25
Esau ba Jacob si Tupuwa
19 Nikona wai Isaac ana rurutuwa kona wai Abraham natuna.
20 Ba Isaac kana bodu 40 ba Bethuel Aram sebare Mesopotamia biyina natuna Rebecca i rabai ba kona wai Laban nobuna.
21 Isaac kaowana kairavina Bada kurina i rupari basuna kaipokina. Bada ana pari i nonori wai i manawa.
22 Ba siyanai wai wawaya ruwa ba siyana kamonai si biratu. Ba i wona, “Awaika kairavina nikona kuriku e tupupuwa?” Wai damanina i nae Bada i toirubai.
23 Ba Bada i wonei i wona,
“Dam ruwamo wai kamomi yai;
Dam ruwamo kuni tuvisi wai
kega sini nuwakesana.
Kesana wai maragasina
ba wai kesana mesumesuna;
Iyarokona wai murimurina ina bosaibisaibirei.”
24 Ba kana nawaravi i yauni wai i tuwa wawaya ruwa sebasebare.
25 I nao i tupuwa wai taratarana ba ere sini korokorona wai si yorei Esau.
26 Muri yai i tupuwa wai Esau kaeketunai i bokikita wai si yorei Jacob kata Isaac kana bodu 60 ba i tuvisi.
Esau ana Bibadana Teina Jacob i Bere
27 Maranai pipiyisi gunaguna si rakata wai Esau wai yebaga bitana ba dipa yewoyewona saba Jacob wai magugubina ba yove kara kamonai wata i mamana.
28 Isaac, Esau i nuwayauyauni basuna i yebayebaga wai i bikanisi saba Rebecca wai Jacob i nuwayuyauni.
29 Mara kesana Jacob i gewagewa ba Esau i yebayebaga yepo, soya i rabobo saki wai i botu.
30 Ba Jacob kurina i wona, “Soya a rabobo saki! Misi nao gewagewa taratarana kuta beriku ata kani!” (Kona kairavina yebo si yorei Edom).
31 Ba i wona, “Am bibadana ke kai beriku ba muri yai kam ana berim.”
32 Esau i wona, “Damanina, bibadana ke yauni ba yau soya a rabobo saki. Kota kam wata ke beriku ana kani.”
33 Jacob i kaobeyei i wona, “Ki suwoniku kata am bibadana tupana kuna beriku.” Damanina Isau kaobiyoyobana maragasina i wosei wai ana bibadana tupana Jacob i berei.
34 Damania ba Jacob bread ba gewagewa Esau i berei i kam ba i toma i kakaba wai i tauya i nae. Ba ana biyaroko bibadana i sinikikiyei wai kega i nosi.