3
Taw teitan naman ipam
(Matiw 12:9-14; Luk 6:6-11)
1 Vayuwein Yeisuw inoun in wasinagog, taw teitan nises, naman ipam.
2 Tasiyas gog nikamliwes Yeisuw ikakins, idokes kid bivag taw towen beibwein mo biyateles, peinan iwotet Sa̱bat waseg.
3 Yeisuw gog idibek toupam towen, ilana, “Kum, kutom, kutamanaw wamtes gamags.”
4 Im, itom, itamanaw wamtes, Yeisuw idibakes, ilana, “Tab kadilok Sa̱bat waseg bitalabes gamags o adok bitayagages gamags? Bitayamoves gamags o adok bitakatimates?” Tasiyas gog isesusa ikka̱pays.
5 Bo igeg nanon peinan tayakeikays tasiyas. Kapasal nuwan, ikikines ikous, mo idibek toupam towen, ilana, “Kuyasel namam.” Iyasel, bo ibwein.
6 Tasiyas Palisiy ikines, mo isaps, illivans sisiyas gamag tasiyas sivines Elod nakaleiwag; amata ked waseg mo beiweiys Yeisuw.
Gamag babaw wadadan yevagam
7-8 Wankuyeim Yeisuw siney navamul inounas bineis kid wayvagam; singay babaw gamag ikabkunis, min-Galiliy, min-Yudiy, min-Yelusalem, min-Idumiy, sisiyas tasiyas misikes Yoldan wanpalatan o walasin ven wunsiyas Ta̱yil son Sidon, singay babaw gamag niliganes butun nawotet Yeisuw, mo inekes.
9-10 Ikatuyouns inekes, takatouns babaw ivag ibweins, mapuna tasiyas askatoun kweitan kweitan ipapeps sisiyas wawous, sivines kid bikabkwanes Yeisuw. Yeisuw mo idibakes navamul, ilana, “Kunibwis wag, kukin gamag babaw biyabinigs mo ba̱touw wa̱wag.”
11 Tasiyas gog takayyeiluws bikalka̱louws Yeisuw wamatan mo beiwaks, bilansa, “Ya̱koum Yowbad natun ya̱koum,” peinan yeiluw tasiyas bo iwtusis Yeisuw.
12 Tage Yeisuw singaya anilivan tawtoun idibakes, ilana, “Awoum kwamteleigs peinan Yowbad natun yey.”
Navamul sinawatan teiy
(Matiw 10:1-4; Luk 6:12-16)
13 Wankuyeim ikatulag in wa̱koy, kalisiy tasiyas itimek nanon ikatigikes, mo idawes inekes.
14-15 Bo ikatigik tasiyas sinawatan teiy, mamagina takaweins anilivan, siney bisesus mo bikayabes va̱gan bigeiguys o bitawtouns wasigeis yeiluw, bikayabes.
16 Tasiyas sinawatan teiy yiges Saymon, mtowen idok Pita;
17 Sebediy nitun Yemes son bwadan Yon, idokes Bowanages, peinan asisinap ma̱wana pala̱pal tasiyas;
18-19 Andiluw, Pilip, Batolomiw, Matiw, Tomas, Yemes, mtowen Alpiyow natun, Tadiw, gum-Keinan yagan Saymon, Yudas Iskaliyot, mtowen tasilkodein Yeisuw.
Idokes bwagaw ileb Yeisuw
(Matiw 12:22-32; Luk 11:14-23; 12:10)
20 Ikous, iyum in wanven, babaw gamag mo ikatuyouns inekes. Nawotet singay avakaein wasigeis tasiyas babaw gamag. Ta-ma̱wan beikam.
21 Taliven liva̱nen Yeisuw iliganes, idokes bo ikabala̱wein, bineis kid bitokes binawes.
22 Tasiyas gog takatimlakeins kaleiwag meinoy nimeis Yelusalem, ikines Yeisuw, ilansa, “Bwagaw ileb. Adok tasiyas tabbwagaws sitovek Seitan mtowen nileb Yeisuw, mo ikayabes yeiluw.”
23 Iw to Yeisuw, ikabebay, idibakes ilana, “Ta-ma̱wan Seitan bigulek nawotet tatonen.
24 “Kukin nagamag bilivis bimlavags bod kweitan kweitan, mo bikalouw nakaleiwag.
25 “Wanbunatum-vak, kukin bilivis bimlavag bod kweitan kweitan, mo beikous nabunatum gimgilis.
26 “Seitan-vak ma̱wan, kukin bigulek nawotet tatonen, o biliv inabod, mo bikalouw, nakaleiwag bo beikous.
27 “Kukin bitasiw wanuwan tatawtoun towen Seitan nabunatum, bitaven navavag, kadiloka bitayous mtowen, tayawen naman kaken, mo bitakow navavag beikous. Bwagaw nag ilabeigs; nag. Yowbad Kululuwan ilabeig.
28-29 “Mounid adibakeimiy amisinap singay kalbaleb, peinan kuyages Kululuwan Towen Bwanabwein. Gamag asisinap babaw Yowbad biwid; sikalbaleb, o asilivan kalbaleb nillivans, Yowbad biwidis beikous; tage kukin biyages Kululuwan Towen Bwanabwein, nag biwid, peinan asisinap to kalbaleb bises bisiseg. Nag kweitan tut biwid, nag.”
30 Yeisuw anilivan ma̱wan peinan ilansa, “Bwagaw ileb.”
Yeisuw inan budan
(Matiw 12:46-50; Luk 8:19-21)
31 Yeisuw inan budan nimeis itomos watoulan gamag babaw, ikayabes gamag mwasanin bidawes beim.
32 Inekes Yeisuw, gamag babaw nisinis wadadan, ilansa, “Inam siney budam inineveims; watoulan nisesus.”
33 Iw to Yeisuw, ilana, “Kavel inag o bwadag?”
34-35 Mo ikatimlek bikin gamag siyas nisinis wadadan, ilana, “Tasiyasa inag o bwadag. O kukin kal bikanow aygan Yowbad, mtowen bwadag o nagut o inag.”