3
Piragagoyo Dagudaguna
1 Aba payapayaya ereonowasi Bada God i wosisi wai mota wata ana kuira i rakata saki. Ba wasike i wonei, “Bisuwona kata God i wona keyama ereonowasi masawa kamonai uwasi kega kona kam?”
2 Ba wasike mota i kaobeyei i wona, “Eee! Keyama uwasi masawa kamonai kana kam,
3 saba God i wona kata, keyama masawa basunai damana e mamana wai uwana kega kana kani kona kana borubai. Kana kani ba kana borubai wai, kana rabobo.”
4 Saba mota wasike i wonei, “Kega kona rabobo.
5 God i kuiri kata kona kani wai, matami sina tamotatara God rutainina gairena ba goyona kona kuiri.”
6 Wasike keyama uwana i kitai wai gairena, ba mata kirokirorona kanina gairena, ba nuwasuya ba kuira yaunina kairavina i waina sakiyei, wai mutusi i yauna i kam ba yebo kaowana mutusi i berei i kam.
7 Ba asi ruwamo matasi si tamotatara, ba si kuira meyisi kata kosi ere nimanimasi wai koveya rurausi, si bobikapukapu ba kasi birupapara si wose.
8 Rabisi nubanai, sebare kaowana yabata, Bada God masawa kamonai i yewoyewo wai kae gugurina si nonori wai nagarina keyama kamosi yai si koba.
9 Ba Bada God sebare i yore i wona, “Kom memena?”
10 Ba i kaobeyei, “Masawa kamonai a nonorim ba a nagara wai a koba kairavina yauku ere nimanimaku.”
11 Ba Bada God i wona, “Kotoi i wonim kata kom ere nimanimam? Memena keyama uwana a kaotunetuneim kega kuta kani wai, yakae ku kani?”
12 Saba sebare i wona, “Wasike ku beriku wai, kona keyama uwana i beriku a kani.”
13 Damanina Bada God wasike i toirubai i wona, “Awaika kairavina nikona ku wosei?”
Ba wasike i wona, “Mota i kwarumiku wai a kani.”
God Bibuibuiya i Yoneyonei
14 Damanina Bada God mota i wonei, “Niko wose ku wosei wai kom a kaonawaim.
Aba payapayaya manamisi ereonowasi kamosi yai,
ba garagara aba payapayayisi ereonowasi kamosi yai!
Kom siyami ai kuna botete ba momokara kuna kani
am yawasa ereonowana kamonai.
15 Ba kom ba wasike basumi ai abiya ana terei,
ba kom natum ba kona natuna;
Ba kom gayamim ini utu gudai
ba kom am pesi kae ketuna ina yowa.”
16 Ba wasike kurina i wona,
“Am bituwa maranai am sini yara
ana wosei ina rakata saki;
ba sini yara kamonai kuni tuwa.
Ba am waina saki kaowam,
saba kona ini badim.”
17 Ba Adam kurina i wona, “Kaowam ku bosisirei ba keyama uwana a kaotunetuneim kega kuta kani, wai ku kani kona;
Kairavina tano a kaonawai;
siniyarai kuna saibira ba kuna kam
am yawasa ereonowana kamonai.
18 Sinamona birugoragorasi tano ai
sina rutiti kairavim
ba kwapu kamsi kuna kam.
19 Ba poyapoyami ai kuna kam kam
yepo kuna veramaga ku tano.
Kairavina kom tano momokarinai ku botu
ba yebo kuna veramaga ku momokara.”
20 Adam kaowana kana waba i yorei Eve, basuna kona wai pipiya ereonowasi sinasi.
21 Bada God Adam ba kaowana yabata kasi gara aba payapayaya kwapirisi yai i wose ba i kotisi.
Adam ba Eve Masawa si Kasibau Taveyei
22 Ba Bada God i wona, “Karaku sebare wai kota rutainita, gairena ba goyona i kuiri. Tani gesei, kata kega yarona ina kotoi ba yawasa keyamina uwana ina yauni ina kani, ba ina ma damana.”
23 Damanina Bada God Eden masawinai i pora taveyisi kata tano ai i wosisi wai sita bagibagi yei.
24 Sebare i porai i kasibau murinai, Eden masawina ku maramatana mena aneaneya kasi waba Cherubim i terisi. Ba seri rugweyagweyaurina i terei i bokadakadari ku naona ba ku murina mena yawasa keyamina ketana i msi potai.