13
No xapkap ina inanaa
1 Balawaa naba nanaatuul ina nugu limlim laa sangan gim. Xan inaatel Pat Moroaa, a paare weaatalaa, “Sin ininte ina no namaang tsaxa araraa alua o a tuul ina no tiltsoxoti di na paare taman abia uk maarang ngali asen we, asuk so, tii tsap.”
2 Iaa tii se atewaai tsaa gim, biaa iaa tii manman mii gim, sin nanaalua ina nugu uwa. Talaawaa, iaa ba sebula paare taman, biaa iaa ta xap manman mii gim. Sin nugu mulamula iaa ba xap poroklii xaal di na sol loxono sosong,
3 amuina gim saan ngali iaa na asen we, Karisito a papaare lalon iaa. A xap malumlum ngali taxaa mii gim oro xan xoror watwat a suk buxa labatina gim.
4 Ngali atik axaautsi, tii taxiu papan tongol, lalon malumlum, oro tii tino lalon xan xoror Moroaa. Malen mu, Gelulu ta malumlum lalon ia oro sin xan xoror Moroaa gelu ba tino mii ia ngali taxaa laa sin gim.
5 Gim na nen axaautsi gim tsaa nawe nagim tinaalnge aso o a xap. Asuk so we gim atii we Iesu Karisito ia lalon gim oro nawe a xap, nagim tinaalnge a xap so.
Asuk so we, gim atii we Iesu Karisito ia lalon gim. Male gim xonon gim tsaa ma gim na nanxilalaa we, gim xap xan no tsi Moroaa.
6 Ma iaa taalnge we, gim ba tatanginai malen, gelu xap xol sin abala xonkonon.
7 Talaawaa gelulu ningning laa sin Moroaa ngali gim na xap xosaraa xaa was na tsaxa. A xap ngali no inaman di ba lasi we, gelulu xan no untinaxaa Moroaa. Oro ngali gim ba xosaraa sen maarang ta tutiik, malen nawe biexaal di soro adodo we nagelulu tinaxaa a se xol.
8 Amuina gelulu xap pupua ngali xosaraa xawas ngali epuske mii soina, oro ngali til mu taman soina.
9 Gelu suk taton, biaa gelulu ta malumlum oro gim watwat; ma nagelulu no sausawit ngali nagim mamainaang.
10 Sin abala muina, iaa ga atalaa abala no maarang biaa iaa ta xap manman ma biaa iaa ba ta tsap, iaa ba xap tali mamaet sin gim taman banam. Orong a tali abala banam sin iaa, ngali axos laangen gim lapalaa ma a xap ngali tsaalen gim laa lapula.
Xapkap ina no totore
11 Nugu no taamat, balawaa nugu xapkap ina totore, xubalaasaai sin gim. Gim na man taman adodo ta uk ma gim na tino lalon malina. Gim na papaalii Moroaa na atsiki gim laa ngali maatkel lalon tinaalnge ma gim na lolong sin nugu inanaa. Gim na ukbal ma gim na manman lalon malina. Ma xan titii ma malina Moroaa naba manman mii gim.
12 Gim na suei atatoni gim xuxuuk taman abia engur ta pat. No untaltaalnge araraa di tulen xadi pinpinis ma tataton laa sin gim.
13 Iaa ningning ngali xan amiimiilam Orong Iesu Karisito, ma ngali Moroaa naba titii buxaai gim araraa, ma Nantanua Pat naba pupua ngali xosaraa gim araraa ngali xale etudim taman ukbal mii ia.