42
Josepbë bolijahani Isip lifewa mitisiya, witi hi wesibi glo namëglame
1 Na Josep bolijaya Jekop, gali aholokwane tle, “Lale hi wesibi Isip life mëta memobe.” Na bu bowenenime gali tlome, “Sobo emëta tafawa fëyeme elone?
2 Bo gali waaholokwane nelë, ‘Lale hi wesibi Isip life mëta memobe.’ Te, sobo kë lifewa eimome na lale hi wesibi kë mago glo emolome. Na sebo hi nanëglame, foneme gigli nëglalime.”
3 Na Josepbë 10 bolijahani Kenan life kile mototla na Isip lifewa mitimiya, lale hi wesibi balitina glo namëgemolame.
4 Kwe Jekop, Josep bolijamome Benjaminme, Isip lifewa jine hana tlële. Bu melowene latle, bu ligimena na bume alëgeme tëbo mogotlame. Josepna Benjaminna jowa bota mëta fwa fata mëtelo.
5 Na Kenan life mago enëne mata tako foneme gigli mëtla. Këme nëgeme Jekop boweneninona na fli Kenan enënena iniwa mitimiya, hi wesibi balitina glo namëgemolame.
6 Josep Isip life onehome tafa tlelëme. Na bu iniwa onehome lale hi wesibi sa tëtakefëtëme. Na bubë bolijahani, bu belë fata mëtla na sëkefo miti tafa mëtla na life elë hwi mëtëtëkaka. Josep bu Isip life mago eso ho nëgeme, bu sëkefo miti këme tafa mëtletla.
7 Na Josep bu bolijahanime watëselëme. Kwe bubë weniji ëho latëtatëme. Na bu feilawa jiyakle tlome, “Sobo hamago esijone.”
Na bume tafu mëtëtatla, “Sebo Kenan life mago nisiya, hi wesibi glo nanëglame.”
8 Na Josep bu bolijahanime wa tëselëme kwe bume hana mëtëselëla.
9 Na Josep bu bolijahanime hwi tlome, bume sëkefo miti tafa mëtletla. Na bu ëtani kë hwi tëglebë nimitelë gali ita lowene tletle. Na bu gali tlome, “Sobo hwelutuwa hwi enëne. Sobo Isip lifatebë flesu ho jwa life hwime esijo. Na tokwafe këbë life tëbo naegotlome.”
10 Na bu gali tafu mëtëtatla, “O eso ho, weye, hanane. Sebo jubë wege enëne, hi wesibi glome nisiya.
11 Sebobë aya jowa. Sebo hwelutuwa hwi enëne hanane. Sebo nëgali enënemu.”
12 Kwe Josep gali tlome, “Hanane mu. Sogë lalo. Sobo Isip lifatebë flesu ho jwa life hwime esijo. Na tokwafe këbë flesu ho jwa life tëbo naegotlome.”
13 Kwe bu gali motlola, “O eso ho. Sebo we ita tële nëbale na sebobë aya jowa, Kenan life mago ho. Na sebobë nagifu keinëba ayana tafa lamulo, kwe li keinëba wagli tle.”
14 Kwe Josep gali tle, “Weye, hanane. Bo ëje wagali nelë, sobo hwelutuwa hwi enëne.
15 Bo sobobë lowene su nëtatëyo fene. Sobobë gali nëgali gali o sogëna gali. Sobobë nagifu keinëba ebë life elë hana ligisina na bobë naba lime hana liglibena, kwe bo melowene, sobo sogëna gali na sobo sobobë lifekuwa hana egitome, hanane mu. Bo nëgali gali hana nëgelëna kwe melëmane bobë eso ho Fero tëbo malëtanë.
16 So mago li lujume na sobobë keinebame nolujuwelëlëme. Sobo fli kalabusu lo mëta mana tafa elome. Na bo lowene nanëgelëme sobobë gali nëgali gali o sogëna gali. Sobo sogëna egelona na sobobë keinëba hana eglesulona, kwe bo melowene nëgelëme, sobo hwelutuwa hwi enëne. Bo nëgali gali hana nëgelëna kwe melëmane, bobë eso ho, Fero tëbo malëtanë.”
17 Na këme wagali tle na kalabusu lowa sike tle na bu tële olë kalabusu lo mëta tafa mëtelula.
18 Na aona olëbëna Josep gali tlome, “Bo Gotome esogo nëglelëkeflëbë ho na bo some këme manibo nëletëyo. Sobo bobë gali esogo eglolona kwe sobo lalowa tafa egelome.
19 Sobo nëgali gali hobë kwe bo metole nanelë, somago jowa howa kë kalabusu lo mëta tafa lëleme. Na sobo fli eitome. Na sobo kë glo tëgelobë hi wesibi sobobë ilawa enëneme ehwetutemome. Bu foneme gigli mëglalime.
20 Na sobobë keinebame bo belë elesutëname. Na bo melowene nanëgelëme, sobobë gali nëgali galimufe. Na some hana tëbo nëgëtome.”
Na bu gali mëtla, “Jubë gali lalowa.”
21 Na Josep bolijahani blalo gali mëtla, “Nëgali, ëbame sebo keinebame tëbo totla. Na bu seme lëkle tëtana na yafe gali tlona, ‘Matëbe, tëbo asa etana.’ Kwe bubë gali aholokwane hana tlola na bume manibo hana tletla. Këme nëgeme seme ebë hobota këme lisitëna.”
22 Na Ruben gali tlome, “Bo yafe gali tlëyo, keinebame asa tëkle etlo. Kwe bobë gali boblo latëtatëna. Josep gli tëgleme nëgeme, na kë hobota kofayame seme këme lisitëna.”
23 Na Josepbë bolijahani Hibru galina gëgali mëtla. Na Josep bubë gali lowene latletëme kwe bolijahani melowene lamëtla, “Bu sebobë gali lowene hana lële.” Josep Isip life hobë galina gali tlome na li ho Josepbë gali bolijahanime Hibru galina obwelë tëtatëme, këme mumu mëtëbetla, “Sebobë gali lowene hana lëlefe.”
24 Na Josep bubë gali aholokwane tlome. Na bume hune totome na hwelutuwa tako ye tletëme. Na ye kuju tëbe. Na ita tisi. Na bume gëgali tleleme. Na Simeonme aniji tlole. Na tële toba tabana lei totometle, bolijahanibë naba li mëta. Na bume kalabusu lowa tuku tle.
Josepbë bolijahani Kenan lifewa ita mititiya
25 Tokwafe Josep wege home hwelutuwa gali tlome, “Sobo ebë enënebë musu mëta lale hi wesibi sisike eletemomo. Kwe bu kë mëtehweijabë baliti, bubë musu ëfo mëta sike ekoutemome. Na sobo fli hi wesibi mata elëmome, alëgeme hi namokoujame.” Na bu melë mëtla Josep fene gali tlome.
26 Na bolijahani bubë hi wesibi musu, bubë donki kleli matawa gogwa motola, na mititiya.
27 Mititiyabëë na olë ki tëbe na alëge mëta ni namëgebëyame. Na ho li musu tuhu totle, hi wesibi donki klelime lëglële nalëgleme. Na bubë baliti, musu ëfo mago hwi tlome.
28 Hwi tlome na bolijahanime we telokwakëme, “Bu bobë hi wesibi glo baliti bobë musu mëta wasike mëlafe. Bobë musu mëta ekë mëtemole.” Na bu klelegomu memotokouja. Na uli mëtla na bu blalo gëgali mëtla, “Iyee! Goto bu seme habelë lalëtanane.”
29 Na bu Kenan lifewa fwa mutula. Na bolijaya belë mutuja. Na bume kë fata tëgletëmebë wesibibë gali bolijayame të mëtëtatla.
30 Na bu gali motlola, “Isip lifebë eso ho seme feilawa gali tlona. Na blawa meso tëtatëna, ‘Sobo hwelutuwa hwi enënefe.’
31 Na sebo megali tlola, ‘Sebo nëgali enënemu. Sebo hwelutuwa hwi enëne hanane.
32 Sebo we ita tële nëbale na sebobë aya jowa. Na sebobë nagifu keinëba ayana Kenan life mëta tafa melo, kwe li keinëba wagli tle.’
33 Na kë eso ho seme gali tlona, ‘Bo sobobë manibo fene su nëtatëyo. So mago li ho bona tafa nelome na fliye eitome sobobë ilawa enëneme hi wesibi ehwetutemome, bu foneme gigli mëglalime.
34 Na sobobë nagifu keinëba bome elesutënana, bo melowene nanëgletëyome, sobo nëgali enënemu na sogëna enëne hanane na hwelutuwa hwi enëne hanane. Na bo sobobë afame kalabusu lo mago tuhu notokwaklëme. Na sobobë lifewa ita elelulome. Na sobo ebë life mago hi wesibi lalowa glo eglekefome.’ ”
35 Na bu hi wesibi musu tutuhu motokouja na bubë baliti musu ëfo mago mana hwi mëtlaguma. Na bu bolijayana kë baliti hwi motloma na bu tako uli memëtla.
36 Na bolijaya Jekop feilawa jiyakle tlome, “Sobo bobë nëbale tlemalë watëbo totomo. Josep waflawi tlita na Simeon mata waflawi tlita. Na sobo metole lalone, Benjaminme eglelulo naegelomene. Matëbemu. Kë sobo bome hobota gwa etakefëtëna.”
37 Na Ruben bolijayame gali tlole, “Bo Benjamin, Isip life mago jume nëglesutë jwa nëgena kwe ju bobë tlemalë iko nëbale lalowa tëtëkle etomeme. Bo Benjaminme manëlelulë. Na bo ju belë mana fata nëlelëkakilëme.”
38 Kwe Jekop gali tlole, “Bobë nëba juna hana egimome. Bolijaha wagli tle na buwa tafa lële. Na bume alëgeme tëbo mogotlana, kwe bo tako manibo mefwa gli nëgelëme. Bo filemi ho nëgeme.”