6
Ivakamus gamags kweinim tawsan
(Matiw 14:13-21; Mak 6:30-44; Luk 9:10-17)
1 Yeisuw anilivan towen ikous mo inoun in palata-dadan yevagam avakaein yagan Galiliy, yagan kweitan Tibeliyas.
2 Singay babaw gamag ikikuns, peinan bo ikines naman mulin takatouns wasigeis, iva̱ges mo ibweins.
3 Ikatulags koy kweitan, siney navamul, mo isinis.
4 Bo kadiyakus tutan sagal, min-Yudiy sisagal, yagan Kaltuwon.
5 Yeisuw mo itamnow matan, ikin singay gamag babaw bo nimeis, idibek Pilip, “Avanuy bitaymiyis kaeis tasiyas beikams?”
6 Ilivan ma̱wan va̱gan biyakwen Pilip. Yeisuw bo ikakin aveiyag mo bivag.
7 Pilip ilana, “Bitaymiyis kan, lakatuy kina nag kadilok kakit gamag siyas katanok katanok beikams.”
8-9 Inavamul teitan, Saymon Pita bwadan, yagan Andiluw, mo ilana, “Gwad towen nises, anbled kekel kweinim, in mwanay; na-ikadilok gamag siyas singay babaw.”
10 Yeisuw ilana, “Kunukwes gamag babaw bisinis.” Ven towen awuyow babaw nisesus, mo isinis wakunuwatan awuyow, tawaw babaw, babiweis mamagina kweinim tawsan.
11 Yeisuw ikow bled towen, ika̱lin nuwan Yowbad waseg, mo ikikivis, isisekes inavamul, ivvageins gamag babaw wasigeis, tasiyas isinis awuyow wakunuwatan. Asiyin ma̱wan, ma̱wan sivines mo isekes, ikams.
12 Ikamuweips ikous, mo inukwes navamul, ilana, “Kusiyavis kan koubwag; awoum iyamkwen kan bises mav.”
13 Bled kweinim, gamag tasiyas kamkwam ikamwages, mo isiyavis; idagis wanuwan kaynad, bo ika̱lawt sinwatan kadiney kaynad.
14 O gamag tasiyas ikines naman mulin Yeisuw mwana nivag, mo ilansa, “Adok mounid palopit towen nitakaymates bo neim.”
15 Yeisuw ikakin gamag tasiyas sivines kid bimeis mo biyousis, binawes va̱gan bimlavag siking, mo inoun anmwa̱net-wan, ikatulag vayuwein in wa̱koy.
Inoun wakunuwatan yevagam
(Matiw 14:22-27; Mak 6:45-52)
16-17 Kwayav waseg inavamul iwloubus ineis wakawalaw, inibwis siwag, mo ikala̱vis bineis Kapaneyum, palata-dadan yevagam. Ibwages peinan bo idadub; tage Yeisuw ta-inekes.
18 Yag avakaein mo itow; kaysay ivag igegayous.
19 Ikala̱vis ee... katanoka veit, mo ikines Yeisuw inoun wakunuwatan yevagam; bo isineikim, bo ivag aspwa̱yat.
20 Iwa̱ge Yeisuw ilana, “Yey! Awoum kuweneigs!”
21 Sivines kid Yeisuw beitouw wa̱wag. Nuwanaw mo ita̱lags wasiven.
Yeisuw kan mwamov silma̱nin
22 Neiyam-nen gamag babaw igawa nisesus palata-dadan yevagam. Nov bo ikines katanoka wag wakawalaw; ta-kwayuwein nises; nag. Ikakins Yeisuw nag itouw sen navamul; siyas-wan itouws ikala̱vis.
23 Tage Tibeliyas wugwanen mwasanin mo ilugs kadilkusana ven towen Yeisuw nivakamus tasiyas, waseg kan towen ikalin nuwan Yowbad waseg.
24 Gamag tasiyas mo ikakins ven makaw; Yeisuw nag ises, navamul nag isesus. Mapuna itouws, ikala̱vis ineis Kapaneyum, mo inineivs Yeisuw.
25 Ininineivs mo iba̱nes Yeisuw wayevagam wanpalatan towen, ilansa, “Tamwey, asina̱vin nukum?”
26 Yeisuw mo ikatimop ages, ilana, “Mounid adibakeimiy, nag kuneveigs peinan kukines namag mulin; nag. Bogo avakamumiy, kukwamuweips, to kuneveigs.
27 “Awoum kuwwotets peinan kan towen bipsa̱pwas. Tage bweina kuwwotets peinan kan towen silma̱nin mwamovamiy nag beikous. Gimgilitoun yey basekeimiy kan towen. Tamag Yowbad bo ikatigikeig wotet towen silma̱nin.”
28 Iliganes, mo ilansa, “Aveiyag bakavag va̱gan bakawtel Yowbad nawotet?”
29 Iw to Yeisuw, ilana, “Yowbad nawotet mamagina bukusimounids waseg yey, peinan nikayabeig nam.”
30-31 Tasiyas ilansa, “Namam mulin aveiyag bukuvag, va̱gan bakakin mo bakasimounid. Tamumwey pwamug-o wanawoud kaeis yagan mana; liva̱nen nises Bukitab waseg, mamagina, ‘Kaeis liba̱lab avanin issekes, ikamkwams.’ Tage ya̱koum, aw-wotet bukuwtel?”
32 Yeisuw mo ilana, “Mounid adibakeimiy, Moses nag isekeimiy liba̱lab avanin; tage Tamag bisekeimiy liba̱lab avanin mounid-wan.
33 Kan towen meinoy neim walba̱lab va̱gan Yowbad bisekeimiy mwamovamiy, ven watinow gimgilis yakamiy.”
34 Mapuna idibakes Yeisuw, ilansa, “O guyaw, kadiloka kussekem kan towen; tuta babaw bakakamkwam.”
35 Yeisuw ilana, “Yey kan, mwamov silma̱nin; kal yak bukumekeig nag beivag amumoun; o kal yak bukusimounid waseg yey nag beivag amdak.
36 “Kweiboug adibakeimiy, peinan nukukineigs tage nag kusimounids waseg yey.
37 Gamag tasiyas Tamag bissekeig mo bimmekeigs kid; o yey nag bapiyaves gamag tasiyas; nag.
38 “Peinan yey bo alisow liba̱lab, a̱bus am ven watinow, silma̱nin bawotet nanon towen nikayabeig Tamag, nanoug tatoneig awoum.
39 “Towen nikayabeig sivinan bisekeig gamag, o sivinan bikayus silma̱nin gungamag babaw tasiyas, nag tatanok bika̱bwag; o basekes mwamoves vayuwein, igaw nakabiyokous tut waseg.
40 Tamag nanon bo ma̱wan. Kal yak bukukin Natun yey, o bukusimounid waseg yey, mwamovam yak mo bises bisigeg. Igaw nakabiyokous tut waseg, mo bava̱geim bukukit vayuwein.”
41-42 Yudiy gimgilis ivtokes livan Yeisuw, peinan ilana, “Yey liba̱lab avanin, a̱bus am watinow”; ilansa, “Adok towen Yosep natun, Yeisuw. Taman, inan takakins; aveiyag silawun anilivan, ‘A̱bus am watinow’?”
43-44 Yeisuw ikatimop asilivan, ilana, “Awoum simsimiyas kuvtokays livan. Misinaka takayabeig Tamag bibiteil gamag, mo bimekeig; nag teitan bimekeig mav; nag. Tasiyas bimekeigs bava̱ges mo beikits vayuwein, igaw nakabiyokous tut waseg.
45 “Palopit teitan nilivnek, anilivan nises Bukitab waseg mamagina,
‘Yowbad mo bikatimlakes tasiyas tababaws.’
Mapuna tasiyas biliganes Tamag aygan, bimulis tasiyas, bikakins, mo bimekeigs, asibabaw-wan.
46 Nag teitan bikin Tamag magin; nag. Misinaka yey; peinan kweiboug soug Tamag nakases.
47 “Mounid adibakeimiy, kal towen tasimounid, mwamovan tonen nag beikous.
48 “Yey kan mwamov silma̱nin.
49-50 Tammwayas siyas tibudayas bo ikams kan yagan mana wanawoud; ikinka̱nigs. Tage kan towen liba̱lab avanin; bo neim watinow. Kukin kal beikam, nag bikanig; nag.
51 “Yey liba̱lab avanin, mwamov silma̱nin; kal beikam waseg yey, mwamovan towen nag beikous. Kan towen woug tatoneig, bo basekeimiy ven watinow gimgilis silma̱nin mwamovamiy yakamiy.”
52 Mapuna min-Yudiy mo ikamminimans sisiyas; mwasanin ilansa, “Ta-ma̱wan taw towen bisekeids won tatonen bitakams.”
53 Iw to Yeisuw, ilana, “Mounid adibakeimiy, kukin nag bukukwams woug, Gimgilitoun yey, ta-ma̱wan bukumovs. Kukin nag bukumoums buya̱vig, nag bukumovs; nag.
54 Kukin kal beikam woug o beimoum buya̱vig, mwamovan tonen bises bisigeg; igaw nakabiyokous tut waseg, mo bavag gamag towen bitamanaw vayuwein.
55-56 Peinan woug kan tonen, buya̱vig soup tonen. Kukin kal beikam woug, o beimoum buya̱vig, soug towen bakases, o yey bases waseg gamag towen.
57 “Tamag Tamwamov nikayabeig nam; Tamag mwamovan waseg a̱mov; ma̱wan-vak kavel bikamwig mo bimwamov waseg mwamovag.
58 Kan towen meinoy neim walba̱lab mounid yey; nag ma̱wan mana towen tammwayas ikamkwams, mo ikanigs; nag. Kukin kal bikamwig, mwamowan bises bisigeg.”
59 Igaw ikatimlakay ven Kapaneyum waseg, ansinap towen igeiguy wanuwan sinagog.
Liva̱nen mwamov bisigeg
60 Navamul mwasinis ikatilutegs anilivan towen, ilansa, “Keikay sinap towen, ta-kal biligen.”
61-62 Yeisuw ikakina wananon inavamul bo ivtokes livan, peinan anilivan keikay, mapuna idibakes, ilana, “Tabta igeg ninoumiy, sinap towen, ne? Magat bukukines Gimgilitoun yey ba̱yum ba̱mwen ban walba̱lab, adok singaya bisunasun ninoumiy.
63-64 Yowbad Kululuwan bisekeimiy mwamovamiy; ta-ma̱wan kalivimiy bilabeimiy; nag. Livan towen nasekeimiy, kululuwamiy o mwamovamiy silma̱nin; tage mwasanin yakamiy ta-kusimounids agulivan towen.” Peinan wanmugwana Yeisuw ikakin kalisiy bisimounids waseg, o kal bisilakod waseg.
65 Ilana, “Peinan kweiboug adibakeimiy: Misinaka Tamag beitam wasigeis gamag kalisiy bimekeigs. Nag teitan bimekeig mav.”
66 Ilivan mamagin, navamul mwasinis mo ipiyaves, ilisawes, inounas.
67 Yeisuw mo idibakes navamul sinawatan asteiy, ilana, “Sivinamiy-tan bukuneis yakamiy?”
68-69 Iw to Saymon Pita, ilana, “O guyaw, bakalisaweim, kal mo bakanek? Ya̱koum waseg liva̱nen mwamovem bises bisigeg. Kasimounid o kakakin mounid ya̱koum Yowbad naMesay ya̱koum.”
70-71 Yeisuw mo idibakes, ilana, “Bo adaweimiy, sinwatan amiteiy; tage Seitan nises waseg tatanok gamag.” Liva̱nen towen Yudas, taman yagan Saymon Iskaliyot; mtowen waseg bod towen, igaw mo bisilkod Yeisuw.