8
Jesús nGudʉnaabyʉꞌa̱jtʉm
1 Diꞌibʉ niꞌigʉ mʉj diꞌibʉts ʉʉdsʉty yam nꞌʉʉ nga̱jxtʉp, jaꞌa ko yʉ Nindsʉnꞌa̱jtʉm Jesús, ndeedywyindsʉngopkꞌa̱jtʉm, ꞌyuꞌuñʉ tsa̱jpótm ma̱ Dios yajkutíky.
2 Jam ja Jesús tyeedywyindsʉngopkꞌáty ma̱ ja tsa̱jptʉjk diꞌibʉ Dios yajkoj tsa̱jpótm. Ya̱ naxwiiñ yʉ wit tsa̱jptʉjk diꞌibʉ Moisés yajkoj, yʉꞌʉyʉ yʉꞌʉ yaꞌꞌagojwinna̱jxʉ tadʉ tsa̱jptʉjk diꞌibʉ tsa̱jpótm.
3 Nidʉgekyʉ teedywyindsʉngópk yajpʉjtáktʉ es tmoꞌoydyʉt ja yojxʉn esʉ windsʉꞌkʉn ja Dios, pa̱a̱dyʉ Jesús koonʉm dyaky ja windsʉꞌkʉn nandʉꞌʉn.
4 Kooxyʉp ja Jesús jyaaty ya̱ naxwiiñ, ni jeꞌeyʉxyʉp kyateetyꞌáty, mʉt ko taanʉmʉ teedyʉty diꞌibʉ ya̱jktʉp ja windsʉꞌkʉn éxtʉm dyajnigutúkʉ ja Moisesʉ ꞌyanaꞌamʉn.
5 Perʉ tya̱dʉ windsʉꞌkʉn, yʉꞌʉyʉ ñikojtútʉn diꞌibʉ jam tsa̱jpótm; dʉꞌʉn yʉꞌʉ éxtʉm ko Moisés dyajkojáñ ja wit tsa̱jptʉjk, ta Dios ꞌyanma̱a̱yʉ: “Yajkoj meerʉ éxtʉm ja ijxpajtʉn diꞌibʉ ndukꞌijx ma̱ Sinaꞌii Kopk.”
6 Per ja tuunk diꞌibʉ tyiimpy ja Jesús tsa̱jpótm, yʉꞌʉ niꞌigʉ tmʉdaty ja mʉjꞌa̱jtʉn kʉdiinʉm ja tuunk diꞌibʉ pyaduundʉp ja Moisesʉ ꞌyanaꞌamʉn, mʉt ko Jesús yʉꞌʉ dʉꞌʉn nGudʉnaabyʉꞌa̱jtʉm ma̱ yʉ jembyʉ kajxyꞌátypyʉ. Tya̱a̱dʉ diꞌibʉ jembyʉ tʉ ꞌyoyʉ, waanʉ niꞌigʉm yʉꞌʉ ꞌyóyʉty es niꞌigʉ oy ja wa̱ndakʉn diꞌibʉ mʉʉt kʉdiinʉm ja Moisesʉ ꞌyanaꞌamʉn.
7 Kooxyʉp yajxón tyuuñ ja kajxyꞌátypyʉ diꞌibʉ jawyíñʉp, kyajxyʉp tʉ dyajtʉgátsy mʉt ja wiinkpʉ.
8 Perʉ Dios pyekymyooy ja israelitʉ ja̱ꞌa̱yʉty, es jyʉnáñ:
Ja̱ꞌta̱a̱mp ja tiempʉ es nyaꞌóyʉdʉts ja jembyʉ kajxyꞌátypyʉ mʉt ja israelitʉ ja̱ꞌa̱yʉty esʉ Judaa ja̱ꞌa̱yʉty.
9 Per kyaj dyʉꞌʉnʉty éxtʉm diꞌibʉ jékyʉp nyaꞌʉyʉʉyʉts mʉt ja ꞌyaptʉjkʉty
kots nyajpʉdsʉʉmdʉ ma̱ Ejiptʉ ñax,
éxtʉmʉ uꞌunkteety ko tmatsy ja ꞌyuꞌunk kyʉꞌʉgʉjxy es tkwentʉꞌaty dyajtuꞌuyoꞌoy;
per yʉꞌʉjʉty kyaj tkuydyuundʉ ja kajxyꞌátypyʉ diꞌibʉts nmʉda̱jttʉ,
pa̱a̱dyʉts nmastuty.
10 Per ja̱ꞌta̱a̱mp ja tiempʉ ma̱ts ʉj ja nꞌanaꞌamʉn nbʉjta̱ꞌa̱gʉt ma̱ yʉ israelitʉ jyot wyinma̱ꞌa̱ñʉty,
éxtʉmxyʉp kyʉxja̱ꞌa̱yʉty nekykyʉjxy.
Ʉjtsʉ dʉꞌʉn xyDyiosꞌátʉp,
es yʉꞌʉjʉty nja̱ꞌa̱yꞌátʉpts.
11 Kyaj ni pʉ́n nʉjx ttukniꞌꞌixʉ es ni tkaꞌꞌanʉʉmʉt yʉ myʉguꞌuk:
“Ixyꞌat ja Nindsʉnꞌa̱jtʉm”,
pes nidʉgékyʉts nʉjx xyꞌixyꞌattʉ, myʉjja̱ꞌa̱y myutskja̱ꞌa̱yʉty.
12 Nmaꞌxʉpts ʉj tʉgekyʉ diꞌibʉ tʉ ttuundʉgóydyʉ,
es kyajts nnakyjyamyátsʉt ja pyojpʉty.
13 Ko Dios jyʉnaꞌañ ko dyaꞌoyʉyaꞌañ ja jembyʉ kajxyꞌátypyʉ, yʉꞌʉ xytyuknija̱ꞌa̱m ko tʉ tyujknʉ es kyaj ñakytyúñ ja kajxyꞌátypyʉ diꞌibʉ jékyʉp oꞌoyʉ; es diꞌibʉ jeky tʉ ꞌyijnʉ, tim tsojk kyutʉgoyánnʉ.