28
1 Kata Isaac Jacob i yore, i gaireni ba i kaotunetunei i wona, “Kega Canaan wasike kuna rabai.
2 Yagiyagina ke nae ku Mesopotamia sinam tamana Bethuel ana ku yove. Namai sinam nobuna Laban, natunatuna bibaine kesana kuna rabai.
3 God Maragata Sakina ini gairenim ba kuni tuwa pesara wai dam pesarisi sini tamanim.
4 Ba kom ba natunatum ini gairenimi, Abraham i gaireni wai rutainina ba memei ke mamana kupurina God Abraham i berei wai kuna yauni ini karimi yai.”
Jacob ana Meumeu
10 Jacob, Beersheba i sumarei, ba i tauya i nae ku Haran.
11 Rabisi pompom ai i botu ku kupura kesana ba namai i pom wai iru basekwa, ba akima kesana namai i yauni i kenokira i kunuwanei.
12 Ba i bomeumeu kata wawana kaena tano ai, ba damona i gae ku sapama, ba God ana aneya tepanai si gegae ba si gaigakira.
13 Ba tepanai Bada i msiri ba i wona, “Yauku Bada, tamam Abraham ana God ba Isaac ana God. Ba kom ba am rakaraka, niko kupura tepanai ku kenokira wai ana berimi.
14 Ba rakaraka muri yai te botubotu sina pesara saki wai dobu popokauna rutaina, ba koni kasibuburanimi dobu ereonowana parata ina rakata ku enaga sipuna mena ba ku maramatana mena ba ku yabarata mena ba ku kariwabo mena. Kom ba am rakaraka, ba pipiya dobu ereonowanai ani gairenisi.
15 Yauku kom yabata ba memena wata kuna nae wai ana kita paparim, ba ana urabaim tana veramaga niko ku kupura. Kega ani sumarim yepo awaika a kaobiyoyobanim wai ana wosei.”
16 Jacob i sikwana wai i wona, “Pasinakata, Bada niko kupurai e mamana ba kega a kuiri.”
17 Ba i nagara ba i wona, “Ageee, a bigawara naki, aba naganagarina! Memena bage, niko God ana yove, ba sapama matam ketana.”
18 Mara i tom wai Jacob i sikwana, ba akima i bikunuwanei wai i totori bage tukeke, ba i boroi, ba i berena God kurina.
19 Ba kupurina i yorei Bethel (kona gawarina kainaonai kana waba wai Luz).
20 Damanina Jacob i kaobiyoyobana God kurina ba i wona, “Au bowagawagana kamonai kuna potaiku ba kuna bopapariku, ba kam kuna beriku ba kuni garaiku,
21 ba yawayawasiku ba gaireku ana veramaga tamaku ana ku yove wai damanina kom au God.
22 Ba niko akima ai totori wai God ana yove. Kona yovenai awaika ereonowana kuna beriku wai 10 kamonai, kesana ani neveramagei.”
Jacob i nae ku Haran ba Laban natunatuna bibaine ruwamo Leah ba Rachel i rabaisi. Ba Laban kairavina i bobagibagi bodu 14 kata i gimona taveyisi. Damanina ba God i wonei rawana ana kupura iti sumarei ba ita veramaga tamana ana ku kupura. Si veraveramaga wai ere kumakumarina. Esau ana pipiya yabata asi keta sita potai ba ana rakaraka yabata sita kayo ravisi.