7
144,000 Israel Jati Ke Isor Laga Mohor Lagaise
1 Etu pichete moi charta sorgodoth khan ke prithibi laga charta kinar te khara kori thaka dikhise, duniya laga hawa ke jor pora dhori thakise, eneka pora pura duniya, aru samundar, aru ghas khan ke hawa namaribole nimite.
2 Titia moi aru ekta sorgodoth ke purab pora ahi thaka dikhise, tai logote jinda Isor laga chihna thakise. Tai dangor awaj pora jun charta sorgodoth khan ke prithibi aru samundar te dukh dibole nimite adesh dise, taikhan
3 ke koise, “Prithibi ke dukh nadibi, aru samundar ke bhi, aru ghas khan ke bhi jitia tak moi khan Isor laga noukar khan ke matha te chihna mari nadiye.”
4 Titia moi hunise kun manu khan ke etu chihna dise: 144,000, kiman Israel laga bacha khan laga ase etu chihna dise:
5 Baroh hajar Judah laga jat khan ke chihna dise,
Baroh hajar Reuben laga jat khan ke,
Gad laga Baroh hajar jat khan ke chihna dise,
6 Asher laga baroh hajar jat khan ke chihna dise,
Baroh hajar Naphtali jat khan ke,
Baroh hajar manasseh laga jat khan ke,
7 Simeon laga Baroh hajar jat khan ke chihna dise,
Baroh hajar Levi laga jat khan ke,
Baroh hajar Issachar laga jat khan ke chihna dise,
8 Baroh hajar Zebulun laga jat khan ke dise,
Joseph laga baroh hajar jat khan ke chihna dise,
Aru baroh hajar Benjamin laga jatikhan ke chihna mari dise.
Sob Jati Pora Ginti Koribo Napara Manu
9 Eitu khan sob huwa pichete moi saise, aru ta te bisi manu thakise kun bhi ginti kori bole napara thakise- sob desh, jati, manu, aru alag kotha kowa manu thakise- singhason aru Mer usorte khara kori thakise. Taikhan boga kapra pindhi kene thakise aru palm ghas laga pata hathte loi kene thakise,
10 Aru taikhan dangor awaj pora mati kene koise,
“Anonto jibon moi khan Isor laga ase, etu ekjon kun singhason te bohi ase, aru Mer ke bhi!”
11 Aru sob sorgodoth singhason usorte khara kori thakise, aru bura manu khan usorte charta janwar khan thakise, aru jhukikena taikhan laga matha singhason usorte rakhikena Isor ke aradhana kori thakise,
12 aru koise,
“Amen! Adar aru mohima aru gyaan aru dhanyavad aru prosansa aru hokti aru takot hodai aru hodai nimite moi khan laga Isor ke hobo dibi! Amen!”
13 Titia ekjon cholawta moike hudise, aru koise, “Eitu khan kun ase, kun boga kapra lagai kene ase, aru taikhan kot pora ahise?”
14 Titia moi taike jowab dise, “Moi laga Probhu, Apuni jane.” Titia tai moike koise, “Eitu khan sobse dangor dukh pora ulaikene aha khan ase. Taikhan laga kapra dhulai loise aru Mer laga khun pora boga kori loise.
15 Etu nimite, taikhan Isor laga singhason usorte khara kori ase
Aru Tai laga ghor te din aru rati taike mohima di ase.
Tai laga tambu khuli kene taikhan uporte lagai dibo.
16 Taikhan aru kitia bhi bhuka nathakibo, aru kitia bhi pyaas nalagibo,
Aru suryo laga gorom taikhan uporte kitia bhi nalagibo.
17 Etu Mer kun singhason laga majote bohi ase taikhan ke cholai kene loijabo
Aru taikhan ke jinda pani usorte thaki bole dibo,
Aru Isor he taikhan laga sob suku pani mussai dibo.”