3
Yoewane Papatayso nungu zageth, yabugud buthpathan
(Mathayu 3.1-12; Mareko 1.1-8; Yoewane 1.19-28)
1 Yoewanen zageth kedha kuykaymaydhin. Senabi thonara Taybiriyoes thanamun Romaniw mina mopakuy. Nuy 15 wathalnga kuyk thanamun. Nubiya apal puwa kuyku mabaygal kedha, Pontiyas Pilatho Yoewdhayalgaw kuykulnga, a Erodh nuy Galilayaw kuykulnga. Nungu tukuyap Pilip nuy kuykulnga thabi koey goegathoepa, Ithuriya a Trakonaytiz, a koey goegath Abilene thanamun mopakuy Laysaniyas.
2 Thanamun Yoewdhayalgaw kuyku misnare sepalbi thonara Anas a Kayapas. Wa, palamun thonara nanga Awgadhaw yangukudu ngapa Yoewanelpa, Zakarayan kazipa, nuy mabaygoegi dhadhabuthoenu.
3 Nuy mura maw tharepu muynu Yuridhaw Koesaw dhadhabuthiya. Nuy kedha umepu, ‘Adhapa ngithamun wati igililmay pawangu, adhapa garthil thayemiw a ngapa papthayso moeypa ngithamun wati pawapa mura gud woeyaypa.’ Mabaygal ngaru paptayso mamayin garthil thoeyaypa thanamun wati pawangu, a thanamun wati pawal mura gud woeyamoeyn, a mura garwalgamoeyn; Awgadhan guythuyan senabi gegeyadh.
4 Mina kay paypa kulay Awgadhaw kulba peropethan, Isaya minar paladhin kedha,
‘Yangu wakay poegaypa muynu bupanu
mabaygoegi dhadhabuthanu,
“Buth pathaw, balbay tidaw senabi ruwayl yabugud,
Kuykulmaypa mabapa.
5 Mura muydhal bangal gud mathamoeyne,
mura bangal moegina padal a koey padal apa thoeyamoeyne.
Ruwayl yabugudal mura bangal balbay tidamoeyne,
mura sethabi wati yabugudal ngaru bangal balbay tidamoeyne Kuykulmaypa mabapa.
6 Wagel kay mura mabaygan imane kedha,
Awgadhaw Gudaz Puydhay Mabayg mangedhe koey poeraparoelnga.” ’
7 Nuy Yoewane adha min tidar kedha thanamulpa setha mi mabaygaw moeyay ngapa nubepa thanamulpa paptayso moeypa, ‘Ngay madhupamiz ngitha yoewthaw mabaygal ngapa ngayapa. Ngithamun mari igililnga ngithamulpa balbayginga lawnga midh? Ngitha midh paru ngulaygal kedha, ngitha lak kedha ngaru koey poeypiyam Awgadhaw thabukiringu? Nungu thonar senaw ngapa ngithamulpa, kasa kay kedha ngitha matha kedha mina nanga thabul muyngu akan pungamoeypa!
8 Ngitha kedha mulayg, “Ngoey Abraman buway, Awgadhaw mina mabaygal.” Sena kasa ngithamun geth wakay thamamay; Awgadhan ngulayg ngitha adhal waniz kupayngu, a wara mabaygal muy arimoeyn, ngithamun buth manin. Awgadhoepa zagethoeginga kedha, nuydh mabayg ayman thabi kulangu, Abramalpa kazil.
9 Ngitha a mura mabaygal matha kedha puy midh, thurik senaw buyal woeydhaypa poethaypa sethabi puypa, apa kuykuya pathaypa sipiya; puyn nanga mina koewsan mayginga, nuyn adhapa pathan a muypa thayan.’
10 Thana mabaygal nubepa yapu poeybemir kedha, ‘Wa, kedha midh, ngoey bangal midh memayine?’
11 Nuydh Yoewane sakar pudhaydhin thanamulpa kedha, ‘Nginu nanga ukasar koey sodh, matha ngoedhagidh ngidh poeybar urapun nubepa senaw nga nanga zagig a matha kedha ay, senaw nga nanga aygig, ngidh poeyban nubepa.’
12 Bokadhzoengu garwoeydhamay mabaygal lak kedha ngapa, nubepa thanamulpa paptayso maypa. Thana kedha nubepa, ‘Ngurpay mabayg, ngoey bangal midh memayine?’
13 Nuy kedha thanamulpa, ‘Bokadhzangu garwoeydhamay nanga, kasa balbaygi bokadhza mar mabaygoengu, kuyk ngithamun sabi midh nanga. Lak wara bokadhzapul pasinu maygi.’
14 Koewbu mabaygal lak kedha yapu poeybemir, ‘Wa, ngoey bangal midh memayine?’ (Thanamun koewbu mabaygal matha kedha kunumay mabaygal.) Nuy kedha thanamulpa, ‘Koey kuyk woelayg mabaygoepa, a thanamulngu bokadhzapul koey dharadh maygi, aka poelayg thana, kuyk ngithamun sole yaday ngithamun kuyku mabaygoepa. Ngitha moegina bokadhza gasampa ngithamun zagethaw modhabiya, sena matha ngoedhagidh ngithamulpa.’
Mabaygan koersar wakay thoemamaydhin
15 Mura sethabi thonara mabaygan koey garsar wakay thoemamaydhin kedha, ‘Yoewane sike Awgadhaw Mina Adhapa Thamayzinga, Keriso.’ Kuyk thana Kerisolpa thural yawaypu, a moeydhemipu nungu moengaypa.
16 Yoewane nuy mura gudiya mulaydhin thanamulpa mura kedha, ‘Ngay koey mabayg lawnga, ngath ngitha kasa ngukin paptayso mamayipa, kasa kay kedha ngaybiya nga nanga ngapa wagel, nuy ngaybiya mina adhapudhay nungu poerapar koeyza. Ngay matha ngoedhagidh lawnga nungu azaz sanaw urikampa dhoerdhimaypa. Ngath nabi thonara ngitha matha ngukin papthayso mamayipa, nuydh bangal kay ngitha mina papthayso mamayipu, a nungu papthays mina wardh. Nuydh bangal Maygi Mari ngithamuniya woenaypu.
17 ‘Senabi goeyga bangal na ngoedhe kedha ayboewdhaw thonar midh nanga, Mina Apaw Lagaw Mabayg bangal mangedhe, nubiya nungu zagethaw rug a nuydh bangal dhadhiya dhadh mamayine mina kunaw kapul a wati zapul, ayngu noeral. Ayngu noeral, bupal nuydh adhapa mamayin, adha mulan ingaru muypa thayan. Mina zapul ayde aymoeyn, sawalagoenu waniz.’
18 Matha ina lawnga, nuydh lu palepu thana koeygarsar sakaral yakamoeypu thanamun mina igililmaypa, a koerngaypa Awgadhaw mina yangukudu.
Yoewane Papthayson kunumay lagoenu thayadhin
19 Nuydh matha kedha thanamun kuyku mabayg Erodhalpa koey dharadh mayparuy kuyk nuy nungu tukuypaw ipi gamupa thamadhin nubepa ipi. Nanu nel Erodhiyas. Erodh nuydh pasinu wara wati zapul aymoeypu.
20 Kalanu nuydh adhapudhay gegeyadh aymoedhin, Yoewanen kunumay lagoenu thayadhin.
Yesun Papatayso thonar
(Mathayu 3.13-17; Mareko 1.9-11)
21 Wagel kay Yoewanen kunumay lagoenu thayadhin nuydh kulay paptayso mamayidhin mura mabaygal. A thanamuniya kalmel Yesu lak kedha ngapa Yoewanelpa nubepa papthayso maypa. A nungu paptayso kalanu nungu thoeythu poegay. Balbayginga senawbi thonara dapar gud pudhaydhin,
22 A sizi ngapa mulupa Maygi Marin uruy gamu ngoedha madhin a nubiya gimal aymay, a matha kedha yangu wakay ngapa daparoengu kedha, ‘Ina Ngaw Geth Mamal Kazi, nuy ngayapa mina matha ngoedhagidh.’
Yesun thathiw thathil
(Mathayu 1.1-17)
23 Wa, senabi kalanu Yesu nungu zageth kuyk aymoedhin nungu wathal sey kedha thoerti. Nuy midh thonara moegina mapeth mabaygoepa kedha nuy Yoewsepan kazi. Yoewsepa nuy Elin kazi.
24 Eli nuy Mathathan kazi,
Mathatha nuy Lebin kazi, Lebi a Melkin kazi,
Melki nuy Zanayn kazi, Zanay nuy Yoewsepan kazi.
25 Yoewsepa nuy Mathathayasan kazi,
Mathathayas Aymosan kazi, Aymos a Naman kazi,
Nama Eslin kazi,
Esli Nagayn kazi.
26 Nagay Mathan kazi,
Matha Mathayasan kazi,
Mathayas Seman kazi,
Sema Zosikan kazi,
Zosika Zodan kazi,
a Zoda Yonan kazi,
a Yona Resan kazi.
27 Resan Zerubaybelan kazi,
Zoerababel Seyaltiyalan kazi,
a Seyaltiyal Nerin kazi.
28 Neriya Melkin kazi,
a Melki Adin kazi,
Adi nuy Kosaman kazi,
Kosama Elmadaman kazi,
Elmadama Eran kazi.
29 A Era Zosuwan kazi,
a Zosuwa Elayzan kazi,
Elayza Zoriman kazi,
Zorima Mathathan kazi,
Mathatha Lebin kazi.
30 Lebi Simiyonan kazi,
Simiyon Yudhan kazi,
Yudha Yoewsepan kazi,
Yoewsepa Yonaman kazi,
Yonam Elikaman kazi.
31 Elikam Mileyan kazi,
Mileya Menan kazi,
Mena Mathathan kazi,
Mathatha Nathoenan kazi,
Nathan Dhawithan kazi.
32 Dhawitha Zesin kazi,
Zesi Obedan Kazi,
Oben Bowazan kazi,
Bowaz Salmonan kazi,
Salmon Nasonan kazi.
33 Nason Aminoedaban kazi,
Aminoedaba Adiminan kazi,
Adimin nuy Aronan kazi,
Aroen nuy Ezronan kazi,
Ezron nuy Perezan kazi,
Perez nuy Yudhan kazi.
34 Yudha Yakubun kazi,
Yakubu Isakan kazi,
Isaka Abraman kazi,
Abrama Teran kazi,
Tera nuy Nayon kazi.
35 Nayo Serugan kazi,
Serug nuy Rewan kazi,
Rewa nuy Pelegan kazi,
Peleg Eberan kazi,
Eber Selan kazi.
36 Sela Kananan kazi,
Kanana nuy Arpakasan kazi,
Apakas nuy Seman kazi,
Sem nuy Nowan kazi,
Nowa Lamekon kazi.
37 Lameko nuy Matuselan kazi,
Matusela nuy Enokan kazi,
Enoka nuy Zaredan kazi,
Zareda Malalelan kazi,
Malalel Kananan kazi,
38 Keynana Enosan kazi,
Enos Sethan kazi,
Seth Adhaman kazi,
a Adham Awgadhaw kazi.