17
Katsilakay silma̱nin sinap kalbaleb
(Matiw 18:6-7; Mak 9:42)
1 Wankuyeim mo idibakes navamuls, ilana, “Mounid gamag mwasanin biyakwanes sisiyas bikatsilakes silma̱nin asisinap kalbaleb, tage tasiyas takatsilakays mo bilivatus kalbaleb.
2 “Kadiloka dakul avakaein biyawanis takatsilakay wakayon bilaves bein wabwanit; mata ge bikatsilek gwad kakit ma̱wana gwad towen, va̱gan kid beivag ansinap kalbaleb.
Kuwid bwadam ansinap kalbaleb
(Matiw 18:21-22)
3 “Kuvna̱seimiy. Kukin bwadam biyagageim, kwamtilek ansinap kalbaleb bikakin. Kukin bikanavin nanon, mo kuwid ansinap, kunumlev.
4 “Kukin katanok yam waseg siva̱nim sivay biyagageim mo siva̱nim sivay bigilagel, bilana, ‘Kuwid agusinap towen’; e, kadiloka kuwid.”
Simounid
5 Gamag tasiyas takaweins anilivan mo idibakes siguyaw, ilansa, “Kulabem va̱gan bakasimounid beibwein.”
6 Iw to Yeisuw, ilana, “Kukin bukusimounids ma̱wan tipoul kaytul-nen, mo bukudibakes kay makaywen bukulansa, ‘Kugut gidawa̱lim, mo kunoun kun kutow wabwanit,’ e, mo bikanaway agamiy.
Bo misinak nilivan nitavag, bo deis
7-8 “Takinew mutouwat biwaway wa̱bag, o takinew bimtakavet mansiyas aleim wanawoud, ikous mo beiyum beim waven, adok nag bukulana, ‘Nuwanaw kum, kukwam.’ Nag. Peinan adok bukulana, ‘Kupa̱yiw kukwaliveinun kag, kusekeig; ba̱kam ba̱moum, ikous; mo kukwam, kumoum wankuyeim.’
9 “Mutouwat towen bikanaway aygam, adok nag bukulana, ‘Kalin nuwag avakaein ya̱koum.’ Nag.
10 “Yakamiy ma̱wan, bukuyakousis Yowbad nawotet nilivan, mo bukulansa, ‘Ya̱kids nag natouwats bwein ya̱kids. Bo misinak nilivan nitivag, bo deis.’ ”
Toulepel sinawatan
11 Inounas, bineis kid Yelusalem, inoyes ked makadewen Samaliy palatan, Galiliy palatan.
12-13 Isap ven kweitan waseg, iwekey toulepel sinawatan, itowas, iwaks, ilansa, “Tamwey, Yeisuw, tabta binok nuwam yakamey?”
14 Yeisuw ikines, ilana, “Kunounas kuneis; siyas tanuwgwes lun bikineimiy.” Inounas binekes kid tanuwgwes lun, inounas wa̱ked mo ibweins.
15-16 Teitan ikin kaleivin bo ibwein, itouvin, aygan avakaein iya̱kawn Yowbad waseg, iyum inek Yeisuw, ikalivatouw kantukov wamatan, ilana, “Kalin nuwag ya̱koum avakaein.” Mtowen gum-Samaliy.
17-18 Iw to Yeisuw ilana, “Adok sinawatan yakamiy nukubweins, avanuy tasiyas teinim teivas? Tabta beiyum bimeis bikavasis Yowbad, peinan ibweins? o misinaka tobwag ven gimgeilin towen?”
19 Mo idibek mtowen ilana, “Kutamanaw, kunoun. Nukusimounid waseg yey, mapuna bo kubwein.”
Yowbad nakaleiwag asinavin bisap
(Matiw 24:23-28, 37-41)
20-21 Palisiy mwasanin inekes, ikatiga̱nes, ilansa, “Asinavin Yowbad nakaleiwag bisilamaw?”
Iwa̱ge Yeisuw, ilana, “Nag bitakin kweitan mulin naman Yowbad mo bitakakin nakaleiwag isilamaw, nag. O gamag nag bilivans, bilansa, ‘Kukines a̱ne’ o ‘Towen-one’; nag. Peinan Yowbad nakaleiwag wanuwamiy nises.”
22 Mo idibakes navamul, ilana, “Igaw tut wanakoug, beivag sivinamiy bukukines Gimgilitoun yey gunakaleiwag kweitan yam waseg, tage nag bukukines.
23 “Gamag mwasanin bidibakeimiy, bilansa, ‘Kukin-one’ o ‘A̱ne.’ Tage awoum kuneis kukines; awoum kukikuns tasiyas; awoum.
24 “Peinan yam towen ba̱yum bam bukukineigs ma̱wana kavikawn bimteil liba̱lab palatadadan palatadadan.
25 “Youd towen wanakougwaw, tage wanamug a̱bag bigeg o peinan tut towen gimgilis bo bipiyaveigs.
26 “Gimgilitoun yey. Igaw ba̱yum bam mo gamag mwasanin bilivatus kalbaleb, ma̱wan kweiboug, inatut Now waseg, Gimgilitoun yey gunatut bo ma̱wan.
27 “Peinan Now inatut waseg ikamkwams, imwamoums, iveivays, ita̱mes nitsiyas silma̱nin beivays. Ma̱wana ee... kweitan yam mo Now isiw in wanawag wanuwan, mo ikweis avakaein, imukul ven, iwgweles gamag ikous.
28-29 “Lot-vak inatut ma̱wan, ikamkwams, imwamoums, iyyamayis siwliyoug, isipusops sibag, iwlulays sibunatum. Tage yam towen Lot ilisow Sodom mo kov son dikuda̱kul muyamuy ikalka̱louw ma̱wana kweis, ikatimates gamag babaw iyakous.
30 “Bo ma̱wan yam wanakoug waseg Gimgilitoun yey basap vayuwein ven watinow.
31 “Kukin kal biyeiwas wanpwa̱siw awoum beisiw vayuwein wanbunatum va̱gan bikow nawliyoug; awoum. O towen-vak wa̱bag awoum beiyum bein waven.
32 “Kuninuways Lot inakwav.
33 “Kukin sivinamiy bukwatinabweimiy mo mwamovamiy biyamkwaneimiy tage kukin biyamkwaneimiy mwamovamiy mo bukuba̱nes.
34 “Adibakeimiy kukin ba̱yum bam boug waseg, asteiy tawaw bimasis keb katanok waseg, teitan bakow; tayuwein bisiw.
35 “Vinay nay biwotets wit bikanimimayes, na̱tan bakow; nayuwein bisiw.”
36 (-)
37 Iweis tasiyas, ilansa, “Tamwey, avanuy?”
Yeisuw idibakes, ilana, “Am-palawen takanig immasis mo bikatuyouns bimeis mansiyas bunibwan.”