18
Tuꞌun ndichi xaꞌa iin ñaꞌa ña ndukuaan xiꞌin ra Juez ra iku ni
1 Ra saa ndikaꞌan Jesús iin tuꞌun ndichi xiꞌin ndia itaꞌan xiꞌin ra, ña xiniñuꞌu ni kaꞌan ndia xiꞌin Ndioxi iin ndisaa kii, ra na ndïko ini ndia.
2 Ra saa ndikaꞌan ra kachi ra saa:
―Ndixiyo iin ñuu kaꞌnu ra ikan ndixiyo iin ra juez ra ndixätoꞌo ra Ndioxi, ra nii yuvi ndixätoꞌo ra.
3 Ra suvi mii ñuu kan ndixiyo tu iin ñaꞌa ña ndukuaan va, ra kanitaꞌan na xiꞌin ña, ra ndixaꞌan ña kaꞌan ña xiꞌin ra juez kan ña na sayukun ra kuachi xiꞌin ña.
4 Ra kuaꞌa ni ichi ndixaꞌan ña nuu ra, ndi su ndixïin ra sayukun ra kuachi xiꞌin ña. Ra te ndiꞌi saa vi ndakani ini ra kaꞌan ra saa: “Vaꞌa ni xätoꞌo yo Ndioxi, ra nii xätoꞌo yo yuvi va,
5 ra xaꞌa ña sandiꞌi ni ñaꞌa yoꞌo yoo, ra na sayukun va yo kuachi xiꞌin ña ra na sandïꞌi ka ña yoo”, kaꞌan ra juez kan ―kachi Jesús xiꞌin ndia.
6 Ra saa ndikaꞌan Jesús kachi ra saa:
―Suꞌva ke xa ra juez ra iku ni kan.
7 Ra kachi ka vi tu Ndioxi, ¿a sandäku ra kuachi xiꞌin na ndikaxin ra tu na kaꞌan na xiꞌin ra ñuu kaꞌñu? ¿Ra a naꞌa ni vi sa ndakuiin ra tuvi ndo?
8 Ra ña ndixa ke kaꞌan yu xiꞌin ndo, chi kama ni va sandaku Ndioxi kuachi xiꞌin na. Ndi su te xa na ndiko yuꞌu ra xaa yoꞌo vichin kixi yu, ¿ra a ndaniꞌi yu yuvi na ndiaa ini yuꞌu? ―kachi Jesús xiꞌin ndia.
Kaꞌan Jesús xaꞌa yuvi na ndasavaꞌa ni mii
9 Ra saa ndatuꞌun Jesús inka tuꞌun ndichi xaꞌa yuvi na ndasavaꞌa ni mii, ra kundasi na inka na, ra kachi ra saa:
10 ―Saa kuu ra ndixaꞌan uvi tiaa veꞌe ñuꞌu kaꞌan ndia xiꞌin Ndioxi. Ra iin ra kuu fariseo, ra inka ra ku ra kaya xuꞌun ndaꞌa na ñuu, ña kuaꞌan Roma.
11 Ra saa ndixaa ra fariseo kan, xikundichi ra ini veꞌe ñuꞌu, ra xaꞌa kaꞌan ra xiꞌin Ndioxi kachi ra saa: “Tata, taxi ni yu tixaꞌvi ndaꞌa kun, saa chi kuëe iyoo yu ta kuꞌva iyoo na kuiꞌna, na ndivaꞌa, ra nii xïka yu xiꞌin inka ñaꞌa; ra ni kuëe iyoo yu ta kuꞌva iyoo tiaa ra kaya xuꞌun yoꞌo.
12 Yuꞌu, ra uvi kii xïxi yu iin semana; ra soko yu nuu xuꞌun ña xakanaa yu”, kachi ra fariseo kan xiꞌin Ndioxi.
13 Ndi su tiaa ra kaya xuꞌun kan, ra xika va xikundichi ra. Ra nii ndixäa ndiee ini ra ña ndoniꞌi ra nuu ra ndivi, chi ndika va ra kani ndaꞌa ra kachi ra saa: “¡Tata Ndioxi, na kundaꞌvi ini kun kuni kun yuꞌu. Saa chi yuꞌu, ra iyoo ni kuachi yu!”, kachi ra.
14 Ra ña ndixa kaꞌan yu xiꞌin ndo, chi xa kaꞌnu va ini Ndioxi xini ra ra kaya xuꞌun kan. Ndi su ndixakäꞌnu vi ini ra xaꞌa ra fariseo kan. Ra ña kan ke takundiꞌi yuvi na xa ni̱nù ni xiꞌin mii kuvi na nduvali va, ra na xa ni̱nu̱ xiꞌin mii kuvi na ndunaꞌnu va ―kachi Jesús.
Kaꞌan Jesús xiꞌin Ndioxi xaꞌa na kuachi vali
15 Ra saa ndixaa sava na xiꞌin na vali seꞌe na nuu iin Jesús, ña na chinduꞌu ra ndaꞌa ra sata na vali kan, ra kaꞌan ra xiꞌin Ndioxi xaꞌa na kuni na. Ra te xini ndia itaꞌan xiꞌin Jesús ra saa xaꞌa ndia ndukueꞌe va ndia xiꞌin na ndixaa xiꞌin na kuachi vali kan.
16 Ra saa kana Jesús na kuachi vali kan ña na kuyachin na nuu ra, ra ndikaꞌan ra xiꞌin ndia itaꞌan xiꞌin ra kachi ra saa:
―Saña ndo na vali ña na kixi na nuu yu, ra säsi ndo nuu na. Saa chi na iyoo ta kuꞌva iyoo na kuachi vali yoꞌo ku na kuchuun koo nuu xaꞌndia Ndioxi chiñu.
17 Ra ña ndixa ke kaꞌan yu xiꞌin ndo, saa chi tu na ndakïꞌin yuvi ichi Ndioxi ra sa na ta kuꞌva xa na kuachi vali, saa ra kuchüun vi na koo na nuu xaꞌndia Ndioxi chiñu ―kachi Jesús.
Ndakatuꞌun iin ra itia kuika Jesús
18 Ra saa kuu ra ndindakatuꞌun iin ra itia ra kuika ra kuu ra xikuaꞌa Jesús kachi ra saa:
―Tata Maestro, ra vaꞌa, ¿ni ke sa yu ña vaꞌa niꞌi taꞌvi yu kutiaku yu xiꞌin Ndioxi ndiaa ndikaa ndikuꞌun? ―kachi ra xiꞌin Jesús.
19 Ra saa ndakuiin Jesús kachi ra saa xiꞌin ra:
―¿Nichuun kaꞌan kun “ra vaꞌa” xiꞌin yu?, saa chi köo ndia nii yuvi na vaꞌa, chi indaa mituꞌun Ndioxi va ku ra vaꞌa.
20 Ra xa xini va kun ndiayu Ndioxi ña kaꞌan kachi suꞌva: “Kïꞌvi kun xiꞌin yasiꞌi inka tiaa, käꞌni kun ndii, xakuïꞌna kun, ra chikäa siki kun kuachi inka na; ra na satoꞌo kun iva kun xiꞌin siꞌi kun” ―kachi Jesús xiꞌin ra.
21 Ra saa ndakuiin ra kuika kan kachi ra saa xiꞌin ra:
―Tata, ta loꞌo vi yu xaꞌa yu kandixa ndiꞌi yu ña ―kachi ra.
22 Ra te ndiꞌi xini soꞌo Jesús ña ndikaꞌan ra, ra saa ndikaꞌan Jesús kachi ra saa xiꞌin ra:
―Iyoo ka va iin ña kumani nuu kun: Xiko takundiꞌi ñaꞌa ña iyoo nuu kun, ra ndataꞌvi kun xuꞌun xiꞌin na ndaꞌvi, ra saa ke taxi Ndioxi ña kuika ña iyoo ndivi ndaꞌa kun vaxi kii. Ra te xa na ndiꞌi, ra na kixi kun kundikun kun yuꞌu ―kachi Jesús xiꞌin ra.
23 Ra te ndiꞌi xini soꞌo ra kuika kan, saa ra kusuchi ni ini ra saa chi kuika ni ra.
24 Ra te xini Jesús ña kusuchi ni ini ra kuika kan, ra saa ndikaꞌan ra kachi ra saa:
―¡Tiaa ni uꞌvi kiꞌvi na kuika ndivi nuu xaꞌndia Ndioxi chiñu!
25 Ra üꞌvi ka vi kiꞌvi iin camello yavi loꞌo xaꞌa tiku, nuu ña kiꞌvi iin ra kuika ichi nuu xaꞌndia Ndioxi chiñu ―kachi Jesús.
26 Ra saa ndikaꞌan na xini soꞌo, ña ndikaꞌan Jesús kachi na saa:
―Tu saa va ke iyoo ña, ¿ra yoo va ku na kuchuun kaku tu saa? ―kachi na xiꞌin Jesús.
27 Ra saa ndakuiin Jesús kachi ra saa xiꞌin na:
―Nuu na yuuvi yoꞌo va ke uꞌvi ni ña yoꞌo, ndi su nuu Ndioxi ra köo ña uꞌvi ―kachi ra.
28 Ra saa ndikaꞌan ra Pedro xiꞌin Jesús kachi ra saa:
―Tata, nduꞌu, ra ndakoo ndiꞌi va ndi ñaꞌa ndi, ra ndakundikun ndi yoꞌo, xika ndi xiꞌin kun ―kachi ra.
29 Saa ndakuiin Jesús kachi ra saa xiꞌin ra:
―Ña ndixa kaꞌan yu xiꞌin ndo: chi takundiꞌi yuvi na ndakoo veꞌe, na ndakoo iva, na ndakoo ñani, na ndakoo yasiꞌi, na ndakoo seꞌe xaꞌa ña ndikun na ichi Ndioxi,
30 Ra kuaꞌa ni ka va ña vaꞌa ndakiꞌin na kan nuu Ndioxi nuu ña yuuvi yoꞌo vichin, ra niꞌi tu na ña kutiaku na ndia ndikaa ndikuꞌun va ―kachi Jesús xiꞌin na.
Xa ichi ña uni kaꞌan tuku Jesús ña kuvi ra
31 Ra saa ndikaꞌan Jesús xiꞌin uxi uvi saa ndia itaꞌan xiꞌin ra kachi ra saa:
―Vichin ke kuꞌun yo ñuu Jerusalén, ra ikan ku nuu xinu ndiꞌi nuu tuꞌun ña tiaa na ndikaꞌan ndoso tuꞌun yuꞌu Ndioxi xinaꞌa xaꞌa yuꞌu ra xaa yoꞌo vichin.
32 Ra ikan ku nuu ndataxi na yuꞌu ndaꞌa yuvi na xïni Ndioxi, ra sasiki na yuꞌu, ra kaꞌan ñaa na xiꞌin yu, ra kondiaa na tiasiꞌi na nuu yu.
33 Ra kani ni na yuꞌu, ra kaꞌni na yuꞌu, ndi su kii uni ra ndatiaku va yu ―kachi Jesús xiꞌin ndia.
34 Ndi su ndia itaꞌan xiꞌin ra ra ndikundäa vi ini ndia xiꞌin tuꞌun yoꞌo, ra nii ndikundäa tu ini ndia ni xaꞌa ke kaꞌan ra xiꞌin va ndia, saa chi tuꞌun ña kundäa ini ndia xiꞌin va ke ndikaꞌan Jesús.
Sandaꞌa Jesús nuu iin ra kuaa ra ñuu Jericó
35 Ra ta kuyachin Jesús kuaꞌan ra xiꞌin ndia itaꞌan xiꞌin ra nuu ñuu Jericó kan, ra yuꞌu ichi kan nduꞌu iin ra kuaa ña ndakan ra.
36 Ra ta xini soꞌo ra kuaa kan ña yaꞌa ni yuvi kuaꞌan na ichi kan. Ra saa ndindakatuꞌun ra kachi ra saa:
―¿Ni ke kuu? ―kachi ra.
37 Saa ndakuiin na kachi na saa xiꞌin ra:
―Jesús, ra ke̱e ñuu Nazaret va ku ra yaꞌa kuaꞌan ―kachi na xiꞌin ra.
38 Ra saa xaꞌa ra iin kokoꞌo kana ra kachi ra saa:
―¡Jesús, seꞌe xikua ra rey David, kundaꞌvi ini kuni yuꞌu! ―^kachi ra.
39 Ra saa nindaꞌyu na inuu kuaꞌan kan nuu ra, ña na koo taxin yuꞌu ra, ndi su ra ndiee ka nindaꞌyu va kuvi ra kachi ra saa:
―¡Jesús seꞌe xikua ra rey David, kundaꞌvi ini kuni yuꞌu! ―kachi ra.
40 Ra saa xikundichi Jesús, ra xaꞌndia ra chiñu nuu na ña na kuꞌun na ndakiꞌin na ra. Ra ta xaa na xiꞌin ra kuaa kan, ra saa ndindakatuꞌun Jesús ra kachi ra saa:
41 ―¿Ni ke kuni kun sa yu xiꞌin kun? ―kachi ra.
Saa ndakuiin ra kuaa kan kachi ra saa:
―Tata, na ndanuña nuu yu ra vaꞌa kotoꞌni yu ―kachi ra.
42 Ra saa ndikaꞌan Jesús xiꞌin ra kachi ra saa:
―¡Kotoꞌni! Chi xaꞌa ña kandixa va kun ke nduvaꞌa kun ―kachi ra.
43 Saa ra ndikun ndanuña va nuu ra kuaa kan ra vaꞌa va ndakoto ra. Saa ra ndakundikun ra kuaꞌan ra xiꞌin Jesús va, ra ndasakaꞌnu ka vi ra Ndioxi kuaꞌan ra. Ra takundiꞌi yuvi na xini ña kuu xiꞌin tiaa kan, ra ^ndasakaꞌnu ni tu na kan va Ndioxi kuaꞌan na.