4
Tino ngali atatoni Moroaa
1 Ngali araraai, nagetu no taamat, getu se asingan gim ngali gim ba sen tino we ngali atatoni Moroaa, malen gim ta tino atalaa. Talaawaa getu ga atsuraa gim ma anaai gim lalon Orong Iesu ngali gim ba lo xoxosaraa abala mat tino.
2 Amuina gim se atii sen asasing getu tii tali sin gim sin xan banam Orong Iesu.
3 Balawaa xan sirsiir Moroaa ngali apati gim ma ngali sol loxono namaang tsaxa ngali exus.
4 Gim xuxuuk gim na asasing ngali arongi no isuaan gim tsaa lalon namaang biaa ta pat ma mangmangle.
5 Gim nangaam amusili biaa sasaae ina manginngin malen no muun taltaalnge di ta xap atii Moroaa,
6 ma biaa namaang, xa na xap atsoti xan taamat ma na xap apanaai. Orong naba tali mamaet sin no inaman ngali abia no mat laxen namaang tsaxa malen getu ta se asaaiti gim ma atewaai gim.
7 Amuina Moroaa a xap ilei gita ngali gita tsap morokon, oro ngali manngi abia tino pat.
8 Biaabi nawe xa a taaltalu sin abala asasing, a xap taaltalu sin taamat oro a taaltalu sin Moroaa, iwaa tii tali Nantanua Pat sin gim.
9 Talaawaa taman nagim titii ngali no taamat, getu suk xap pupua ngali atatal taman, amuina Moroaa tii se asingan gim ngali etitii engen gim.
10 Aso malen gim titii bula nagim no taamat araraa Masedonia. Oro getu ningi awatwati gim nagetu no taamat ngali lo xoxosaraa namaang ina titii.
11 Gim na watwat ngali xonon amusili namaang ngali xale adamis ma gim na xap atsigili nagim no ngorngor sin xadi no mamaet biexaal. Gim na taxaa taman no liman gim malen abia getu tii se asaaiti gim.
12 Ngalibi, biaa di ta xap taalnge, di ba lasi nagim no tino sin no leng araraa ma di ba manglen gim. Ngalibi gim ba xap muun.
Xan tsinap Orong
13 Nagetu no taamat, getu xap saan ngali gim na ngaungaau sin abia di tii se met o gim na lolbiir buxa malen biaa no inaman araraa, di tii xap liliis taman tinaalnge ngali tinapaas mula.
14 Gita taltaalnge we Iesu tii met ma tii ga tapas mula, ma biaabi gita ga taltaalnge we Moroaa naba atapaasi Iesu mii abia no untaltaalnge, di tii se met.
15 Amusili xan totore Orong tsaa, getu asaaiti gim we gita no sa gita ta tino tsaa, gita ba manman pupua sin xan tsinap Orong, gita ba xap laamungen abia di, di tii se met.
16 Amuina Orong tsaa, naba xaalame lapula xaal balalangit, taman abia xuupkup lot ina xariin lalaamua ina no angelo ma xan ililei ina tail Moroaa, ma biaa no minet lalon Karisito, di ba setauan tapas mula.
17 Mil gita, biaa gita ta tino tsaa ma manman tsaa, Moroaa naba gii atsigili gita mii di lalon xelangit ngali sabasue Orong nan wang, ma gita ba manman laaliu mii Orong.
18 Biaabi, gim na anaai engen gim tsaa taman abala no totore.