15
Iyateles Yeisuw, Paylat wamatan
(Matiw 27:1-2, 11-14; Luk 23:1-5; Yon 18:28-38)
1 Walalayis-wan tasiyas tanuwgwes lun situwa̱vek sisiyas tammwayas, sisiyas takatimlakeins kaleiwag, tasiyas tababaws mamagina konsels illivans bo idumwal ninous katanok-wan, mo iyawanis naman Yeisuw, itokes, inawes Paylat wamatan.
2 Mtowen Paylat ikatigan, ilana, “Tabta min-Yudiy siking ya̱koum?”
Yeisuw ilana, “Ma̱wan amlivan.”
3 Tasiyas tanuwgwes lun situwa̱vek iyateles Yeisuw, asilivan babaw waseg.
4 Vayuwein mo Paylat ikatigan, ilana, “Nag bukwatimop, ne? Liva̱neim babaw illivans.”
5 Tage Yeisuw nag ikatimop anilivan, ikka̱pay-wan, Paylat ikin, bo isunasun nanon.
Bo beiweiys Yeisuw
(Matiw 27:15-26; Luk 23:13-25; Yon 18:38–19:16)
6 Sagal towen waseg Paylat bilik tasiwun deil teitan bein wamnat, kal sivines gamags.
7 Bweilim katanok katanok ma̱wan. Teitan gamag yagan Bala̱bas nises wa̱deil, kweiboug siney tasiyas tapiyaveins gabman nakaleiwag ivvatays waseg gabman natouwats mo iweiy gamag.
8 Babaw gamag inekes Paylat, ilansa, “Tab bukulik tasiwun deil, kal bakalivan, bisap, ma̱wan mukwaleiwag nukuvvag bweilim babaw.”
9 Iw to Paylat, ilana, “Tab sivinamiy min-Yudiy miking balik beiw, ne?”
10 Paylat gog ikakina antameiliw Yeisuw tasiyas tanuwgwes lun situwa̱veks, to niyateles.
11 Tage tasiyas tanuwgwes lun bo itateiys ninous gamag babaw, igaw mo bikavtagis kid Bala̱bas yagan va̱gan bilik beim wamnat. E, ilivans ma̱wan.
12 Vayuwein mo Paylat ikatiga̱nes, ilana, “Aveiyag banuwek mtowen miking min-Yudiy yakamiy?”
13 Vayuwein iwaks, ilansa, “Kuweiys waklos, beimat.”
14 Iw to Paylat, idibakes, ilana, “Aveiyag ansinap kalbaleb?”
Tasiyas gog singay iwkuwaks, ilansa, “Kuweiys, kuweiys!”
15 Paylat bo itam wasigeis gamag babaw, ilik Bala̱bas, o idibakes biwaweiys kid Yeisuw, vatul waseg, mo bikatikavates bikayagweg waklos, bikanig.
Tasiyas takanaviys iyages Yeisuw
(Matiw 27:27-31; Yon 19:2-3)
16 Tasiyas takanaviys mo itokes Yeisuw inawes ilaksiwus wasibunatum bunavakaein, idawes sisiyas takanaviys babaw bimimeis.
17 Imeis, ikawes kweim bwabwel, ivaskoumis; ikous mo ikawes vatul kulikoul, ikwanis wakunun magina anapay.
18 Ikous, mo illivansa mav, ilansa, “Kalin nuwem, min-Yudiy siking ya̱koum.”
19 Amweilok ikawes, iwaweiys wakunun, igusus, ikululs wamatan.
20 Isiba̱wes ikous, inisis maynawen kweim bwabwel, ivaskoumis anakweim tonen, itokes inawes va̱gan beiweiys waklos.
Iweiys Yeisuw waklos
(Matiw 27:32-44; Luk 23:26-43; Yon 19:17-27)
21 Itokes Yeisuw, inounas wa̱ked, ilivatus Saymon meinoy wanawoud neim; gum-Saylin towen nitun asteiy Alekisan son Lup. Ilivatus Saymon, idibakes, ilansa, “Kukew anklos taw towen.”
22 Itokes inawes ven Golgot. Golgot takativini bein aga-Muyuw, Busabwes.
23 Isekes beimoum wayn son mul, ipiyev.
24 Ikous mo ikatikavates, ikayagweg waklos. Ikokews anakweim, ikalawages; ilaves kweitan youd bikines kid kalisiy bikawes asikweim tatanok tatanok tasiyas.
25 Ikatikavates ga̱boug, ka̱las italga̱lag.
26 Ileles nakalbaleb, isenas waklos mamagina, “Min-Yudiy siking.”
27 Asteiy sisiy Yeisuw ikatikavates wasklos, tavveinaws, teitan wanaka̱tay, teitan wankimaw.
28 (-)
29-30 Tasiyas gog inounas wa̱ked, itawyages, asilivan kalbaleb, ilansa, “Ya̱koum tagulekwein Yowbad nabunatum, ne? Kweitoun yam kid bukuwlulavaw, ne? Kubus waklos kum; kwatinabweim tatoneim.”
31-32 Tasiyas tanuwgwes lun sisiyas takatimlakeins kaleiwag illivans, issebaws, ilansa, “Bo ikatinabwes gamag mwasanin, ta-ma̱wan bikatinob tatonen. Magat mtowen Kelis, min-Yisleil dakins, kadiloka beibus waklos beim, bitakines mo bitasimounids.”
Siney-vak igawa nikayagwegs wasklos, itawyages Yeisuw.
Yeisuw imat
(Matiw 27:45-56; Luk 23:44-49; Yon 19:28-30)
33 Yam towen ya̱nay bo iladadub ven, idadub ee... ka̱las itageg, mo ikamnat.
34 Ka̱las itageg, Yeisuw iwak, aygan avakaein, ilana, “Eli, Eli, lamasabaktaniy.” Takativini gog bein aga-Muyuw “GunaYowbad, gunaYowbad, aveiyag wawun nukulisaweig?”
35 Iliganes mwasanin siyas nitabalawaws wadadan, ilansa, “Bo idow Ilaytiy beim.”
36 Teitan gog isawl in, ikow yotout, ibes kayal matan, isow wayn yayan waseg, iyasel binek Yeisuw wadon beimoum, ilana, “Beitay wouds, bitakines ga beim Ilaytiy mo binib.”
37 Ikous, Yeisuw iwak, aygan avakaein, mo ikanig.
38 Maynawen kweim nisilbwed palakakit wanuwan Yowbad nabunatum, mo isiled, isilamaw wanakaew in watinow, ivag mwayney.
39 Takalikay towen nitamanaw wamatan Yeisuw, iligen aygan avakaein, ikin ikanig, ilana, “Mounid taw towen Yowbad natun.”
40-41 Vinay gog kadiveiyov nitamanaws ikakins, vinen-Magdal yagan Meliy, son valeyin mana̱wen nitun Yemes takakit son Yusitos, sisiy Salom. Kweiboug Galiliy waseg vinay tasiyas ibukunis Yeisuw ivakamus. Tasiyas sisiyas vinay mwasanin nimeis Yelusalem, itamanaws ikakins.
Itakus Yeisuw
(Matiw 27:57-61; Luk 23:50-56; Yon 19:38-42)
42 Kwayav waseg mo ikatinages silma̱nin sagal nubweig Sa̱bat.
43 Gum-Alimatiy nises yagan Yosep, min-Yudiy sitakaleiwag teitan bwanabwein, nikaymet Yowbad nakaleiwag beim. Kwayav yam towen mtowen Yosep ikapwapout, inek Paylat, bintoug won Yeisuw va̱gan bikow binow bidibwen.
44 Mtowen Paylat idoki singay nuwanaw ankanig Yeisuw, idow natakalikay; im ikatigan, ilana, “Tabta mtowen Yeisuw bo nikanig, ne?”
45 Itam, ilana, “O!” mapuna Paylat itam Yeisuw won va̱gan Yosep bikow.
46 Mtowen Yosep in igimwel maynatan kweim pwapwa̱kaw, imey, mo ibwiy Yeisuw waklos, imey watinow, mo isumweil won, kweim to pwapwa̱kaw waseg. Ikous mo ikow inow isen wakalawag. Alawag towen neiteiys takunumwan. Dakul avakaein iyatpinis in ikatibwed wadon leg.
47 Vinay asteiy ikines alawag towen nisenas, vinen-Magdal yagan Meliy, son valeyin, Yusitos inan.