10
Koosinunge Okiꞌnaneꞌ Buukunaneꞌ Avuko Joonie Maaꞌuuꞌnaꞌ
1 Teketa narung koosinung bakei purintoꞌ paning-eta siarako ooantuꞌ kamoꞌke mononopaꞌpinaꞌ nopaꞌari, eeꞌnoko boreꞌkoo daue eeravo otoing, eeꞌnoko bakaang oing duaaꞌpinaꞌ oroꞌ, eeꞌnoko bakaning kauꞌ ookanauꞌka ntaꞌpinaꞌ urumparioꞌ.
2 Eeꞌnoko birenge okiꞌnaa buuku bereꞌarioꞌ kompui pouꞌ. Eeꞌnoko pora aaꞌnouꞌ bakaang kauꞌ tampanauꞌ pirung-koo donkonuuꞌ eeꞌnoko mareꞌanauꞌ kansiꞌkoo donkonuuꞌ.
3-4 Teketa aaꞌnaꞌ bokuvuꞌ laioni-koong aurong-pinaꞌ karoma, teketa tee karoko kurunkurung ˜kenaanka-taa tompooꞌkaama kareaako ninge daariamaꞌnaang nkomarako narunge auronge paning-eta karoma aaꞌpuko taaravantuꞌ, “Siraꞌpeaukaꞌ tee kapooꞌnanka teinge ˜kenaanka-taa kurunkurunge minkuainanka, eeꞌnoko daarieaukaꞌ!”
5 Eeꞌnoko tee eeꞌnara koosinung pirung naanka-koo kansiꞌ donkonuioꞌ ooantuꞌnung deto paning-aape toonuuꞌ bireng tampanaang.
6 Eeꞌnoko teie maraka-anta nkovuuꞌ tee-koo Kumponing teeꞌ nariꞌ otoi otomaung bakaang miring-koo, aaꞌnung paning, kansiꞌ, pirung eeꞌnoko teing ookara kapooꞌnanka tenairu-koo otoromananka nkovuuꞌnung-koo; aaꞌpuuꞌ, “Batei neng-koo makotuaꞌ.
7 Aing-koo doonanka-koo tee ˜kenaanka-taa-nara koosinung maamuarama otoko bakanareng tuuviri puung-koo, Kumponinge tee bakaang makensiꞌnung maromaro oroꞌantavuuꞌnaang, teeꞌ eeꞌnaꞌ teing bakaning nakaro-nupoong˜ tero nauvuruꞌnaꞌ.”
8 Teketa napoꞌ teie auronge paning-eta karoko taaravantuꞌnunge karoma aaꞌpuuꞌ, “Bera tee buuku nkaveai bereꞌari otoing koosinung-koo bireng-koo, tee-koo pirung naanka-koo kansiꞌ donkonui otoing-koo.”
9 Teketa ninge mera tee koosinung eentavantuꞌ amuuꞌnaang tee okiꞌnaa buuku. Eeꞌnoko teie aaꞌmuuꞌ ning, “Nkavera maaꞌeai. Karang-koo davainta-pinaꞌ tariiꞌdooꞌnaang, teka damaꞌke maaꞌera tee dakaang pakosiiꞌkoo tee tokaaꞌdooꞌnaang.”
10 Teketa ninge tee okiꞌnaa buuku koosinung-koo bireng-koo nkavamira maaꞌantuꞌ. Maaꞌamira karang davainta-pinaꞌ tariiꞌmouꞌ, teka dunkumpamira pakosiiꞌ tokaaꞌmouꞌ.
11 Teketa aaꞌmuuꞌ, “Bera napoꞌ tarampeerarama˜ siraꞌpeaing kapooꞌ damaꞌke tavoꞌkuaining teing-koo nantoong mmauꞌkoo osi kante-nupoong-koo, napoꞌ kara amutemuriiꞌkoo eeꞌnoko napoꞌ ookara dauraronanka-koo.”