5
1 Ya̱ naxwiiñ yʉ teedywyindsʉngópkʉty yajtukwijtstútp ma̱ yʉ ja̱ꞌa̱yʉty, es yajtuknika̱jxpéty éxtʉm ja ja̱ꞌa̱yʉty ja kyudʉnaabyʉ ma̱ Dios, es tmayꞌat twindsʉꞌʉgʉt ja Dios mʉt jaꞌagyʉjxm ja ja̱ꞌa̱yʉdyʉ pyojpʉ.
2 Es komʉ tadʉ teedywyindsʉngópkʉty pojpʉ ja̱ꞌa̱yʉty nandʉꞌʉn, mba̱a̱t tmʉdaty ja paꞌꞌayoꞌon mʉt ja tsuudʉjkʉty es diꞌibʉ tuundʉgooy ka̱jxtʉgooydyʉp,
3 pa̱a̱ty koonʉm tmoꞌoyʉt ja Dios ja windsʉꞌkʉn mʉt jaꞌagyʉjxmʉ kyʉꞌʉmbojpʉ, nandʉꞌʉn mʉt jaꞌagyʉjxmʉ ja̱ꞌa̱yʉdyʉ pyojpʉ.
4 Ni pʉ́n mba̱a̱t kyanaybyʉjtaꞌagyʉty kʉꞌʉm éxtʉmʉ teedywyindsʉngópk, Dios yʉꞌʉ dʉꞌʉn diꞌibʉ wyinꞌijxypy diꞌibʉ yajtʉkʉyaampy ma̱ tya̱dʉ tuunk, dʉꞌʉn éxtʉm jékyʉp twinꞌijxy ja Arón.
5 Es nan ni yʉ Kristʉ kyanaybyʉjtákʉ kʉꞌʉm éxtʉmʉ teedywyindsʉngópk, Dios yʉꞌʉ dʉꞌʉn diꞌibʉ pyʉjták ja Kristʉ, éxtʉm jyʉnáñ ma̱ jyaaybyajtʉn:
Ʉjts mij xyTyeetyꞌa̱jtp.
Tyámʉts ngʉxʉꞌʉgʉt kots mij nꞌUꞌunkꞌáty.
6 Es nandʉꞌʉn ja̱a̱ybyéty ꞌyity jatuk peky:
Mijtsʉ dʉꞌʉn mdeetyꞌa̱jtp winʉ xʉʉ winʉ tiempʉ,
dʉꞌʉn éxtʉmʉ Melkisedek.
7 Ko tya̱dʉ Jesús jyikyꞌajty ya̱ naxwiiñ, net kya̱jxtáky es mʉk jyʉʉy, es tꞌamdooy tpʉjktsooy ja Dios diꞌibʉ mba̱a̱t kyutiky es kyaj ja Jesús ttuknáxʉt ja oꞌkʉn. Amʉdoona̱jxʉ Dios jaꞌagyʉjxm ko tmʉmʉdooy.
8 Es oy jyaDiosꞌuꞌungʉty, jya̱jt tmʉmʉdówʉt ja Tyeety jaꞌagyʉjxm ko ꞌyayooy;
9 es ko ttuunda̱a̱y tʉgekyʉ diꞌibʉ Dios tsyejpy, jaꞌagyʉjxm dyajnitséky winʉ xʉʉ winʉ tiempʉ nidʉgekyʉ diꞌibáty nandʉꞌʉn mʉmʉdoojʉp,
10 es ja Dios tʉ pyʉjtaꞌagyʉty teedywyindsʉngópk, dʉꞌʉn éxtʉmʉ Melkisedek.
Kujotmay ko nmastútʉm ja mʉbʉjkʉn
11 Taanʉm may diꞌibʉts nꞌaktukjaygyukʉyaampy, per tsip es ndukniꞌíxʉdʉt miidsʉty, mʉt ko tʉ mjʉmbittʉ kujuun.
12 Taaxyʉp miidsʉty mjayaꞌʉxpʉjknʉ ma̱ wiinkpʉty, mʉt ko tʉ jyajknʉ ma̱ miits xyꞌaxá̱jʉdʉ Jesús; per mdʉgoyꞌa̱jtxʉdʉp pʉ́n mdukꞌʉxpʉ́kʉdʉp jatʉgok jemy ja tʉyꞌa̱jtʉn diꞌibʉ kyaj tsyípʉty ma̱ Diosʉ ꞌyayuk. Pes miidsʉty dʉꞌʉn mꞌakꞌittʉ éxtʉmʉ maxuꞌungʉn diꞌibʉ kyaj mba̱a̱t tjeꞌxy ja kudʉꞌʉtspʉ, tsyojktʉp pʉ́n yajtsiꞌidsʉdʉp.
13 ¿Es wiꞌix mba̱a̱t tuꞌugʉ maxuꞌunguꞌunk diꞌibʉ tsiꞌtsp ndukꞌʉxpʉjkʉm ja jikyꞌa̱jtʉnʉ oybyʉ es diꞌibʉ axʉʉk? Kyaj mba̱a̱t tjaygyukʉ, ¿kʉdii?
14 Esʉ tadʉ jeꞌxyʉ tʉꞌʉtspʉ, yʉꞌʉ jeꞌeyʉ taadʉ pʉ́n myʉda̱jtypy ja tyʉts; es nandʉꞌʉn ja ʉxpʉjkʉnʉ tsippʉ, yʉꞌʉ jyaygyujkʉp jeꞌeyʉ ja ja̱ꞌa̱y diꞌibʉ mba̱a̱t tmʉwinma̱ꞌa̱ñbyaaty yʉ oybyʉ esʉ axʉʉkpʉ.