22
Itia ra ^taxi ña kutiaku na xiꞌin itun tu taxi ña kutiaku na
1 Te ndiꞌi ra saa ndiñaꞌa ra tutun Ndioxi kan iin itia ra kuíí ní nuu yu, ra ra yoꞌo kuvi ra taxi ña kutiaku yuvi. Ra vaꞌa ni ra chi iin ndiakua yeꞌe niꞌni ra, ra nuu íin tiayu kaꞌnu nuu nduꞌu Ndioxi xiꞌin nuu nduꞌu ra kuu ndikachi loꞌo ke kana ra.
2 Ra yáꞌa ra kuaꞌan ra maꞌñu yaꞌya kaꞌnu ñuu chee kan, ra uvi saa xiyo yuꞌu itia kan ndita itun kuii tu taxi ña kutiaku yuvi, ra uxi uvi ichi ke ^kuun kuiꞌi ndaꞌa nu iin kuiya, saa chi ta yoo, ta yoo va ke kuun kuiꞌi kan ndaꞌa nu, ra xiꞌin iku ndaꞌa nu ke ^kutatan takundiꞌi na yuuvi.
3 Ra ñuu kan, ra köo ka ñaꞌa ña tavi chiꞌña. Saa chi mii Ndioxi va kuvi ra kaꞌndia chiñu nuu na xiꞌin ra kuu ndikachi loꞌo, ra na ^xachiñu nuu ra, ra ikan ke ndasakaꞌnu ni ka va na ra.
4 Ra kuni nuu va na Ndioxi, ra kunduꞌu kivi ra tiaan na.
5 Ikan ra köo ka ñuú, ra na kundee ikan ra kuniñüꞌu ka na ña kutuun ñùꞌù nuu na, ra nii ñuꞌù ña nduꞌu ndivi kuniñüꞌu ka na kuyeꞌe nuu na, saa chi mii va Iva yo Ndioxi kuvi ra kuyeꞌe nuu na, ra kaꞌndia na chiñu xiꞌin ra ndiaa ndikaa ndikuꞌun.
Xa ndinumi ni va ndiko tuku Jesucristo kixi ra
6 Ra saa ndikaꞌan ra tatun Ndioxi kan xiꞌin yu kachi ra saa:
―Tuꞌun yoꞌo ra ña ndixa ní va kuvi ña, ra na kundiaa ní ini yo ña. Ra Iva yo Ndioxi, ra taxi ña xinituni ndaꞌa na ndikaꞌan ndoso tuꞌun ra xinaꞌa kuvi ra tiꞌvi tatun ra, ña ña̱ꞌa̱ ra takundiꞌi ña xa ndinumi ni kuu nuu takundiꞌi na xachiñu nuu ra ―*kachi ra.
7 Ra suꞌva ke ^kachi Iva yo Jesús ndikaꞌan ra:
―¡Na kundaa ini ndo chi kama ni va ndiko yu kixi yu! ¡Ra vaꞌa ni va kee yuvi na ^kandixa tuꞌun yii ña kaꞌan Ndioxi, ña vaxi nuu tutu yoꞌo! ―*kachi ra.
8 Yuꞌu, ra Juan, kuvi ra xini, ra xini tu soꞌo va yu, takundiꞌi ña yoꞌo, ra te ndiꞌi xini yu ña xiꞌin ña xini soꞌo yu ña, ra saa ndakusiti yu xaꞌa ra tatun Ndioxi ra ndiñaꞌa ña nuu yu, ña ndasakaꞌnu yu ra.
9 Ra saa ndikaꞌan ra xiꞌin yu kachi ra saa:
―Xä kun saa, chi na ndasakaꞌnu kun Ndioxi va; saa chi ta iyoo yoꞌo ña xachiñu kun nuu Ndioxi, xiꞌin na ndikaꞌan ndoso tuꞌun ra, xiꞌin takundiꞌi na ^kandixa tuꞌun ra ña vaxi nuu tutu yoꞌo, ra ndasakaꞌnu na ra, saa ke iyoo tu yuꞌu va ―kachi ra tatun Ndioxi kan xiꞌin yu.
10 Ra saa ndikaꞌan ka ra xiꞌin yu kachi ra saa:
―Chikäa seꞌé kun tuꞌun yii ña kaꞌan Ndioxi ña vaxi nuu tutu yoꞌo, saa chi xa ninumi ni va kuu ña kaꞌan ña.
11 Ra yuvi na ^xa chiñu kiꞌvi, ra na sa ka na chiñu kiꞌvi va, ra na ^xa chiñu yakua, ra na sa yakua ka na mii va na; ra na ^xa ña vaꞌa, ra na sa ka na ña vaꞌa va, ra na yii, ra na sa yii vaꞌa ka va na ―*kachi ra tatun Ndioxi kan xiꞌin yu.
12 Ra saa ndikaꞌan ka Jesús kachi ra saa:
―Kuenda ni koo ndo chi kama ni va ndiko yu kixi yu, ra ndataxi yu yaꞌvi ta iin ta iin yuvi ndaꞌa na, ta kuꞌva iyoo mii chiñu ña ^xa va na.
13 Yuꞌu kuvi ra nuu, ra yuꞌu kuvi tu ra ndia nuu ndiꞌi va, ra yuꞌu kuvi ra kii xaꞌa, ra yuꞌu kuvi tu ra ndia kii ndiꞌi va ―kachi ra.
14 Ra yuvi na ^ndakatia tikoto, ra vaꞌa ni kee na, saa chi niꞌi na ndiayu ña kaxi na kuiꞌi ña iyoo ndaꞌa itun kuii tu taxi ña kutiaku na, ra kuvi tu kiꞌvi na yeꞌe ñuu yii kan va.
15 Ndi su chi keꞌe va tu kindoo yuvi na kuu tina, xiꞌin na tuꞌva na kuu na saka, xiꞌin tiaa ndia ^xa siki yasiꞌi, a na siꞌi na ^xa siki yii va tu, xiꞌin na xaꞌni ndii, xiꞌin na kañuꞌu ndioxi ña kuu naꞌna, xiꞌin takundiꞌi na kutoo ní sandaꞌvi yuvi ra ^xa na chiñu kiꞌvi.
16 Ra saa ndikaꞌan ka Jesús kachi ra saa:
―Yuꞌu, ra kuu Jesús kuvi ra tiꞌvi iin ra tatun yu xaa ra nuu takundiꞌi na veꞌe ñuꞌu, ña ndatuꞌun ra xiꞌin na xaꞌa ña kuu. Ra yuꞌu kuvi ra kuu ndiseꞌe ra rey David, ra kuu tu yu Kimi ri yeꞌe ní, ri kanata te tuvi va ―kachi ra.
17 Ra Tachi Yii Ndioxi xiꞌin na veꞌe ñuꞌu na kuu yasiꞌi ra kuu ndikachi loꞌo, ra suꞌva ke kachi na kana na:
―Naꞌa ndo ―kachi na.
Ra yuvi na ^xini soꞌo, ra na kana tu na kan va yuvi ña kixi na, ra na íchi̱ ini ña kuni koꞌo na tiakuii, ra na kixi na, ra koꞌo na tiakuii ra taxi ña kutiaku na, ra koꞌo uun va na ra, chi köo yaꞌvi ra.
18 Ra takundiꞌi yuvi na ^xini soꞌo tuꞌun yii ña kaꞌan Ndioxi, ña ndikaꞌyu nuu tutu yoꞌo, ra kaꞌan yu xiꞌin na ña kuenda ni na koo na, saa chi tu ndia iin na, na ndachinuu siki tuꞌun yoꞌo, saa ra niꞌi na tundoꞌo xaꞌa va ña sa Ndioxi, tundoꞌo ña xa kaꞌan mii tutu yoꞌo xaꞌa ke niꞌi va na.
19 Ra tu ndia tu na, na kindiaa taꞌan tuꞌun yii ña kaꞌan Ndioxi, ña ndikaꞌyu nuu tutu yoꞌo, saa ra, saa sa tu Ndioxi xiꞌin va na, saa chi täxi ra ña koo kivi na nuu tutu ña kaꞌan ña kutiaku na xiꞌin ra, ra nii ñuu yii kan täxi ra kiꞌvi na koo na, xa ta kuꞌva kachi mii tutu yoꞌo va.
20 Jesús ra ^ndakani xaꞌa tuꞌun yoꞌo, ña kuu ña ña ndixa, kuvi ra kaꞌan kachi saa:
―Ña ndixa kuvi va ña, kama ni va ndiko yu ―kachi ra.
Saa iyoo ña. ¡Naꞌa, Tata Jesús!
21 Ra mii Tata yo Jesucristo na taxi ña vaꞌa kutaꞌvi takundiꞌi ndo. Amén.