18
Babylon Giri Juwa
1 Etu pichete moi aru ekjon sorgodoth ke sorgo pora ahi thaka dikhise. Tai logote adhikar thakise, aru pura prithibi Tai laga Mohima pora bhorta hoi jaise.
2 Tai kandi kene dangor awaj pora koise,
“Mohan Babylon giri jaise!
Tai bhoot khan thaka jaga hoi jaise,
Sob biya atma laga ghor,
Aru sob biya aru letera chiriya laga ghor.
3 Sob desh khan tai laga bebichar laga draikha ros khaikena nisa hoise.
Sob prithibi laga raja khan tai logote bebichar kaam korise.
Prithibi laga vyapari manu khan bhi tai kineka mangso laga itcha te thaki ase, etu saikene dhun hoise.”
4 Titia moi sorgo pora aru ekta awaj koi thaka hunise,
“Tai pora ulaikene ahibi, Moi laga manu khan
Tumikhan tai laga paap te bhag nolobole nimite,
Aru etu pora tai pabole thaka dukh tumi uporte nahibo nimite.
5 Kelemane Babylon laga paapkhan sorgo tak ponchise,
Aru Isor pora tai laga paap kaam khan sob yaad kori ase.
6 Tai ki dise etu wapas taike di dibi
Aru tai laga kaam saikene taike aru bisi dibi;
Aru tai milai kene rakha kup te, tai nimite aru bisi milai kene taike di dibi.
7 Kelemane tai nijorke dangor kori kene aram pora thakise,
Taike bisi dukh chinta aru mon dukh dibi.
Kelemane tai nijor laga monte koi,
‘Moi rani nisena bohi ase;
Moi bidhowa mahila nohoi,
Aru moi kitia bhi kanda nadikhibo.’
8 Etu karone ek dinte he tai laga dukh ahibo:
Mora, kanda, aru akaal ahibo.
Taike jui pora khai dibo,
Kelemane Probhu Isor Mohan ase, aru Tai he taike bisar koribo.”
9 Prithibi laga raja khan kun tai laga pichete jai kene sob bebichar korise, tai juli kene dhuwa ulai thaka to dikhi kene kandi kene hala koribo.
10 Taikhan dur te khara koribo, aru tai dukh pa to dikhi kene kobo,
“Oh, oh mohan sheher,
Babylon takot thaka ekta sheher!
Kelemane ek ghanta bhitor te tumi laga bisar hoi jaise.”
11 Titia prithibi laga dhun manu khan taike saikene kandise, kelemane tai laga saman khan kun bhi nakina hoise-
12 bahar pora ana suna, chandi, daam laga pathor, moti, mihin kapra, begoni rong kapra, resham kapra, lal rong laga kapra, sob kisim laga bhal aru daam citron laga khuri, bhal para bona bati khan, pitol, luha, aru marble,
13 masala khan, mitha sugandh tel, angur ros, kisim laga tel, mihin pora sapha kori rakha atta, saguli aru goru, ghora aru ghora gari, noukar aru manu laga atma khan.
14 Tumi laga pakki juwa phol, tumi laga atma laga itcha, sob tumi pora jai jaise. Sob aram aru dikhawa tumi pora jai jaise, aru etu kitia bhi wapas napabo.
15 Etu saman laga malik khan kun taike saikene dhuni hoisele etiya tai pora dur hoi jaise, kelemane tai laga dukh paikene thaki thaka to saikene bhoi lagise aru dur te jai kene khara hoi jaise.
16 Taikhan kobo,
“Oh, oh etu mohan sheher
Kun bhal kapra lagai kene thakise,
Begoni rong te, aru lal rong kapra lagai kene thakise,
Aru suna pora bhorta hoi kene,
Daam laga heera, aru moti khan lagaikena thakise!
17 Ek ghanta bhitor te tai laga sob dhun to khotom hoi jaise.”
Sob jahaaj laga henedhikari khan ta te safar kora khan, aru cholai thaka aru kiman manu etu samundar pora kamai thakise, dur te khara hoi jaise.
18 Taikhan kandise jitia tai juli thaka laga dhuwa to dikhise. Taikhan koise, “Mohan sheher nisena aru kuntu sheher ase?”
19 Taikhan laga matha pora dhula jharise, aru jor pora kandise, mon dukh korise, aru koise,
“Oh, oh etu mohan sheher
Kun logote taikhan laga jahaaj ase
Samundar te tai laga dhun pora dhuni hoise
Kelemane ek ghanta te taike khotom kori dise.”
20 “Tai uporte khushi koribi, O sorgo,
Aru tumi pobitro khan, apostle khan, aru bhabobadi khan,
Kelemane Isor pora he tumikhan laga bisar tai uporte kori dise!”
21 Titia ekta mohan sorgodoth pora dangor pathor uthaikene samundar te phelai dise, aru koise,
“Etu nisena, Babylon, mohan sheher ke bhi,
Dukh te phelai dibo
Aru taike kitia bhi nadikha hoi jabo.
22 Gana baja manu khan,
Aru bhigul baja manu khan laga gana aru
Tumi kitia bhi nahunibo.
Bhal saman bona manu aru tumi
Khan kitia bhi napabo.
Dhaan khunda laga awaj aru
Tumikhan kitia bhi nahunibo.
23 Saaki laga ujala
Tumikhan ke kitia bhi ujala nadibo.
Shadi kora mahila aru mota laga awaj aru
Kitia bhi nahunibo,
Kelemane tumikhan laga vyaparikhan to prithibi laga raja khan thakise,
Aru pura desh tumikhan laga jadu-tona pora thogai dise.
24 Bhabobadi aru pobitro manu khan laga khun tai uporte paise,
Aru taikhan sob laga khun, kunkhan ke etu prithibi te morai dise.”