20
Moses Akima i Ravi
1 Israel kaikorotona nawaravi dagudagunai si botu Zin ku kupura momna ba Kadesh ai si kwanatu. Ba Miriam i rabobo ba si dogui.
Israel Biyisi si Gwini Mena
2 Ba memena si kwanatu wai okowa kega, ba pipiya si notuwa Moses ba Aaron kurisi ba si gwini,
3 “I gaire kata warewaresita Bada ana Tabernacle naonai si rabobo wai yabata tata rabobo.
4 Awaika kairavina Bada ana pipiya kaikorotona ku botuvisi niko ku kupura momna kata nina ama abapayapayaya yabata kana rabobo?
5 Awaika kairavina kom ku wosei wai Egypt ka kasibau taveyei niko ku kupura goyo tavetaveyina? Memena grain kega, fig kega, grape vine ba pomegranate kega ba yebo toma kairavina wai okowa kega!”
6 Ba Moses ba Aaron pipiya dugu kaikorotona si sumarisi si nae ku Tabernacle matam ketanai naosi yai si peku ku tano ba Bada ana kadara i rerematara kurisi.
7 Bada Moses kurina i wona,
8 “Am ruwakuna ke yauni ba kom ba tuwateim Aaron pipiya koi runotuwanisi ba matasi yai ki sisiya nao ku akima ba okowa ina busira ina kasibau, kom okowa akima kamonai kuna yore kasibauwei wai pipiya kaikorotosi asi aba payapayaya yabata sina toma.”
9 Kata ruwakuna Bada matanai i yauni, i kaotunei wai nanakasike.
Moses Akima i Ravi
10 Moses ba Aaron pipiya duguna akima naonai si kesanisi ba si wonisi, “Koi tainabaenega, komi kawakasekasemi, kata okowa komi kairavimi niko akima kamonai kani kasibauni kona?”
11 Damanina ba Moses yarona i bokabari ba ana ruwakunai akima i ravi mara ruwamo. Ba okowa kaikapona i busira i kasibau ba pipiya kaikorotona asi aba payapayaya yabata si toma.
12 Saba Bada Moses ba Aaron kurisi i wona, “Kega koi tumaganiku ba au kaobaisiyena Israel biyisi matasi yai kega ko bokuwayiku wai niko dugu kaikorotona kega koni naovisi ku kupura a bereberimi wai nakai.”
Aaron i Rabobo
23 Hor koyanai Edom kana biparaparata gwabinai Bada Moses ba Aaron kurisi i wona,
24 “Mara i botu kata Aaron ina rabobo ba nosinosina kurisi ina nae. Ba Israel biyisi tano a berebereisi wai kega nakai ina riu, ba Meribah okowina kairavina ami ruwamo a kaobiyoyobanimi wai koi kasikotobi.
25 Aaron natuna Eleazar yabata keurabaisi, ko gae ku Hor koyana.
26 Namai Aaron kana priest garasi ke botaveyei ba natuna Eleazar ki kotei, kairavina Aaron namai ina rabobo ba nosinosina kurisi ina nae.”
27 Bada Moses i kaotunei wai, nanakasike i wosei, asi tonu pipiya kaikorotona si kinakinasi ba Hor koyana si gaeni.
28 Moses Aaron kana priest garasi i botavetaveyana ba natuna Eleazar i kotei. Ba Aaron namai koya tepanai i rabobo. Damanina ba Moses ba Eleazar si gakira,
29 ba pipiya kaikorotona maranai si kuiri kata Aaron i rabobo wai Israel biyisi ereonowasi kao 30 kairavina si tou.