11
1 Ɩmʋ sʋ fan kasɛ mɛ tɔ, fɛɛ kanan mʋ nɩɩ n kasɛ Krisito tɔ mʋ.
Kabwaarɛ‐sun tɔ nbara lɩɩ
kumu sʋ kubun
2 N yɩn fanɛ, lɩɩ fɛɛ fen nyiŋi mɛ sʋ lɩɩ kʋtɔ kʋmaa kɩnɩmʋ tɔ, nɩɩ fen buu kɩkaapʋ mʋ nɩɩ n taa waa fanɛ abaa tɔ mʋ.
3 Amaa n biti fan bɩɩ fɛɛ ɔnyɩn kʋmaa kumu ɩ gyɛ Krisito, nɩɩ ɔkyɩɩ‐kilipu kumu ɩ gyɛ mu‐kuli, nɩɩ Krisito kumu ɩ gyɛ Ɩbwaarɛ.
4 Ɩmʋ sʋ ɔnyɩn kʋmaa mʋ nɩɩ ɛɛ kʋlɛ kabwaarɛ‐kʋlɛ, abɛɛ Ɩbwaarɛ ɩɩ bɔla mʋ sʋ ɛɛ tɔwɛ, yɛgɛ o bun mu kumu sʋ mʋ, ee gyila mu kumu mʋ nɩɩ kɩ gyɛ Krisito mʋ ipeeli nɩmʋ.
5 Nɩɩ ɔkyɩɩ kʋmaa mʋ nɩɩ ɛɛ kʋlɛ kabwaarɛ‐kʋlɛ abɛɛ Ɩbwaarɛ ɩɩ bɔla mʋ sʋ ɛɛ tɔwɛ, nɩɩ ɔ man bun mu kumu sʋ mʋ, ee gyila mu kumu mʋ nɩɩ kɩ gyɛ mu‐kuli ipeeli nɩmʋ, ɩ dan i du nɩn fɛɛ maa kpaatɛ mu kumu mʋ.
6 Nɩɩ ɔkyɩɩ mʋ nɩɩ ɔ man kan bun mu kumu sʋ bɩrɛ, ɩ dagaa maa kpaatɛ mu kumu. Nɩɩ ɩ gyɛ ipeeli‐sɩn sa ɔkyɩɩ maa kpaatɛ mu kumu, abɛɛ maa gyatɛ mu inyini sʋ mʋ, kanɩn bɩrɛ o bun mu kumu sʋ.
7 Ɔnyɩn bɩrɛ man dagaa maa bun mu kumu sʋ, saŋa mʋ nɩɩ ɛɛ kʋlɛ kabwaarɛ‐kʋlɛ, abɛɛ Ɩbwaarɛ ɩɩ bɔla mʋ sʋ ɛɛ tɔwɛ mʋ. Lɩɩ fɛɛ ɔnyɩn mʋ tɔ nɩɩ Ɩbwaarɛ keduli yɛ mʋ bʋnyaa ɩɩ lɛɛ ɩɩ kaapʋ. Amaa ɔkyɩɩ mʋ ɩɩ lɛɛ ɔnyɩn bʋnyaa ɩɩ kaapʋ.
8 Lɩɩ fɛɛ Ɩbwaarɛ man tʋʋ ɔnyɩn lɩɩ ɔkyɩɩ tɔ, amaa ɔ tʋʋ ɔkyɩɩ nɩn lɩɩ ɔnyɩn tɔ.
9 Nɩɩ Ɩbwaarɛ man tʋʋ ɔnyɩn nɩn sa ɔkyɩɩ, amaa ɔ tʋʋ ɔkyɩɩ nɩn sa ɔnyɩn.
10 Lɩɩ ɩnɩmʋ sʋ yɛ Ɩbwaarɛ nbɔɔ sʋ mʋ, ɩ dagaa ɔkyɩɩ maa bun mu kumu sʋ, kɛ ɩ kaapʋ fɛɛ ɔ bʋ mu‐kuli kasɛ.
11 Amaa ɩnɩmʋ kpini, lɩɩ Ɔnyɩrɩpɛ ɩkpa sʋ mʋ, ɔkyɩɩ tiri sa ɔnyɩn, nɩɩ ɔnyɩn gbaa tiri sa ɔkyɩɩ.
12 Lɩɩ fɛɛ ɔkyɩɩ lɩɩ ɔnyɩn tɔ nɩn, nɩɩ ɔkyɩɩ mɔɔ ɩ kʋʋgɛ ɔnyɩn. Amaa kʋtɔ kʋmaa nɩmʋ lɩɩ Ɩbwaarɛ asɛ nɩn.
13 Fanɛ gbaa‐gbaa fanɛ fan kɩɩ, nɩɩ ɔkyɩɩ maa kʋlɛ kabwaarɛ‐kʋlɛ, yɛgɛ ɔ man bun mu kumu sʋ mʋ, ɩ bʋrɔn kanɩn abɛɛ?
14 Ɩ wʋla ɩ dɛ fɛɛ ɔnyɩn kʋmaa mʋ nɩɩ mu inyini ɩ waa nswɩɩ ɩ kyɔlɛ mʋ, ɩ gyɛ ipeeli sa mʋ.
15 Amaa ɔkyɩɩ bɩrɛ, nɩɩ ɔ kan ɔ sʋ inyini bʋnswɩɩsa mʋ, ɩ gyɛ bʋnyaa nɩn sa mʋ. Lɩɩ fɛɛ Ɩbwaarɛ sa ɔkyɩɩ inyini bʋnswɩɩsa nɩn, kɛ i bun mʋ sʋ.
16 Amaa ɔkʋmaa mʋ nɩɩ ee biti o gyii ɩnɩmʋ ɩmɔɔrɛ mʋ, kʋtɔ mʋ nɩɩ n sʋ n tɔwɛ ɩ gyɛ yɛ, a man buu atɔ waasa kʋ Krisito tɔ tii ɩnɩmʋ sʋ. Nɩɩ Ɩbwaarɛ kʋbʋ‐kʋbʋ kʋmaa nɩmʋ tɔ gbaa kanɩn nɩɩ i du.
Ɔnyɩrɩpɛ agyitɔ yɛ
ɩmʋ ɔkpa sʋ kigyii
17 Nbɩɩnbɩɩ asɩn mʋ nɩɩ n biti n ba tɔwɛ fanɛ falɛ bɩrɛ n mɛɛ yɩn fanɛ, lɩɩ fɛɛ fanɛ kɩgyaŋɛ kʋmaa nɩmʋ tɔ mʋ, ɩ mɛɛ bɩya adanbɩrasa, amɔɔ ii nyita nɩn ii tii sʋ.
18 Ɩmʋ nɩɩ ɩ gyankpaa mʋ, n nu yɛ saŋa kʋmaa nɩɩ fanɛ kʋbʋ fɛn gyaŋɛ mʋ, nbarɩgɛ ɩ bʋ fanɛ tɔ, nɩɩ n kɔɔlɛ ɩmʋ ɩkʋ gyii.
19 Kesintin tɔ, ɩ dagaa nbarɩgɛ ɩ maa bʋ fanɛ tɔ, saamʋ kɛ ɩ yɛgɛ ɔkʋmaa nɩmʋ ɔ bɩɩ fanɛ tɔ bamʋ nɩɩ bee sun Ɩbwaarɛ kesintin tɔ.
20 Nɩɩ fan maa gyaŋɛ mʋ, man gyɛ Ɔnyɩrɩpɛ agyitɔ mʋ, nɩɩ fen gyii.
21 Lɩɩ fɛɛ fan maa gyii mʋ, ɔkʋmaa nɩmʋ ii gyii mʋ lɛɛ nɩn, nɩɩ fen mee gyoo abaa, kanɩn sʋ akʋn ɩɩ mɔɔ akʋ, yɛgɛ akʋ mɔɔ bɛɛ bʋʋ.
22 Ɩmʋ sʋ fan man sʋ akpaara mʋ nɩɩ fen gyii kɛ fen nu ɩmʋ sʋ nɩn? Abɛɛ fen biti fan ŋaabaa Ɩbwaarɛ kʋbʋ mʋ nɩn, kɛ bamʋ nɩɩ ba man sʋ sɛhn mʋ ba gyii ipeeli? Mɩnɛ nɩɩ fen biti n tɔwɛ fanɛ? N yɩn fanɛ ɩnɩmʋ sʋ abɛɛ? N mɛɛ yɛ n yɩn fanɛ.
23 Lɩɩ fɛɛ kʋtɔ mʋ nɩɩ n nyɛ lɩɩ Ɔnyɩrɩpɛ Yesu asɛ mʋ nɩɩ n taa kaapʋ fanɛ. Ɩmʋ ɩ gyɛ fɛɛ, kagyanbwɛ, pɔyɩ kɛ ba lɛɛ anɛ‐Nyɩrɩpɛ Yesu sa mʋ, ɔ taa bodobodo,
24 nɩɩ ɔ fwaala Ɩbwaarɛ, nɩɩ ɔ gya bodobodo mʋ tɔ, nɩɩ ɔ tɔwɛ yɛ, “Ɩnɩmʋ ɩ gyɛ mɛ kayɩɩ‐wʋlɛ, mʋ nɩɩ n taa sa fanɛ. Fan waa falɛ taa nyiŋi mɛ.”
25 Ba maa gyii lʋwɛ mʋ, ɔkpa kʋlʋn maŋa sʋ ɔ taa kɔɔpʋ yɛ nta mʋ, nɩɩ ɔ tɔwɛ yɛ, “Kɔɔpʋ nɩmʋ ɩ gyɛ mɛ nkalan mʋ nɩɩ Ɩbwaarɛ taa waa katɔwɛ kyula pʋpwɛ maa asa nsana. Fan waa falɛ, saŋa kʋmaa mʋ nɩɩ fan nuu ɩmʋ mʋ, taa nyiŋi mʋ.”
26 Kanɩn sʋ saŋa kʋmaa mʋ nɩɩ fen gyii bodobodo nɩmʋ, nɩɩ fen nuu lɩɩ kɔɔpʋ nɩmʋ tɔ mʋ, ɩ kaapʋ nɩn fɛɛ fɛn da Ɔnyɩrɩpɛ Yesu kelewu mʋ kibonbon naa fʋʋ saŋa mʋ nɩɩ ee biti o bwii ba mʋ.
27 Ɩmʋ sʋ ɔkʋmaa mʋ nɩɩ ee gyii Ɔnyɩrɩpɛ Yesu bodobodo abɛɛ ee nuu lɩɩ kɔɔpʋ mʋ tɔ, ɔkpa mʋ nɩɩ ɩ man dagaa sʋ mʋ, o gyii kʋpwɛ, lɩɩ fɛɛ ɔ man buu Ɔnyɩrɩpɛ n‐yɩɩ yɛ mʋ nkalan mʋ.
28 Kanɩn sʋ, ɔkʋmaa nɩmʋ dagaa maa kɩɩ mʋ gbaa‐gbaa mʋ kɔkɔlɔ tɔ, pɔyɩ kɛ ɔ lan gyii bodobodo mʋ, kɛ o nuu lɩɩ kɔɔpʋ mʋ tɔ.
29 Lɩɩ fɛɛ ɔkʋmaa mʋ nɩɩ ee gyii bodobodo mʋ, nɩɩ ee nuu lɩɩ kɔɔpʋ mʋ tɔ, nɩɩ ɔ mɛɛ bɩɩ Ɔnyɩrɩpɛ n‐yɩɩ mʋ kasɛ mʋ, o gyii kʋpwɛ.
30 Lɩɩ falɛ sʋ nɩɩ fanɛ tɔ gaalaagaa n‐yɩɩ ɩ yɔlagɛ fanɛ, nɩɩ fɛn lɔ, nɩɩ akʋ mɔɔ ba wu.
31 Amaa nɩɩ an kan gyankpaa kɩɩ anɛ gbaa‐gbaa nkɔlɔ tɔ pɔyɩ mʋ, naafɔɔ Ɩbwaarɛ mɛɛ yɛ o bun anɛ kʋpwɛ.
32 Amaa nɩɩ Ɩbwaarɛ kan bun anɛ kʋpwɛ nɩɩ ɔ bɩɩtɛ anɛ kʋsʋ mʋ, ɛɛ waa kanɩn nɩn, kɛ ɔ man taa anɛ tii dulinyaa asa mʋ nɩɩ ee biti o muuri mʋ sʋ.
33 Ɩmʋ sʋ mɛ‐daa ana yɛ mi‐supu ana, nɩɩ fan kan gyaŋɛ kɛ fan gyii Ɔnyɩrɩpɛ agyitɔ mʋ, fan gyoo abaa.
34 Nɩɩ akʋn a kan a mɔɔ ɔkʋ mʋ, ɔ gyankpaa gyii mʋ kɩkpaara sʋ, saamʋ, nɩɩ fan gyaŋɛ mʋ ɩ mɛɛ yɛ ɩ bɩya Ɩbwaarɛ kʋpwɛ kubun.
Nɩɩ lɩɩ asɩn mʋ nɩɩ ɩ san mʋ bɩrɛ, n kan ba mʋ, n biti n lɔŋɔ ɩmʋ sa fanɛ.