9
Moroaa a titii iwaa untataton ina tamtabiel
1 Iaa ba xap bula atatal laa sin gim taman abala inatalil ina tinabel laa sin no untaltaalnge, biaa di ta muun.
2 Amuina, iaa atii nagim tataton ngali tiltsomi, ma iaa tii se paraak tsaa taman abala laa sin no Masedonia. Iaa tii asaaiti di we, sin abala miet tii se xap, gim tia lalon prowins Akaia, gim tii se taxaaturung ngali tabiel, ma nagim tataton ngali tabiel ga atapaasi xuduxudu ina inaman ngali tabiel.
3 Oro iaa ga tulen Taitus mii lomasen turumasen ngalibi nagelulu no parparaak ngali gim ngali abala tinaxaa naba xap maarang gomsaa, oro ngali gim ba taxaaturung malen iaa ta paare weaatia.
4 Amuina, nawe xaa Masedonia di xaalame mii iaa ma giem ga le tatanginai gim ta xap taxaaturung, giem ba suk mangiel, sin abia giem ta taalnge sin gim, oro gim ba suk mangiel buxa tsaa sin gim.
5 Biaabi iaa ga adodo ngali anaai abala no taamat ta tuul, ngali detuu ba setauan uwaa gim ma araraai no tinaxaa ina tinabel mamainaang gim ta se xubatsi. Mil gim ba taxaaturungi abia tinabel mamainaang malen xa ta xap bal mamaet ngali tabiel.
6 Gim na adodomi, saa ia ta xap sok buxaai, naba tatei bula mu biaa ta xap buxa, oro iwaa xa ta sok buxaai, naba tatei buxaai bula biaa ta malisa.
7 Gita xuxuuk gita na tabiel taman semaarang gita ta adodomi lalon xida no butsa, a xap taman bal tsaxa ma xa na xap atuaai gim ngali tabiel, amuina Moroaa a titii iwaa xaa ta taton ngali tamtabiel.
8 Moroaa a pupua ngali tabiel buxaai gim taman no amiimiilam araraa ta usli buxa sin gim, ngalibi sin no maarang araraa ma sin no leng araraa, gim ba adi sawe gim ta muun ngali, ma gim ba usli buxa ngali tabiel sin biexaal sin no tinaxaa axaau araraa.
9 Malen lalon xan inaatel Saam ta atalaa:
“A se tsaarien araraai xan no tinabel laa sin no muun was;
xan ina tutiik naba tino laaliu.”
10 Talaawaa saa ia ta tabiel taman no xalitsa laa sin unsoksok ma tsoki ngali luxaal, naba tabiel buxaai bula gim ma naba aloti xan niaan atuturung ina xalitsa ma naba aminaasi biaa tatat ina nagim namaang tutiik.
11 Gim ba tsap no untang sin no sal araraa ngalibi gim ba tigiri tabiel axaau sin no maarang araraa ta tsap ma sin gelulu nagim tinabel mamainaang naba atsapngen xuduxudu ina no inaman ngali putsangi axaau laa sin Moroaa.
12 Amuina biaa gim ta tiltsomi xan no inaman Moroaa lalon abia sal, biaa di ta muun, di ba adi abia tiltsomi ngali xadi no muun, ma xoxot ina no inaman di ta putsangi axaau sin Moroaa naba usli buxa.
13 Biaa gim ta xosaraa abala inatalil ina tinabel asen we, gim taxaariiti nagim xuxubu. Ma no inaman di ba paʼii Moroaa, amuina gim paare leng we, xan inesaait mamainaang Karisito aso ma talaawaa gim long amusili nagim no totore tsaa ma amuina gim exasen axaautsi mii di ma ngali no muun araraa.
14 Ma lalon xadi no sausawit ngali gim xadi no butsa naba laa sin gim amuina xan amiimiilam Moroaa ta atubudaani buxaai gim.
15 Gita putsangi axaau sin Moroaa ngali abala tinabel ta se tali sin gita. A xap xida xaa totore na pupua ngali paate alengi taman abia tinabel.