6
1 Biaabi gita na papaalii abia nanaaxuuk ina asasing taman Karisito, ma gita na se masak sin xida sinaae sin ia ma gita na xap tigiri asasing taman puxisbal sin xida no namaang tsaxa ma tinaalnge lalon Moroaa.
2 Gita na atii no asasing ina axaxadaan ma taman muina ina aturung lima papan no untaltaalnge. Gita na atii bula we, no inaman di ba tapaas mula sin minet, ma di ba til lalon ininte laaliu.
3 Biaa nawe Moroaa a sirawaa gita ba xosaraa weaatia.
4 Biexaa inaman di ba xap mula ngali puxisbal sebula. Biaa no inaman di se atii soina Moroaa ti tsaa, ma di ga xonon no tinabel in balalangit, ma di ga se adi Nantanua Pat,
5 ma di ga xonon abia mamainaang sin xan totore Moroaa ma di ga lasi abia xoror naba ta xaalame mil.
6 Nawe biaa mat inaman di taaltalu mula sin xadi tinaalnge, sin xadi taaltalu, di sebula ataxiwaa mulangen xan tsi Moroaa ma di ga amangieli ia matan no inaman.
7 Moroaa atubudaani pula, biaa langit ta xaa usangi pula ma ga atsapngen papaas, ma ga tiltsomi abia di, di ta tapkina abia pula biaa Moroaa ta xaa atubudaani.
8 Biexaa inaman di malen abia pula ta se tsaxa, a tigiri atsapngen mu no xoxon biaa xa ta xap saan ngali ma Moroaa a se taxaaturung ngali xororaa ma auki.
9 No turaaga so, biaa giem ta papaare sin gim weaatala, giem taltaalnge we no maarang asuk axaau buxa sin gim, ma biaa no maarang ta xaalame mii abia atotoaa.
10 Moroaa atigiri tutiik ma naba xap adodolii num no tinaxaa axaau ma biaa titii gim tii se asen sin ia, malen gim tii se tiltsomi xan no inaman, ma gim tigiri lo tiltsomi di.
11 Giem saan ngali gim xuxuuk gim na man watwat lalon nagim tinaalnge ma gim na xosaraa abala no, pupua sin xapkap ina nagim no tino, ngali asen we gim ba adi sawe gim ta liliis adamis lalon tinaalnge ngali.
12 Gim na tilaamamil ngali gim na xap pelmet oro gim na atolomi abia di lalon tinaalnge ma man adamis ngali tapkina sawe tii se xubatsi.
Taalnge sin xan xuxubu Moroaa
13 Biaa Moroaa tii xosaraa xan xuxubu sin Abaram Moroaa atii we, a xap xa bula na lot buxa ngen ia, ngali awatwati abia xuxubu, Moroaa ga puris taman iesan tsaa ngali awatwati sawe ta saan ngali xosaraa,
14 Moroaa tii xubatsi we, “Iaa ba atubudaani iu, ma iaa ba tali num xaa daan utmilmil.”
15 Abaram tii liliis adamis sin no daan miet ma tii ga adi abia maarang Moroaa tii xubatsi laa sin ia.
16 No inaman di ta saan ngali puris, di ba putsangi iesan aia xa ta lot buxa ngen di tsaa, ngali awatwati abia puris, ma ngali tilbanti no inemagaae araraa.
17 Sin abia uk sal, Moroaa tii ga xap pupua ngali putsi xan ngitngit ngali abia no inaman di tii adi abia xan xuxubu. Tii we na asen axaautsi we, naba xap tsilpuli ngali taxaawiti abia no ngitngit. Ngali naba pupua ngali aturung todomien xan puris laa sin xan xuxubu.
18 Moroaa a tali todomien xan xuxubu ma xan puris, ma xa ina delulu naba xap putsi, ma Moroaa naba xap pupua ngali daraxe lalon xan xuxubu o puris; ga saan ngali gita na sol laa sangan ngali man axaau ma taxaariti abia liliis taman tinaalnge ta tali sin gita we naba suk anaai buxaai gita.
19 Gita ie liliis taman tinaalnge biaa naba ta tiltsomi gita ngali tilwatwat ma til leiwaa. Gita pupua ngali tsiga laa lalon xan Xolot Pat Moroaa tsaa xaamil ina taago,
20 tiwaa Iesu tii tsiga laamuaan gita, ma tii ga adi xida xolot. Talaawaa, ia xida unsausawit lapalaa laaliu, lalon xan sal Melkisadek.