10
Xan tsutsungit Karisito axuuk mu
1 Biaa lo Moroaa tii tali sin no Jiu a malen puapua mu ina no tubudaan naba ta xaalame mil. Biaa no lo tii xap asen muina so ina abia no tubudaan ta tsaptsap talaawaa. Iwaa unsausawit a tali biaa uk tsutsungit sin no miet xuxuuk ngali no inaman, oro biaa, naba xap tiltsomi no inaman ngali tsap mixat pupua ngali langaari laa sin Moroaa.
2 Nawe lo nii pupua ngali saali xadi no namaang tsaxa no inaman, biaa no unsausawit di ba pupua ngali iaawis sin tsutsungit tali no tinabel. Amuina biaa no unlanglangaari di nii se amixati di axuuk mu, ma di nii xap bula saaen atsaxati di ngali xadi no namaang tsaxa.
3 Oro biaa no tsutsungit di ta xosaraa no miet papan miet a sebula asaait mulangen di taman xadi no namaang tsaxa.
4 Sinsa biaa dalan no bulmakau ma no meme a xap pupua ngali saali no namaang tsaxa.
5 Biaabi Karisito ga xaalame lalon abala xolkolmoxo ina inaman tii ga paare laa sin Moroaa:
“Iu xap saan ngali tsutsungit ma tinabel xaal sin iaa,
Oro u se taxaaturungi biexa pakpak ngali iaa;
6 Biaa di tii tuun axaii no tinabel ma no tinabel ngali saali namaang tsaxa,
oro u tii xap taton taman abala no tsutsungit.
7 Mil iaa ga paare, ‘Moroaa, iaa tala ngali xosor puaa num sirsiir,
malen mu abia di tii atatal taman iaa lalon buk ina lo.’ ”
8 Xan lo Moses a paare we, no inaman, di na tali no tsutsungit. Biaa Karisito ta paare weaatala, “U xap saan ngali no tsutsungit ma no tinabel xaatsap, ma u ga xap taton sin no tsutsungit ina no matauteng biaa di ta axaii malen tinabel ngali saali no namaang tsaxa.”
9 “Lolong, iaa se xaalame ngali xosor puaa num sirsiir.” Ga saali nanaaxuuk ina xuxubu ngalibi naba pupua ngali atiltsoli nanaalua ina xuxubu.
10 Sin xan sirsiir Moroaa, gita tii se tsap Pat lalon tsutsungit ina xan pakpak Iesu Karisito axuuk mu ma xan tsutsungit naba xap xosor mulangen bula.
11 Ma no unsausawit araraa di tiltil sin no leng araraa sin xadi no tinaxaa laa sin Moroaa, ngali tali tinabel sebula ma sebula biaa uk tsutsungit biaa ta xap pupua ngali sibilenli xadi no namaang tsaxa no inaman.
12 Oro Karisito xida unsausawit lapalaa, iwaa ta tsutsungit tali abia tsutsungit ta xuuk mu, ngali sibilenli no namaang tsaxa laaliu, ma ga tsotso sin xan lima mua Moroaa.
13 Ma talaawaa a tsotso liliis pupua sin xan no matenkorot, Moroaa naba ta aturungi di malen xan niaan xutxutsiil.
14 Amuina sin xan tsutsungit ta xuuk mu, ga apati xan no inaman, ngali tsap tutiik laaliu.
15 Ma Nantanua Pat bula a paare leng sin gita taman abala no. Setauan a paare we:
16 “Balawaa se xuxubu iaa ba ta xosaraa mii di
Mulina abia no leng, Orong a paare we,
iaa ba aturungi nugu no lo lalon xadi no butsa
ma iaa ba atalaa no papan xadi no adodo.”
17 Orong a sebula paare,
“Iaa ba xap bula adodomi
xadi no namaang tsaxa ma xadi no laklaxei lo.”
18 Amuina Moroaa tii se adodolii tsaa abia xida no namaang tsaxa, ga xap saan ngali gita na lo taktaxaa sin tsutsungit tsaa ngali abia no namaang tsaxa.
Gita na taxaa ma tilwatwat
19 Biaabi nugu no taamat, amuina gita ta pupua ngali tilwatwat lalon tinaalnge sin Moroaa, gita pupua ngali tsiga laa lalon abia Xobel Pat Buxa sin xan dal Iesu.
20 Iesu tii se tsalali abia sal uul ngali gita ba xaalame atataen Moroaa, biaa sal a tali tino sin gita mii Moroaa. Ma ga tsalali abia taago ina abia Xobel Pat Buxa, sin xan tsutsungit biaa tii tali abia xan pakpak tsaa,
21 ma amuina gita ta ie unsausawit lapalaa, patanginai Xan Anua Moroaa,
22 gita na laa atataen Moroaa taman abia butsa ta suk so araraa taman tinaalnge watwat, amuina gita se sisil taman dalan Iesu ma Moroaa a se aleiwaai gita sin xida no adodo lalon xida no butsa ma ga se guraii gita taman abia daan ta mixat.
23 Gita na tigiri taxaariiti abia liliis taman tinaalnge lalon Iesu malen gita ta paare we, gita na xap adodo xuduxudu, amuina iwaa xa ta se xubatsi asuk so araraa.
24 Gita na anaai gita xuxuuk ngali titii no inaman ma ngali xosaraa no maarang ngali tiltsomi di.
25 Gita na xap poroklii abia namaang ina tsap etudim malen biexaal di ta xoxosaraa, oro gita na watwat ngali anaai gita xuxuuk, sinsa xan leng Orong a se atat.
26 Nawe gita lo xoxosaraa namaang tsaxa tsaa, biaa gita se adi soina sinaae, a se xap xa tsutsungit bula ngali no namaang tsaxa,
27 oro gita atii mu we, gita se liliis taman minataa ngali biaa xan ininte ma biaa xaraxin ie naba ta auki xan no matenkorot Moroaa.
28 Saa ia ta laxei xan lo Moses, di ba sas amantei ia ma naba xap adi xa biirbirum nawe a lua o a tuul, di tiltsoxoti ngali paare leng taman xan namaang tsaxa.
29 Gim na nanxilalaa we, xa naba alet sosong buxa nawe a palolii xan tsi Moroaa. A adodo we, dalan Iesu a xap xaka watwat ma ga xap pupua ngali todomien ia laa sin Moroaa ma ngali aleiwaai ia sin namaang tsaxa, a se paare tsaxa ngali Nantanua Pat, iwaa ta tali xan amiimiilam Moroaa sin gita.
30 Sinsa gita se atii we, Moroaa a paare, “Biaa xa ta xosaraa namaang tsaxa, iaa mu, iaa ba tali sosong sin di ma a xap xa bula.” Ma gim na atii sebula we Moroaa tsaa a paare sin Moses, “Orong naba ininte sin xan no inaman.”
31 Biaa iwaa xa ta til laamuaan Moroaa ngali naba ininte sin di, di ba suxa mula taman minataa.
32 Oro adodomi ti laamua, biaa gim tii adi abia xan laleng so Moroaa, gim tii tilwatwat tsaa, biaa gim tii saaen abia xaraxin sosong.
33 Biexaa leng di xaa paare tsaxa ngali gim ma xosaraa atsaxati gim papan no matan no inaman araraa ma gim tiltsomi biexaa untaltaalnge bula ngali man wat lalon xadi no tinaalnge, biaa no inaman di ta paare tsaxa ma tsaapi gim malen di ta xosaraa atsaxati gim.
34 Gim saaen sosong mii abia di, di ta man lalon anua lodo ma gim ga taton sin biaa no inaman di ta pulaxi nagim no maarang, amuina gim suk atii we xan no mat maarang axaau buxa Moroaa bia ta liliis ngali gim ma naba ta man laaliu.
35 Biaabi gim na xap iaawis sin taltaalnge sin Moroaa talaawaa, amuina biaa mat laxen tinaalnge naba tali abia xaraxin iliil.
36 Gim na tigiri tilwatwat ngalibi biaa gim ta se xosaraa araraai xan sirsiir Moroaa, gim ba pupua ngali adi sawe tii se xubatsi tali sin gim.
37 Sinsa propet Abakuk a paare lalon xan totore Moroaa we,
“Nap dokdok mu, iwaa naba ta xaalame naba xaalame, naba xap aliil.
38 Saa ia ta tigiri taltaalnge sin iaa, iaa ba putsangi ia untutiik.
Oro nawe xa a suxa mula taman minataa,
iaa ba xap taton sin ia.”
39 Giem xap ina abia inaman, di ta suxa mula taman minataa ngali amusili Moroaa ma naba xosor atsoti di, oro biaa di ta taltaalnge sin Moroaa, naba atoaa di.