Wawazi na fa sü. Engu ka-ye de züka kpara gbü jia Me. Fü Me ayia ao engu baka to mürü gele ka-ye. Fü ah ayia akïna kïna, gü ba, tima ka Yesu tï anza nda de.

* 7:1 7:1 Mü ena amaka ngü ka Miri Meleke-Sadiki gbü Gina Ngü 14:18-20. † 7:1 7:1 Salema de diri ïrï Yerüsalema. ‡ 7:1 7:1 Wü vügü te wü Abarayama mere gü de ewü ne, wü de wü miri ka wü sü bala, te ewü zoro Loto, te di de ye enga ni Abarayama. Mü ena amaka ngü la gbü Gina Ngü 14. § 7:2 7:2 Wü e ta te wü Abarayama za esaka wü vügü ne, wüh ye süsüka na gbü wü da-sü nzükpa nzükpa. Fü ewü aza da-sü biringbö, ato fü Miri Meleke-Sadiki. * 7:17 7:17 Mü ena amaka ngü la gbü Ci ka wü Davidi 110:4. † 7:27 7:27 Mü ena amaka ngü la gbü buku ka Rïrï ka Gele ka wü Levi 9:7.