3
Kiju mogotabo ho sle tle
1 Li olëna, Pitana, Jonna, taboklë klijina oneho Gotome gëgali mëtlagulabë olëna, Gotobë tako lotu lowa mëtëyeu.
2 Na tlemalë, fli enëneme hwi motlomo, kiju mogotabo home mëtlesula. Bu botabë imo mago kiju mogotabo fata tle. Iniwa olë bu kë belë mëtlesukefla na Gotobë tako lotu lobë lëglesi ino ëfo li mëta gwa mototokwefla. Bu kë inobë weniji mefë lamototla, “Lale Ino.” Na kë kiju mogotabo ho, tako lotu lowa kë mitisikefëyabë onehome, balitime, gëgëba tlokwefëme.
3 Na kë ho tlemalëme hwi tlome, Gotobë tako lotu lowa mëkaklujo namëgelome kofene, na bu balitime mana gëba tlome.
4 Pitana Jonna bume anisasana hwi motlolo na Pita gali tlole, “Ju seme hwi elëfakëna.”
5 Na kë ho bume anisasana wëya tlelëme na melowene latle, “Baliti mëglënomefe.”
6 Kwe Pita gali tlole, “Masiwafe, bo baliti hananefe. Kwe bo jume kë nëglëbë wesibi nane. Bo Nasaret life mago Jisas Klaisbë afutukuna jume gali nolë, ju huju elëme na asë elëme.”
7 Na Pita tobamu tobame fa totle na hujume taitale. Na bubë kiju laslewa metletle.
8 Na bu hokweinawa huju totokwakle na asë tëbelëfa. Na buna, tlemalë hona, iniwa Gotobë tako lotu lowa mëtëkakluja. Na bu asë tëbelëfa. Na okokli okokli tëbelëfa. Na Gotome mana bibita tëtagule.
9 Na iniwa oneho lotu lo mëta kë tafa mëtlabë, bume mehwi motlola, bu asë tëbelëfa na Gotome bibita tëtagule.
10 Na bume lowene sle mëtletla na melowene lamëtla, “Ebë ho kë nëgebë kwe bu Gotobë tako lotu lo lëglesi mago ino ëfo li mëta kë tafa lëglekëfebë ho, balitime kë gëgëba lëglekëfebë ho.” Bume hwi motlola, kiju lalowa mëbetle na klelego memëtla.
Pita bu tako lotu lome gali të totle
11 Iniwa oneho kë home kë fata tëgletlebë wesibi gali aholokwane mëtla na klelego memotokouja. Na bu fëka motokweija, kë home hwi namoglolame. Na bume mehwi motlola, Pitaname Jonname tobame fafa tle. Na bu lotu lo sebati mëta mana mitlija. Bu kë sebatibë weniji mefë lamotla, “Solomonbë sebati.”
12 Pita onehome hwi tlome na gali tlome, “Sobo Israelbë afenëboni, sobo ebë wesibi kë fata lëglebëme fëyeme klelego ekoujone? Na sobo seme anisasana fëyeme wëya elelënane? Sobo melowene lalone, ‘Sebo Gotobë naba lime asë sle nanelo na kë home mana sle notlo?’ Weye. Hanane mu. Sebo kë home sebobë afutukuna hana sle notlo. Weye. Hanane mu.
13 Sebobë semleninobë Goto, Abraham, Aisak, Jekopnabë Goto seme meolafa latëtatëna, bubë wege ho, Jisas, bu tako afutukuna ho, na bu Jisasme tako fleflesumu latletle. Kwe sobo bume wame ho betelë tlelulo, mogo nalë tëkle namogotlame. Eso ho Pailat bume jine lëgelëkakleme tole latle fene, kwe sobo bume jine lëgelëkaklebëme tole hana tletelo na bume hehë tletelo.
14 Jisas bu Gotobë iniwa gali esogo sle tëglelëtlebë ho, na bu lalemu na li fëye wesibiha hana totle. Kwe sobo bume tole hana tletelo na hehë tletelo. Na sobo eso ho Pailatme gali tlolo, ho mogo nalë kë tëke toglolebë home kalabusu lo mago jine nalëglëleme, Jisasme asa jine elëtëna.
15 Jisas bu seme lale tafame sle lëgëtana ho. Kwe sobobë galime fwa nëgeme bume mogo nalë këme tëkle mototla. Kwe Goto bume matëmatë mago huju totle. Na sebo tlemalë kë wesibi sebobë nabana hwi tlolome nëgeme, kë loweneme fwa këme gali nelo.
16 Sebo melowene sle nëgelome nëgeme, ‘Jisas ebë home lalowa sle logotleme, na bubë afutuku ebë home këme sle lotle.’ Jisas sebobë lowene buwa huju lëtateno na këbë lowenena ebë home sle notlo. Na sobo ebë home wahwi elolo, ëtani buwe kiju mogo tabo tëtabe kwe ëje lalowa ekë asë lëbelëfa.
17 O, bobë afani, bo walowene nelë, sobona, sobobë eso hona, sobo melowene hana tletelo, ‘Goto Jisasme wafi aniji tlolefe, onehome nëno nalëgleme.’ Sobo kë wesibime lowene hana telo, na Jisasme këme tëbo totlo. Sobo meweniji latelo, Jisas bu atwati howa.
18 Gotobë lowene mago gali ëtani kë të mototokweflabë home, Goto megali latlome, onehome nënome, kë gali tëgletlebë ho, bu tako elili fa logotleme na gli lëleme. Iniwa galime bu kë gali toglomebë, bu fatamu latotome.
19 Këme nëgeme sobo tëbo lowene, aholokwana ti elome na Gotome fwa lowene sle eletelome. Sobo melë egelona kwe Goto bu sobobë tëbo lowenebë aholokwana ti lëgletëyome.
20 Na Tako Ho some tiho lowenena tafa egelobë lowene lëglëyome. Na unina, bu Jisasme ita jine lëgelëfakleme. Bu kë home wafi aniji tlole seme nëno lëglebëme.
21 Kwe bu heven lifate mëta tafa lëglebë, na Goto iniwa wesibi ëtani kë blëge totomebë, ita sle logotomebë olë mana folokoke tleme. Ëtani mu, Goto kë galime, gali sle tlome. Na bu bubë lowene mago gali të mototokweflabë home aniji tlome, kë gali onehome të namëgëtakefëtëmame.
22 Ëtani Moses megali latle, ‘Sobobë Tako Ho, Goto, bu sobobë semle lime aniji logloleme, bubë gali të nalëgëtatëyome. Na bo Gotobë lowene mago gali të notokweflëbë ho fene tafa nelë, bu mata mefata nalëgleme. Sobo bubë gali aholokwane elolome na kë gali esogo elelëlome.
23 Na iniwa oneho, kë hobë gali aholokwane jwa mëglana na esogo jwa mëglelëlana kwe Goto bume tëbo logotomeme. Na bu Gotobë onehobë ku mëta hana tafa mëgelulame.’
24 Gotobë lowene mago gali të mototokweflabë ho iniwa, bu ebë olëna kë fata lëglebë wesibime, gëgali motokweija. Samuel bu kë wesibime afina wagali tle na tokwafe Gotobë lowene mago gali të mogotlabë enëne fli, Samuelbë nagi kë fata mëtlabë, bu mata kë wesibime gëgali mëtla.
25 Goto bu ëtani megali sle tle, bu ho lime jine lëglëleme, onehome nëno nalëgleme. Na Gotobë lowene mago gali të mototokweflabë ho bu kë galime onehome gali motlokwefëma. Na Goto bu kë home sobelë jine tlëtëyo, bu fene gali mëtla. Goto sobobë bisemleninome megali sle latlome, bume lale tafa nalëglelëmeme. Na kë gali sle gali bu soboname iniwame gali tle. Goto bu Abrahamme megali sle latlole, ‘Bo tokwafe iniwa lifate mago enëneme lale tafa nëglëmëme. Na kë lale tafa lëglëme ho, jubë bisemleni mëta fata lëgleme.’
26 Këme nëgeme, Goto bubë wege home aniji tlole na sobelëme afina jine tlëtëyo, some ululu sle nalogotome na some jowa jowa onehome, tëbo lowenebë aholokwana ti egelobëme laitome.”