3
Sebare Digadigana Peter i Yawasa
1 Kao kesana rabisi yai 3:00 nanakasike, Peter ba John si gegae God ana ku yove pari kairavina.
2 Ba namai sebare kesana i tupuwa goyo digadigana, si kabari si gegae God ana ku yove matam ketana, te yoreyorei Matamketa Kepamarina, ba kao patepatena namai si tereterei ba pipiya si riuriu God ana ku yove si riuriu wai ku riurisi i bikawakinana.
3 Ba maranai Peter ba John i kinanisi si riuriu wai, kurisi mane kairavina i kawakinana,
4 saba Peter ba John totorina sebarena kurina si kinana ba Peter i wona, “Ke kinanikai!”
5 Ba sebarena i kinana i kinanisi, i nosinosi bage awaika kesana sita berei.
6 Saba Peter i wona, “Yauku silver ba gold kega ba awaika kariku ai e mamana wai ana berim. Iesu Keriso Nazareth biyina, kana wabai a wonewonim, ke msiri ba ke yewo!”
7 Damanina ba Peter yarona kasunai i yauni ba ibo bimsiriyei. Ba mara kesana kaekaena si yawasa ba si maragata.
8 Ba i sou kaenai i msiri ba yewo i dagui. Damanina i yewoyewo ba i bisusou, ba God i bokabakabari ba yabata si riu God ana ku yove mena.
9 Ba maranai pipiya ereonowasi si kinani i yewoyewo, ba God i bokabakabari
10 wai si kuira momei, kata kona wai mamanina God ana yove matamketana, kana waba Nuwarubaruba naonai i makimakira ba i bikawakinana, ba awaika kurina i tupuwa wai, si sikwanei ba si nota kabakabai.
Peter kurisi i Rumamara
11 Ba bibikawakinina karaku wata Peter ba John kurisi, i bokikita i mamana wai pipiya ereonowasi si wareyei, ba si vera si botu kurisi Solomon ana ku tubotaina.
12 Maranai Peter nikona i kinani wai, i wona, “Agaee! Kata Israel biyimi, awaika kairavina niko wose ko sikwanei? Kinanina bage maruwapimi naki wai kobi kita garegare, nanakasike bage yakai yebo, ama maragatai, ba ama gairenai ka wosei i yewo?
13 Saba Abraham, Isaac ba Jacob ba nosinosita asi God, ana saibisaibirina Iesu i kadarei. Niko Iesu kesanina Pilate i boterei ita nae, saba ko totoyanei ba ko bere taveyei.
14 Saba kona wai Baibaiyawasina Kaobaisiyena ba saba Pilate koi babai wai wasana kasibunuwa pipiyina i botaveyei i nae.
15 Komi yawasa ketana ko kasibunui, ba saba God rabobo ai ibo bimsiri. Ba yakai yebo yabata mataki yai ka kinani.
16 Kona Iesu kana wabai kai tumagana wai, niko sebare ko kinani ba ko kuiri wai i yawasa. Kata kona Iesu kana waba ba bai tumaganai, wai kona i yawasa. Kata karaku nina ereonowami ko kinakinani.
17 Ba warewaresiku, karaku mosi a kuiri kata, ami babada yabata awaika ko wosei Iesu kurina wai, ami kita bigaruwana tepanai.
18 Ba kona wai God matapa naki i mamatara ana peroperoveta kurisi, kata Baibaiyawasina Kaobaisiyena ita paiwara, ba nanakasike i tupuwa.
19 Ami piragagoyoai koi nuwabirabira ba ko veramaga God kurina wai ami piragagoyosi ina notataveyisi, ba Bada ini waubiraimi.
20 Kata Kanuma ana maragata Bada karinai ina botu wai, Iesu matapa i binei wai kairavimi ini porai.
21 Ba sapamai ina mamana yepo God awaika erenowana ini waubirai. Ba nikona wai matapa naki i kaobaiyoyobana ana peroperoveta kaobaisiyesi kurisi.
22 Kata Moses i wona, ‘Bada ami God, wai peroveta kesana komi kamomi yai ba karimi yai ina bokabari yauku rutainiku, ba awaika ereonowana ina wonimi wai ko nonori.
23 Ba kotoi wata peroveta kega ina nonora wai, ana pipiya kamosi yai, God ini su kwabina taveyei.’
24 Ba peroperoveta ereonowasi, Samuel ba iyabosi murinai si botu wai, awaika si bisisiyei wai bisuwona karaku niko maranai e tuputupuwa.
25 Komi kona peroperoveta natunatusi, ba bidamanina maragasina wai God ba tamatamami yabata si wosei. God Abraham kurina i wona, ‘Kom am rakaraka kamonai pipiya kesana ana binei ba konai pipiya ereonowasi dobu ai ani gairenisi.’
26 Kona kairavina God ana saibisaibirina Iesu i porai kurimi, kata iti gairenimi, kata kesakesasike wata ami goyosi yai ita bo bitotorimi.”