4
Jikyꞌa̱jtʉn diꞌibʉ Dios tyukjotkʉdakypy
1 Mʉguꞌugítʉty, ma̱a̱nʉm kyakejxyñʉm nꞌakꞌawanʉyándʉp nandʉꞌʉnʉ wiingátypyʉ. Ko oj nguꞌixtʉ, nga̱jxwijtʉ wiꞌix miits mjikyꞌáttʉt éxtʉm ja Dios ttseky, es tyámʉts nꞌamdoy es waanʉ niꞌigʉ dʉꞌʉn mꞌakjikyꞌáttʉt.
2 Mʉt ko miits mnija̱ꞌa̱dʉp yajxón ko yʉꞌʉyʉts ʉj tʉ nyaꞌʉxpeky diꞌibʉdsʉ Nindsʉnꞌa̱jtʉm Jesukristʉ tʉ xytyuknipeky.
3 Pes ja Dios tsyejpy es miits niduꞌuk niduꞌuk mnayyaꞌítʉdʉt wa̱ꞌa̱ts; kyaj pʉ́n myʉꞌindúnʉt.
4 Niduꞌuk niduꞌugʉty miits xyjáttʉt wiꞌix xyjʉjwijtsʉmbíttʉt ja mgʉꞌʉm niniꞌx es mnayyaꞌítʉdʉt wa̱ꞌa̱ts es windsʉꞌkʉn mʉʉt,
5 kyaj pʉ́n ñayyákʉdʉt ja ñiniꞌx tsyojkʉngyʉjxm, éxtʉm ttundʉ yʉ ja̱ꞌa̱yʉty diꞌibʉ kyaj tꞌixꞌattʉ ja Dios.
6 Exkʉm miits niduꞌuk mwinꞌʉʉndʉ o mbekytyundʉ mʉt ja mmʉguꞌugʉ ñʉdoꞌoxy. Tʉts miits nꞌanʉʉmʉdʉ es tʉ nꞌawánʉdʉ ko Dios tyʉydyunaampy jantsy mʉk tsa̱a̱tsy tʉgekyʉ diꞌibʉ dʉꞌʉn adʉ́tstʉp.
7 Pes Dios tʉ xywyoꞌom es xyjaꞌayꞌata̱ꞌa̱nʉm es njikyꞌa̱jtʉm tuꞌugʉ jikyꞌa̱jtʉnʉ wa̱ꞌa̱tspʉ; kyaj tʉ xywyoꞌom es njikyꞌa̱jtʉm ja jikyꞌa̱jtʉnʉ axʉʉkpʉ.
8 Pa̱a̱ty pʉn ja pʉ́n diꞌibʉ kyaj tmʉjꞌíxyʉ tya̱dʉ ʉxpʉjkʉn, kyaj yʉꞌʉjʉty tꞌʉxtijy ja naxwíñʉdʉ ja̱ꞌa̱y, jaꞌa dʉꞌʉn ja Dios, diꞌibʉ tʉ mmoꞌoyʉdʉ ja ꞌyEspíritʉ Santʉ.
9 Es éxtʉm ja tsojkʉn tukkaꞌaxpʉn, kyaj jyatyimtsékyʉty nnijáyʉdʉt, mʉt ko ja Dios tʉ mduknijáwʉdʉ miidsʉty kʉꞌʉm es mnaydsyókʉdʉt nixim niyam.
10 Pes dʉꞌʉñʉm miits mnaydsyókʉdʉ nixim niyam mʉt nidʉgekyʉ nmʉguꞌukꞌa̱jtʉm diꞌibʉ jikyꞌa̱jttʉp ma̱ tʉgekyʉ Masedoñʉ ñax. Per nmʉnuꞌxtáktʉp, mʉguꞌugítʉty, esʉ mdsojkʉn xyajmʉjwindakꞌadʉꞌʉdsʉt waanʉ niꞌigʉ.
11 Jikyꞌattʉ yajxón es xywyits xymyáydyʉt ja mgʉꞌʉmduunk mʉt ja mꞌa̱a̱ mgʉꞌʉ, éxtʉm tʉ ndukꞌanaꞌamdʉ,
12 es dʉꞌʉn mwindsʉꞌʉgʉdʉt diꞌibʉ kyaj Dios tmʉbʉktʉ, es kʉdiibʉ nandʉꞌʉn ti mdʉgoyꞌa̱jtxʉdʉt.
Wiꞌixʉ Nindsʉnꞌa̱jtʉm jatʉgok myina̱ꞌa̱ñ
13 Mʉguꞌugítʉty, kyajts ndseky es kyaj xyñijáwʉdʉt wiꞌix jyaty mʉt ja diꞌibʉ myʉbʉjktʉbʉ naty ja Jesukristʉ ko ꞌyoꞌktʉ, kʉdiibʉ miits mjotmayꞌooktʉt éxtʉmʉ wiingátypyʉ diꞌibʉ kyaj tjʉjpꞌíxtʉ ko Jesukristʉ yajjikypyʉkaampy diꞌibáty jyaꞌaꞌa̱jttʉp.
14 Nmʉbʉjkʉm yajxón ko dʉꞌʉn éxtʉmʉ Jesukristʉ jyikypyejky ma̱ ꞌyeꞌky, nandʉꞌʉn nmʉbʉjkʉm ko Dios yajjikypyʉkaampy ja oꞌkpʉty diꞌibáty tʉ tmʉbʉktʉ ja Jesús.
15 Dʉꞌʉnʉts miits nꞌawánʉdʉ éxtʉmʉ Nindsʉnꞌa̱jtʉm kʉꞌʉm jyʉnáñ, ko diꞌibáty ʉdsa̱jtʉm akjikyꞌa̱jtʉm ko jya̱ꞌtʉt jatʉgokʉ Nindsʉnꞌa̱jtʉm, kyaj ʉdsa̱jtʉm njoꞌomʉm jawyiin es óknʉm ja oꞌkpʉty.
16 Mʉt ko yʉ Nindsʉnꞌa̱jtʉm Jesukristʉ kʉꞌʉm kʉda̱ꞌa̱ga̱a̱mp tsa̱jpótm, yajmʉdówʉp ko tuꞌuk mʉk kya̱jxa̱ꞌa̱ñ mʉt ja kutujkʉn, ka̱jxʉp ja arkanklʉs es xuꞌuxʉp ja Diosʉ tyrompetʉ, net ja diꞌibáty myʉbʉjktʉ ja Kristʉ ko ꞌyoꞌktʉ, jikypyʉ́ktʉp jawyiin;
17 óknʉm diꞌibáty tʉ nwʉꞌʉmʉm jikyꞌa̱jtpʉ nyajmʉjoꞌomʉm tiꞌigyʉ mʉt yʉꞌʉjʉty yoodsóty, es nbátʉm ja Nindsʉnꞌa̱jtʉm pojoty, es dʉꞌʉn nꞌijtʉm mʉt ja Nindsʉnꞌa̱jtʉm winʉ xʉʉ winʉ tiempʉ.
18 Pa̱a̱ty mʉdʉ tya̱dʉ ayuk nayyajjotkujkʉdʉ nixim niyam.