15
Sat-ta Sorgodoth khan Laga Sat-ta Bemar
1 Etu pichete aru bhi asurit chihna sorgote dikhise: sat-ta sorgodoth sat-ta dukh loi kene- hekh laga dukh digdar khan, etu pora Isor laga khong pura hoi jabo.
2 Titia moi dikhise shisa laga samundar jui te milai kene kun manu etu janwar aru murti ke jiti loise, aru tai laga naam laga ginti uporte jiti loise, taikhan etu shisa laga samundar te khara hoi thakise, Isor pora diya bajana khan loi kene khara hoi thakise.
3 Taikhan Moses laga gana gai thakise, Isor laga noukar aru Mer bacha laga gana gai thakise,
“Dangor aru asurit ase Apuni laga kaam
Probhu Isor, sobse Mohan.
Apuni laga rasta bhal aru hosa ase,
Oh dharmik manu laga raja.
4 Kun manu apnike bhoi nokoribi, Probhu, aru Apuni laga naam ke mohima nadibo?
Kelemane Apuni pobitro ase.
Sob desh khan ahibo
Aru Apuni usorte mohima koribo
Kelemane Apuni laga bhal kaam khan sob dikhai dise.”
5 Etu sob huwa pichete moi saise, aru mondoli te gawah khan laga tambu sorgote khuli jaise.
6 Aru mondoli bahar te ulai ahi kene sat-ta sorgodoth sat-ta dukh digdar khan dhori kene thakise. Taikhan laga kapra sapha thakise, mihin kapra aru taikhan laga chati te suna pora bonai kene thaka huru kapra khan lagai kene thakise.
7 Charta janwar majot pora ekjon he sat-ta sorgodoth khan ke sat-ta bati Isor laga khong pora bhorta thaka, taikhan ke dise, Tai jun hodai aru hodai nimite jinda ase.
8 Titia Isor laga Mohima aru takot pora mondoli to dhuwa pora bhorta hoi jaise. Kun bhi ta te jabole napare jitia tak sat-ta dukh sat-ta sorgodoth khan pora pura nakore.