3
No namaang ina xalkale pat
1 Amuina gim tii se tapaas mula mii Karisito gim na tsatsel taman nagim no butsa ngali no maarang axaau biaa Moroaa tii se taxaaturungi ngali gim tade balalangit, tiwaa Karisito ta xalkale sin xan lima mua Moroaa.
2 Gim na tigiri adodo watwat ngali no maarang lapalaa, a xap no maarang nan balan pula.
3 Amuina nagim namaang in xamkabaar a se xap, malen mu gim tii se met, ma talaawaa nagim no tino uul lalon Nantanua a se xuxii mii Karisito lalon Moroaa.
4 Biaa Karisito, iwaa nagim tino, naba ta asemat, biaa gim bula gim ba asemat mii ia lalon minaalam.
5 Biaabi gim nangaam bula xosaraa abala no namaang morokon biaa ta tsoxo mii nagim no namaang tsaxa ina abala balan pula. Nangaam xosaraa no namaang ina tsuliu ma gim nangaam manginngin ngali xosaraa biexaa matlaxen namaang tsaxa, mataxaaxaa ngali num xaa daan maarang biaa a malen gim langlangaari laa sin no malagan.
6 Amuina sin abala, xan minagaa Moroaa naba xaalame papan abia di ta xap amusili xan no totore.
7 Gim tii eses lalon abia no namaang lalon abia tino gim tii manngi.
8 Oro talaawaa gim na se papaalii abia no mat laxen namaang tsaxa malen no minagaa, paare pulapula, ietsaxa ina ngus.
9 Gim nangaam apanaai engen gim amuina gim se saali nagim no namaang xabaar gim tii xoxosaraa.
10 Talaawaa nagim no adodo na suk tsap uul ma xaatsap araraa. Moroaa a se xosaraa gim ngali tsap no taamat uul ma ga xosaraa gim ngali tsap malen ia tsaa ngalibi gim ba atik axaautsi ia.
11 Amuina Moroaa a se xosor auuli gim, asuk xap xawas na tsaxa nawe gim no Jiu o no Gentail, xasau o xap axasaui o xibong o no inaman xuul o xa untutule o xa taamat leiwaa oro Karisito mu a tino lalon no untaltaalnge araraa.
12 Biaabi Moroaa ga se axilangi gim ngali tsap xan no inaman pat so ta titii buxaai di. Gim na amusili no namaang ina titii biexaal, namaang axaau, namaang ina adokdoki, namaang ina mangmagus ma xalkale adamis.
13 Sirawaa engen gim, nawe xa a se atsaxati gim, gim na adodolii xadi no namaang tsaxa malen Orong Iesu ta adodolii nagim no namaang tsaxa.
14 Lapalaa papan abala no namaang biaa namaang ta suk lot buxa, gim na etitii engen gim biaa namaang a todomien no untaltaalnge araraa.
15 Xan malina Karisito naba laamungen nagim no butsa amuina malina a putsangi gim malen gim ina uk pakpak. Ma gim na putsangi asuk axaau maase.
16 Poroklii xan totore Karisito naba manman mii gim malen gim ta asingan ma anaai gim xuxuuk taman no sinaae araraa malen gim ta anaanngi no ananaan ina buk Saam ma ananaan ina paipaʼii ngali putsangi axaau sin Moroaa lalon nagim no butsa.
17 Sin no sen maarang gim ta xosaraa, o paare taman lalon totore, ma tinaxaa, gim na xosaraa araraai no, sin iesan Orong Iesu, ma putsangi axaau sin Mom Moroaa.
Namaang lalon matenaanua
18 Gim no aina minaxis gim na tigiri amusili xadi no totore nagim no maxis amuina biaa xan sal tutiik Orong ngali xosaraa.
19 No taamat minaxis gim na titii nagim no tubu ma gim na xap bal tsaxa ngali xosor atsaxati di.
20 Notsi gim na long amusili xadi no totore nagim no mom ma nagaa sin no maarang araraa gim ta xosaraa, amuina balawaa atatoni Orong Iesu.
21 No mom gim nangaam amagaai nagim notsi, amuina nawe gim xosaraa abia, di ba xap taton.
22 No untutule gim na long amusili nagim no manmanel ina balan pula lalon no maarang araraa ma gim na xosaraa abia a xap papan no matan di ta nanen, ma ngali adi xadi tinaalnge, oro taman butsa ta so ma mangmangle xa ngali Orong Iesu.
23 Sawe gim ta xosaraa gim na taxaa taman nagim no butsa araraa, malen gim ta taxaa ngali Orong ma a xap ngali taamat.
24 Amuina gim atii we, Orong naba tali sin gim nagim no tapkina ma gim ba adi biaa tubudaan tii se xubatsi ngali tali sin xan no inaman. Amuina ia iwaa Orong Iesu so, iwaa gim ta taxaa ngali.
25 Iwaa xa ta xosaraa namaang tsaxa naba adi xan iliil ngali xan namaang tsaxa, amuina Moroaa naba ininte bula sin no inaman araraa sin abia uk sal.