8
Jisu He Sobse Bhal Moha Purohit
1 Etiya amikhan ki kobole mon ase etu laga motlob to hoile eneka ase: Amikhan logote moha purohit ase kun singhason laga dyna hathte sorgo laga mohan jagate bohi ase.
2 Tai sob pora pobitro jagate sewa kore juntu Probhu pora bonaise, manu pora nohoi.
3 Kelemane sob moha purohit khan ke uphar aru bolidan dibole nimite basi loise. Etu nimite tai bhi kiba anikena boli dibole dorkar hoise.
4 Etiya jodi Khrista prithibi te ase koile, Tai ekjon purohit nohobole thakise, niyom laga niyom hisab te bolidan dibole nimite ta te manu khan thakise.
5 Taikhan sorgote thaka laga saya ki dikhi ase etu ke sewa kora he ase, jineka Moses ke Isor pora mana korise jitia tai aradhana kora laga jaga bona bole thakise. Kelemane, Isor he koise, “Sabi tumike pahar uporte loijai kene kineka dikhai dise etu nisena he bonabi.”
6 Kintu etiya Jisu he bisi bhal porisorja to paise, jineka Tai manu aru Isor laga majote bhal vachan thaka laga kotha kori kene milai diya ekjon hoise.
7 Jodi prothom laga niyom te eku golti nai koile, titia dusra niyom dibole nimite eku dorkar thaka nai.
8 Jitia Isor manu khan uporte golti dikhise, Tai pora manu khan ke koise,
“Sabi, eneka din ahi ase- Probhu pora koise-
Jitia Moi ekta notun niyom bonai dibo
Israel laga ghor aru Judah laga ghor logote.
9 Aru etu vachan to
Taikhan laga baba khan logote niyom bonai diya nisena nohobo.
Etu dinte jitia taikhan laga hath dhori kene
Egypt pora ulaikene loi anise.
Kintu taikhan Moi laga niyom to mani kene thaka nai,
Aru Moi taikhan uporte khushi panai-
Eneka Probhu pora koise.
10 Etu vachan ase
Juntu Moi bonabo Israel laga ghor manu khan logote
Etu din khan pichete -
- Probhu koi ase.
Moi laga niyom taikhan laga bhabona te rakhidibo,
Aru taikhan laga monte likhi dibo.
Moi taikhan laga Isor hobo,
Aru taikhan Moi laga manu hobo.
11 Taikhan kitia bhi nijor laga ghor usor thaka manu
Aru kokai bhai khan ke nashikabo, aru kobo, ‘Probhu ke janibi.’
Kelemane taikhan Moike janibo,
Sobse chutu pora loi kene sobse dangor tak.
12 Kelemane taikhan biya kaam kori kene thakise koile bhi Moi taikhan uporte morom thakibo,
Aru taikhan laga paap Moi aru kitia bhi yaad nokorile.”
13 Etu niyom ke “notun” mata nisena, Tai pora prothom niyom to bodli kori dise, aru kun to purana aru eku kaam nathake hoise, etu joldi harai jabo.